Ӧксыяслӧн 3 небӧг 20 - Коми Библия 2023

Арамейясӧс вермӧм

¹ Арамейяслӧн Бен-Хадад ӧксы чукӧртіс ассьыс тышкайӧзсӧ. Сыкӧд тшӧтш тышӧ петісны сылӧн киподувса комын кык ӧксы асланыс вӧвъясӧн да тарантасъясӧн. Бен-Хадад уськӧдчис Самария кар вылӧ да кытшаліс сійӧс.

² Сэсся ыстіс карас израильса Ахав ӧксы дінӧ ассьыс йӧзсӧ

³ висьтавны сылы: «Тадзи висьталӧ Бен-Хадад: тэнад эзысь-зарниыд, гӧтыръясыд да медбур пияныд лоӧны менам».

⁴ Израильса ӧксы вочавидзис: «Мед лоас тэнад шуӧмыд серти, ӧксыӧй-ыджыдӧй. Ме да ставыс, мый менам эм, лоӧ тэнад».

⁵ Юӧр вайысьяс бара локтісны Ахав дінӧ да шуисны: «Тадзи висьталӧ Бен-Хадад: ”Ме ысті ассьым йӧзӧс висьтавны тэныд, мед тэ сетін меным эзысь-зарнитӧ, гӧтыръястӧ да пиянтӧ.

⁶ Та вӧсна аски тайӧ кадас ме мӧдӧда ассьым кесйӧгъясӧс, медым найӧ шобасны тэнсьыд керкатӧ да тэнад кесъялысьяслысь керканысӧ да босьтасны сэтысь став донаторсӧ”».

⁷ Израильса ӧксы чукӧртіс аслас муысь став юрнуӧдысьсӧ да шуис: «Аддзанныд, тайӧ мортыс кӧсйӧ миянлы лёксӧ. Кор сійӧ ыстыліс ассьыс йӧзсӧ висьтавны, мый босьтас менсьым гӧтыръясӧс, пиянӧс да эзысь-зарниӧс, ме сылы паныд эг сувт».

⁸ Юрнуӧдысьяс да став Израиль войтыр шуисны ӧксыныслы: «Эн кывзы сійӧс и эн мун та вылӧ!»

⁹ Бен-Хададлӧн юӧр вайысьяслы Ахав шуис: «Висьталӧй менам ӧксыӧй-ыджыдӧйлы, мый ме, сылӧн кесйӧг, водзынджык вӧлі дась сетны ставсӧ, мый сійӧ корис, а ӧні тайӧ тшӧктӧмыс серти ог вӧч». Найӧ нуисны тайӧ юӧрсӧ Бен-Хададлы.

¹⁰ Бен-Хадад воча юӧр ыстіс Ахавлы: «Енъяс мед ёна мыждасны менӧ, Самарияысь кӧ весиг китыр пӧим сюрас менам быд тышкамортлы».

¹¹ Израильса ӧксы шуис юӧр вайысьяслы: «Висьталӧй ӧксыныдлы, мед оз ошйысь тышӧ дасьтысигӧн, а мед ошйысяс тыш бӧртиыс».

¹² Тайӧс кылӧм бӧрын Бен-Хадад мукӧд ӧксыяскӧд чомъясын юигӧн-гажӧдчигӧн шуис аслас тышкайӧзлы: «Дасьтысьӧй босьтны карсӧ!» Бен-Хададлӧн тышкайӧзыс дасьтысисны уськӧдчыны Самария кар вылӧ.

¹³ Сэки ӧти пророк локтіс израильса Ахав ӧксы дінӧ да шуис: «Господь тадзи висьталӧ: ”Аддзан-ӧ тайӧ уна лыда тышкайӧзсӧ? Талун Ме сета найӧс тэнад киӧ, медым тэ тӧдін, мый Ме – Господь”».

¹⁴ Ахав юаліс: «Код пыр тайӧс лоӧ вӧчӧма?» Пророк вочавидзис: «Господь тадзи висьталӧ: ”Тэнад ӧксыув муясын юралысьяслӧн тышкайӧз пыр”». «А коді медводз уськӧдчас?» – юаліс Ахав. «Тэ», – вочавидзис пророк.

¹⁵ Ахав чукӧртіс аслас ӧксыув муясын юралысьяслысь тышкайӧзсӧ, налӧн лыдыс вӧлі кыксё комын кык морт. Сэсся арталіс-гижаліс Израиль войтырлысь тышкайӧзсӧ – налӧн лыдыс вӧлі сизим сюрс морт.

¹⁶ Луншӧр кадӧ Ахавлӧн тышкайӧзыс петісны тышӧ. А Бен-Хадад да сылӧн киподувса комын кык ӧксы коддзытӧдзныс юисны-гажӧдчисны чомъясын.

¹⁷ Медводз тышӧ петісны Ахавлӧн ӧксыув муясын юралысьяслӧн тышкайӧзыс. Бен-Хадад мӧдӧдіс ассьыс йӧзсӧ видзӧдлыны, мый вӧчсьӧ. Сылы юӧртісны, Самария карысь пӧ петісны кутшӧмкӧ йӧз.

¹⁸ Бен-Хадад шуис: «Бур могӧн кӧ локтӧны, босьтӧй найӧс ловйӧн. Тышкасьӧм могысь кӧ локтӧны, тшӧтш ловйӧн босьтӧй».

¹⁹ Ахавлӧн ӧксыув муясын юралысьяслӧн тышкайӧз бӧрся карсьыс петісны израильса тышкайӧз.

²⁰ Быд тышкаморт виис арамейӧс. Арамейяс пышйисны, а израильсаяс вӧтӧдісны найӧс. Арамейяслӧн Бен-Хадад ӧксы мукӧд верзьӧмаяскӧд пышйис аслас вӧв вылын.

²¹ Израильса ӧксы аслас тышкайӧзкӧд уськӧдчис да пасьвартіс арамейясӧс, босьтіс налысь вӧвъяссӧ да тарантасъяссӧ.

²² Израильса ӧксы дінӧ матыстчис пророк да шуис: «Бӧр мун да дасьтысь, ӧд во мысти арамейяслӧн ӧксы бара уськӧдчас тэ вылӧ. Бура мӧвпышт, мый тэныд вӧчны».

Арамейясӧс пасьвартӧм

²³ Арамса ӧксылӧн йӧзыс шуисны сылы: «Израильлӧн Енмыс – керӧсъяслӧн ен [абу ласталӧн ен], та вӧсна найӧ вермисны миянӧс. Ми кӧ накӧд вермасям ласта вылын, вермам найӧс.

²⁴ Со мый вӧч: ӧксыясӧс вешты, а на пыдди ассьыд йӧзтӧ пукты юравны ӧксыув муясӧн.

²⁵ Чукӧрт аслыд тышкайӧзӧс, мыйта тэ воштін тышад, чукӧрт тшӧтш вӧвъясӧс да тарантасъяс, мыйта тэнад вӧлі. Тышкасям ласта вылын, сэні ми збыльысь пасьвартам израильсаясӧс». Ӧксы кывзысис да тадзикӧн и вӧчис.

²⁶ Во мысти Бен-Хадад чукӧртіс арамейясӧс да муніс Афекӧ, мед сэні тышкасьны израильсаяскӧд.

²⁷ Израильсаяс тшӧтш дасьтысисны тыш кежлӧ. Найӧ босьтісны аскӧдныс сёян-юан да мӧдӧдчисны петны тышӧ. Израильсаяс сувтісны арамейяслы воча. Израильса тышкайӧз вӧліны быттьӧ кык ичӧтик кӧза чукӧр, а арамейяс тыртісны ставнас мусӧ.

²⁸ Сэки израильса ӧксы дінӧ матыстчис Енлӧн морт да шуис: «Господь тадзи висьталӧ: ”Арамейяс шуӧны, Господь пӧ керӧсъяслӧн ен, абу ковтыслӧн ен. Та вӧсна Ме сета налысь уна лыда тышкайӧзсӧ тэнад киӧ. Сэки ті тӧдмаланныд, мый Ме – Господь”».

²⁹ Сизим лун чӧж тышкайӧз сулалісны ӧта-мӧдныслы воча. Сизимӧд луннас пансис тыш. Израильсаяс ӧти лунӧн виисны арамейяслысь сё сюрс пода тышкамортӧс,

³⁰ а ловйӧн кольӧм кызь сизим сюрс морт пышйисны Афек карӧ. Сэні на вылӧ усис карса стенмыс. Ачыс Бен-Хадад пышйис карас, и вежӧсысь вежӧсӧ котралӧмӧн сійӧ корсис дзебсянін.

³¹ Бен-Хададлӧн йӧзыс шуисны сылы: «Ми кывлім, мый израильса ӧксыяс бур сьӧлӧмаӧсь. Лэдз миянлы пасьтавны шогалан паськӧм да сьыліаным ӧшлыны кӧвъяс. Сэсся ми мунам израильса ӧксы дінӧ. Гашкӧ, сійӧ ловйӧн коляс тэнӧ».

³² Шогалан паськӧмӧн да сьыліас кӧвъяс ӧшлӧмӧн арамейяс локтісны израильса ӧксы дінӧ да шуисны: «Тэнад Бен-Хадад кесйӧгыд корӧ, мед тэ ловйӧн колин сійӧс». Ӧксы юаліс: «Сійӧ ӧмӧй ловъя на? Сійӧ менам вок».

³³ Тайӧ шуӧмыс локтысьяслы вӧлі бур пасӧн. Ӧксылӧн кывйӧ кутчысьӧмӧн найӧ воча шуисны: «Збыльысь, Бен-Хадад тэнад вок». Ӧксы шуис: «Вайӧдӧй сійӧс татчӧ». Бен-Хадад локтіс Ахав дінӧ, и мӧдыс пуксьӧдіс сійӧс орччӧн аслас тарантасӧ.

³⁴ Бен-Хадад шуис сылы: «Ме бӧр сета тэныд сійӧ каръяссӧ, кодъясӧс коркӧ менам батьӧй босьтліс тэнад батьлысь. Дамаскын верман восьтны аслыд вузасянінъяс, кыдзи коркӧ менам батьӧй восьтліс Самарияын». Ахав вочавидзис: «Сёрнитчӧм бӧрын ме лэдза тэнӧ». Бен-Хададкӧд Ахав кӧрталіс йитӧд, сэсся лэдзис сійӧс.

Пророк висьталӧ Ахавлӧн кулӧм йылысь

³⁵ Господьлӧн тшӧктӧм серти ӧти пророк шуис мӧдлы: «Нӧйт менӧ». Но мӧдыс эз кут тайӧс вӧчны.

³⁶ Сэки пророк шуис: «Сыысь, мый тэ эн кывзысь Господьлысь, тэнӧ косявлас лев, кор тэ мунан ме дінысь». Кор тайӧ мортыс муніс, сылы паныдасис лев да косявліс сійӧс.

³⁷ Сэсся пророк аддзис мӧд мортӧс да шуис: «Нӧйт менӧ». Мӧдыс вируля яйӧдз нӧйтіс сійӧс.

³⁸ Нӧйтӧм пророк петіс туй вылӧ, вевттис чужӧмсӧ, медым сійӧс эз тӧдны, да кутіс виччысьны ӧксыӧс.

³⁹ Кор ӧксы муніс пророк дінті, пророк горӧдіс: «Ме, тэнад кесйӧг, вӧлі тыш вылын. Сэні ӧти тышкаморт вайӧдіс ме дінӧ кутӧм мортӧс да шуис: ”Видз сійӧс. Лэдзан кӧ, юрнад либӧ талант эзысьӧн мынтысян”.

⁴⁰ Но ассьым уджъяс вӧчигкості кутӧм мортыд пышйис». Израильса ӧксы шуис: «Тэнӧ мед мыждасны сідзи, кыдзи тэ ачыд висьталін».

⁴¹ Сэки пророк пӧрччис вевттьӧдсӧ чужӧм вывсьыс, и израильса ӧксы тӧдмаліс сійӧс.

⁴² Пророк шуис ӧксылы: «Господь тадзи висьталӧ: ”Сыысь, мый тэ лэдзин мортӧс, кодӧс Ме тшӧкті бырӧдны, тэныд ковмас кувны сы пыдди, а тэнад войтырлы – сылӧн войтыр пыдди”».

⁴³ Скӧрмӧмӧн да шогӧ усьӧмӧн израильса ӧксы муніс гортас Самарияӧ.