Ӧксыяслӧн 3 небӧг 4 - Коми Библия 2023

Соломонлӧн ыджыд чина йӧз

¹ Соломон ӧксы веськӧдліс став Израильӧн.

² Сылӧн вӧліны ыджыд чина йӧз: Садоклӧн Азарий пиыс вӧлі аркирейӧн,

³ Шишлӧн Элихореп да Ахий пияныс вӧліны гижалысьяс, Ахилудлӧн Иосафат пиыс вӧлі вӧвлӧмторъяс пасъялысь,

⁴ Иодайлӧн Бенай пиыс веськӧдліс тышкайӧзӧн. Садок да Авиатар вӧліны попъясӧн.

⁵ Нафанлӧн Азарий пиыс веськӧдліс ӧксыув муясын юралысьясӧн. Завуд поп, Нафанлӧн пиыс, вӧлі ӧксыӧс туйдӧдысь.

⁶ Ахишар веськӧдліс ӧксылӧн овмӧс-керкаӧн, Авдайлӧн Адонирам пиыс веськӧдліс йӧзӧн, кодъяс уджалӧмнас мынтісны вот.

⁷ Став Израиль му пасьтала Соломонлӧн вӧлі дас кык юралысь. Быдӧн на пиысь вайліс Соломон ӧксылы, сылӧн йӧзыслы да гортсаясыслы сёян-юан ӧти тӧлысь чӧж.

⁸ Со юралысьясыс: Бен-Хур юраліс Ефрем керӧсвыв муын,

⁹ Бен-Декер – Макацын, Шаалвимын, Бет-Шемешын, Элонын да Бет-Хананын,

¹⁰ Бен-Хесед – Аруботын, сы кипод улын вӧлі тшӧтш Соко кар да став Хефер му.

¹¹ Бен-Авинадав юраліс Нафат-Дор муын. Сылӧн гӧтырыс вӧлі Соломонлӧн Тафат нылыс.

¹² Ахилудлӧн Баан пиыс юраліс Танакын, Мегиддоын да Бет-Шеан гӧгӧр муын, мый Цартан кар дорын Изреельысь улынджык. Сы кипод улын нӧшта вӧлі муыс Бет-Шеансянь Авел-Мехолаӧдз да Иокмеам кар сайӧдз.

¹³ Бен-Гевер юраліс Галаад муын Рамот карын. Сы кипод улын вӧліны Галаадын Манассейсянь чужысь Яирлӧн сиктъяс, нӧшта Васанын Аргов му, стенъясӧн кытшалӧм да ыргӧн иганъяс сайын сулалысь квайтымын ыджыд кар.

¹⁴ Иддолӧн Ахинадав пиыс юраліс Маханаимын,

¹⁵ Ахимаас – Неффалим муын. Гӧтырӧ сійӧ босьтіс Соломонлысь Васемата нывсӧ.

¹⁶ Хушайлӧн Баан пиыс юраліс Асир муын да Баалотын,

¹⁷ Паруахлӧн Иосафат пиыс – Иссакар муын,

¹⁸ Элайлӧн Шимей пиыс – Венямин муын.

¹⁹ Урилӧн Гевер пиыс юраліс Галаадын, аморейяслӧн Сигон ӧксылӧн да васанса Ог ӧксылӧн муясын.

Соломонлӧн озырлун да мывкыдлун

²⁰ Иуда да Израиль войтырлӧн лыдыс вӧлі саридздор лыа мында. Найӧ сёйисны-юисны да олісны нимкодясьӧмӧн.

²¹ Соломон кипод улын вӧлі став муыс Ефрат юсянь Филистим муӧдз да Египетӧдз. Ӧксыяс вайлісны Соломонлы козинъяс да кесъялісны сылы став сылӧн олан лунъяс чӧж.

²² Быд лун Соломонлы да сылӧн йӧзыслы вайлісны комын мешӧк шобді пызь да квайтымын мешӧк мукӧдпӧлӧс пызь,

²³ дас тшӧгӧдӧм ӧшкӧс, кызь йирсян ӧшкӧс да сё ыжӧс. Наысь ӧтдор нӧшта вайлісны кӧръясӧс, газельясӧс, косуляясӧс да тшӧгӧдӧм дзодзӧгъясӧс.

²⁴ Соломон кипод улын вӧліны Ефрат ю таладор муяс – Типсахсянь Газаӧдз. Соломон ыджыдаліс сэтчӧс ӧксыяс вылын. Быдлаын, кӧні сійӧ ыджыдаліс, войтыръяс олісны лӧня.

²⁵ Соломонлӧн ӧксыалӧм дырйи Иуда да Израиль войтыр войвыв Дансянь лунвыв Бер-Шеваӧдз повтӧг олісны. Быдӧн вермис пукавны аслас виноград йӧрын, аслас инжир пу улын.

²⁶ Соломонлӧн вӧліны вӧв картаяс, кӧні видзисны нелямын сюрс тарантасӧ доддялан вӧвъясӧс. Сылӧн вӧлі дас кык сюрс верзьӧма.

²⁷ Соломонлӧн киподувса быд юралысь аслас урчитӧм тӧлысьӧ вайліс Соломон ӧксылы да сылӧн пызан сайын сёйысьяслы сёян-юан. Найӧ тӧждысисны, медым ставыс вӧлі тырмана.

²⁸ Ӧксылӧн ветліг-мунігъясӧ найӧ быдӧн могмӧдлісны ӧксылысь доддялӧм да верзьӧма вӧвъяссӧ урчитӧм мында идӧн да идзасӧн.

²⁹ Ен сетіс Соломонлы ыджыд мывкыдлун, сюсь вежӧр да уна тӧдӧмлун, сылӧн тӧдӧмлуныс вӧлі саридздор лыа мында.

³⁰ Соломонлӧн мывкыдлуныс вӧлі ёна ыджыдджык асыввылын олысь да Египетын олысь мывкыда йӧзлӧн дорысь.

³¹ Став йӧз пиысь сійӧ вӧлі медсюсь, весиг эзрахса Этан, Махоллӧн Еман, Калкол да Дардай пиян дорысь вӧлі сюсь. Соломон нималіс матігӧгӧр олысь войтыръяс пӧвстын.

³² Соломон гижис куим сюрс шусьӧг, сюрс да вит сьыланкыв.

³³ Сійӧ вермис висьтавны быдпӧлӧс быдмӧгыс йылысь – ливанса сус пусянь да стен коластӧд быдмысь иссоп турунӧдз. Вермис висьтавны пемӧсъяс, лэбачьяс, веглясьысь-нюглясьысьяс да черияс йылысь.

³⁴ Соломонлысь мывкыд сёрнисӧ волісны кывзыны став муясысь йӧз. Найӧс мӧдӧдісны ӧксыяс, кодъяс кывлісны сылӧн мывкыдлун йылысь.