Ӧксыяслӧн 3 небӧг 19 - Коми Библия 2023

Илля пышйӧ Езавельысь

¹ Ахав висьталіс Езавель гӧтырыслы ставсӧ, мый вӧчис Илля, и кыдзи сійӧ шыпуртӧн виис Вааллысь став пророксӧ.

² Езавель мӧдӧдіс Илля дінӧ юӧртысьӧс, тшӧктіс висьтавны сылы: «[Тэ кӧ Илля, а ме Езавель, сідзкӧ] енъяс мед ёна мыждасны менӧ, ме кӧ аски тайӧ кадӧдзыс ог вӧч тэкӧд сійӧ, мый тэ вӧчин пророкъяскӧд».

³ Илля повзис. Сійӧ чеччис да петіс туйӧ, мед ловйӧн кольны. Сійӧ воис иудаса Бер-Шева карӧ. Сэтчӧ колис ассьыс кесйӧгсӧ,

⁴ ачыс муніс овтӧминӧ лунтыр мунан ылнаӧ да пуксис пу улӧ. Сэні пондіс кевмыны аслыс кулӧм: «Тырмас, Господьӧй, меным овнысӧ. Босьт менсьым лолӧс, ме ӧд абу бурджык аслам батьяс дорысь».

⁵ Сэсся водіс пу улӧ да унмовсис. Сэки андел инмӧдчис сы дінӧ да шуис: «Чеччы, сёй [да ю]».

⁶ Илля видзӧдліс да аддзис юр дорсьыс пӧжалӧм сӧчӧн да ва тыра гырнич. Илля сёйыштіс-юыштіс да бара водіс.

⁷ Господьлӧн андел мӧдысь локтіс, инмӧдчис Илля дінӧ да шуис: «Чеччы, сёй [да ю]. Тэнӧ кузь туй виччысьӧ».

⁸ Илля чеччис да сёйис-юис. Сёйӧм бӧртиыс ёнмыштіс да петіс туйӧ. Нелямын лун да нелямын вой сійӧ муніс Енлӧн Хорив керӧс дорӧдз.

⁹ Сэні сійӧ узьмӧдчис кырта горсйӧ. Войнас сылы вӧлі Господьсянь кыв. Господь шуис: «Илля, тэ мыйла тані?»

¹⁰ Илля вочавидзис: «Господьӧй, Тэ – Ен Саваоф. Ме век кесъялі тэныд став сьӧлӧмсянь. Израиль войтыр ӧтдортіс Тэнсьыд йитӧдтӧ, мый Тэ кӧрталін накӧд. Найӧ жуглісны Тэнсьыд висьпуктанінъястӧ, виалісны шыпуртӧн пророкъястӧ, ӧтнам ме ловйӧн коли. Ӧні корсьӧны вины тшӧтш менӧ».

¹¹ Господь шуис: «Пет да сувт керӧс вылӧ Господь водзӧ. Господь мунас тэ дінті». Кыпӧдчис ыджыд тӧвныр, сійӧ поткӧдліс керӧсъяс да жугліс изкыртаяс. Тӧвнырыс муніс Господь водзвылын, но Господь эз вӧв тӧвнырын. Тӧвныр бӧрти заводитчис му вӧрӧм, но Господь эз вӧв му вӧрӧмын.

¹² Му вӧрӧм бӧрти петіс би, но Господь эз вӧв би пытшкын. Би бӧрти пӧльтіс небыд тӧвру. [Господь вӧлі сэні.]

¹³ Тайӧс кылігӧн Илля тупкис чужӧмсӧ аслас кышанӧн, петіс кырта горсйысь да сувтіс кырта горсйӧ пыранін дорас. И кыліс гӧлӧс шы: «Илля, тэ мыйла тані?»

¹⁴ Илля вочавидзис: «Господьӧй, Тэ – Ен Саваоф. Ме век кесъялі тэныд став сьӧлӧмсянь. Израиль войтыр ӧтдортіс Тэнсьыд йитӧдтӧ, мый Тэ кӧрталін накӧд. Найӧ жуглісны Тэнсьыд висьпуктанінъястӧ, виалісны шыпуртӧн пророкъястӧ, ӧтнам ме ловйӧн коли. Ӧні корсьӧны вины тшӧтш менӧ».

¹⁵ Господь шуис Иллялы: «Мун Дамаскӧ овтӧминӧд сійӧ жӧ туйӧдыс, кыті локтін. Сэтчӧ воӧм бӧрын мавтыштӧмӧн пукты Азаилӧс арамейяслы ӧксыӧ.

¹⁶ А Израиль войтырлы мавтыштӧмӧн пукты ӧксыӧ Нимшилысь Еху писӧ. Пророкӧ ас пыддиыд мавтышт Авел-Мехолаысь Елисейӧс, Шафатлысь писӧ.

¹⁷ Азаиллӧн шыпуртысь пышйысьӧс виас Еху, а Ехулӧн шыпуртысь пышйысьӧс виас Елисей.

¹⁸ Израиль войтыр пӧвстысь Ме коля ловйӧн сизим сюрс мортӧс, кодъяс эз пидзӧсчанясьны Ваал водзӧ да эз окавны сійӧс».

Илля мавтыштӧ Елисейӧс пророкӧ

¹⁹ Илля петіс туйӧ. Мунігмозыс сійӧ аддзис Шафатлысь Елисей писӧ, коді вӧлі гӧрӧ. Елисей водзвылын восьлалісны дас кык гоз ӧш, ачыс сійӧ гӧрис дас кыкӧд гознас. Елисей дінті мунігӧн Илля шыбитіс сы вылӧ ассьыс кышансӧ.

²⁰ Елисей дзик пыр эновтіс ӧшъяссӧ, котӧртіс Илля бӧрся да шуис: «Лэдз меным ветлыны окыштны бать-мамӧс, сэсся ме муна тэ бӧрся». Илля шуис: «Ветлы, но бӧр лок. Эн вунӧд, мый ме тэныд вӧчи».

²¹ Елисей бӧр бергӧдчис видз-му вылас да начкис кык ӧшкӧс. Гӧрсӧ сотіс, а би вылас пражитіс ӧш яйсӧ да сетіс йӧзыслы. Найӧ сёйисны. Сэсся Елисей муніс Илля бӧрся да кутіс кесъявны сылы.