Ӧксыяслӧн 3 небӧг 5 - Коми Библия 2023

Крам лэптігкежлӧ дасьтысьӧм

¹ Кор тирса Хирам ӧксы тӧдмаліс, мый Соломонӧс мавтыштӧмӧн пуктӧмаӧсь ӧксыӧ батьыс пыдди, мӧдӧдіс сы дінӧ ассьыс кесйӧгъяссӧ. Хирам Давидкӧд пыр вӧліны ёртъясӧн.

² Соломон сідзжӧ мӧдӧдіс Хирам дінӧ йӧзӧс, медым найӧ висьталасны сылы:

³ «Тэ ӧд тӧдан, мый орччӧн олысь войтыръяскӧд тышкасьӧм вӧсна менам Давид батьӧй эз вермы лэптыны Господьлы, аслас Енлы, крам. Давид тышкасис, кытчӧдз Господь эз песовт войтыръясӧс сылӧн кок улӧ.

⁴ Ӧні Господь, менам Енмӧй, сетіс меным быдласянь лӧньлун: паныд сувтысьяс абуӧсь, миян вылӧ некод оз усьлась.

⁵ Ӧні ме кӧсъя лэптыны аслам Господь Енлы крам. Ӧд менам Давид батьлы на Господь шуліс: ”Тэнад пиыд, кодӧс Ме пуксьӧда тэ пыдди юралан пуклӧсад, лэптас Меным керка”.

⁶ Сідзкӧ, тшӧкты пӧрӧдны Ливанысь сус пуяс. Менам кесйӧгъяс тшӧтш кутасны уджавны тэнад кесйӧгъяскӧд. Ме мынтыся тэнад йӧзлы, мыйтӧм шуан. Тэ ӧд ачыд тӧдан, мый сидонса кодь бур пӧрӧдчысьясыс менам абуӧсь».

⁷ Соломонлысь кывъяссӧ кылӧм бӧрын Хирамлы лои зэв нимкодь. Сійӧ шуис: «Ошкӧм Господьлы, коді сетіс Давидлы мывкыд пиӧс да пуктіс сійӧс юравны татшӧм уна лыда войтырӧн».

⁸ Хирам ыстіс Соломонлы воча кыв: «Ме кылі тэнсьыд корӧмтӧ. Мый кӧсъян, сійӧс и вӧча. Ме сета тэныд сус пу и кипарис пу.

⁹ Менам йӧз лэччӧдасны керъяссӧ ливанса керӧсъяс вылысь саридз дорӧ. Сэсся саридз кузя пурйӧн ме кылӧда найӧс сэтчӧ, кытчӧ шуан. Сэні ме тшӧкта разьны пуръяссӧ, а тэ сэсся ачыд сэтысь керъяссӧ босьтан. Но менам тшӧтш эм тэ дінӧ корӧм. Кора вайны менам керкаӧ сёян-юан».

¹⁰ Хирам сетіс Соломонлы сус пу да кипарис пу, мыйтӧм сійӧ корис.

¹¹ А Соломон тӧждысис Хирамлӧн керка вӧсна, могмӧдіс сэні олысьясӧс сёян-юанӧн. Быд во сійӧ мӧдӧдліс Хирамлы кызь сюрс мешӧк шобді да кызь бӧчка олив вый.

¹² Господь сетіс Соломонлы мывкыдлун, кыдзи и кӧсйысис. Хирам да Соломон ёртасисны да кӧрталісны ӧта-мӧдныскӧд йитӧд.

¹³ Соломон уджӧдіс Израиль войтырысь комын сюрс мортӧс, кодъяс уджалӧмнас мынтісны вот.

¹⁴ Быд тӧлысьӧ Соломон мӧдӧдліс Ливанӧ дас сюрс мортӧс вежласьӧмӧн. Ӧти тӧлысьсӧ найӧ уджалісны, а кык тӧлысьсӧ вӧліны гортаныс. Веськӧдліс наӧн Адонирам.

¹⁵ Нӧшта Соломонлӧн вӧліны уджалысьяс – сизимдас сюрс морт, кодъяс кыскалісны-ваялісны изъяс, и кӧкъямысдас сюрс морт, кодъяс кералісны-перйисны изъяс.

¹⁶ Став уджнас веськӧдлісны куим сюрс куимсё морт.

¹⁷ Ен керкалы подув пуктӧм могысь ӧксы тшӧктіс вайны кералӧм гырысь бур изъяс.

¹⁸ Соломонлӧн йӧзыс лӧсалісны изъяссӧ Хирамлӧн йӧзкӧд да гевалсаяскӧд ӧтлаын. Тадзи [куим во чӧж] найӧ дасьтісны керъяс да изъяс Ен керка лэптӧм вылӧ.