Ӧксыяслӧн 3 небӧг 18 - Коми Библия 2023

Илля бырӧдӧ Вааллысь пророкъясӧс

¹ Зэртӧм кадӧ коймӧд вонас Иллялы вӧлі Господьсянь кыв: «Мун Ахав дінӧ. Сэсся Ме ыста му вылас зэр».

² Илля муніс Ахав дінӧ. Самарияын сэки йӧзыс зэв ёна тшыгъялісны.

³ Ахав корис Авдийӧс, ӧксы керкаӧн веськӧдлысьӧс. Авдий поліс-вежавидзис Господьысь.

⁴ Кор Езавель виаліс Господьлысь пророкъясӧс, Авдий отсаліс сё пророклы дзебсьыны кырта горсъясӧ: быд горсйӧ дзебсисны ветымын мортӧн. Авдий вердіс-юкталіс найӧс сэні.

⁵ Ахав шуис Авдийлы: «Мун кытшовт да видзӧдав миян муысь став ва петанінсӧ да ю-шорсӧ. Гашкӧ, вӧвъяснымлы да мулъяснымлы турун сюрас, сэки миянлы оз ковмы вины пемӧсъяснымӧс».

⁶ Медым кытшовтны ставнас мусӧ, Ахав муніс ӧтарӧ, Авдий – мӧдарӧ.

⁷ Авдийлы туй вылас паныдасис Илля. Авдий тӧдіс сійӧс. Муӧдзыс копыртчӧмӧн Авдий шыасис: «Тэ-ӧ тайӧ, Илля, менам ыджыдӧй?»

⁸ «Ме, – вочавидзис Илля. – Мун да висьтав аслад ыджыдлы, мый ме тані».

⁹ Авдий воча шуис: «Мыйӧн нӧ ме, тэнад кесйӧг, мыжми тэ водзын? Тэ мӧдӧдан менӧ Ахав дінӧ, но сійӧ ӧд виас менӧ.

¹⁰ Ловъя Господь водзын, тэнад Ен водзын, шуа: менам ыджыдӧй мӧдӧдліс корсьны тэнӧ быд муӧ да быд войтыр пӧвстӧ. Ставныслы сійӧ тшӧктыліс кыв сетны, мый эз аддзывны тэнӧ.

¹¹ А тэ ӧні тшӧктан менӧ мунны да висьтавны ыджыдӧйлы, мый тэ тані.

¹² Ме кӧ ӧні муна тэ дінысь, Господьлӧн Лолыс нуас тэнӧ код тӧдас кытчӧ. И кор ме висьтала Ахавлы, мый тэ тані, а сійӧ оз аддзы тэнӧ, сэки виас менӧ. А ме, тэнад кесйӧг, том кадсянь ола Господьысь полӧмӧн.

¹³ Тэ ӧмӧй эн кывлы, менам ыджыдӧй, мый ме отсалі сё пророклы дзебсьыны, кор Езавель виаліс Господьлысь пророкъясӧс. Кык кырта горсйӧ ветымын мортӧн дзеби, верді-юкталі найӧс сэні.

¹⁴ А тэ ӧні тшӧктан менӧ мунны да висьтавны Ахав ыджыдӧйлы, мый тэ тані. Сійӧ ӧд виас менӧ!»

¹⁵ Илля вочавидзис: «Ловъя Господь Саваоф водзын, кодлы ме кесъяла, шуа: талун ме петкӧдча Ахавлы».

¹⁶ Авдий муніс Ахав дінӧ да висьталіс Илля йылысь. Ахав мӧдӧдчис Иллялы воча,

¹⁷ и кор паныдасис Иллякӧд, шуис сылы: «Тэ-ӧ тайӧ, Израильлы шогсӧ вайысьыс?»

¹⁸ Илля вочавидзис: «Ог ме вай шогсӧ Израильлы, а тэ да тэнад батьыдлӧн рӧдыс. Ті эновтінныд Господьлысь тшӧктӧмъяссӧ да кутінныд юрбитны Ваал идолъяслы.

¹⁹ Ӧні мӧдӧд йӧзтӧ, мед Кармил керӧсӧ чукӧртасны ме дінӧ став Израиль войтырӧс, тшӧтш Вааллысь нёльсё ветымын пророкӧс да Астарталысь нёльсё пророкӧс, кодъяс сёйӧны Езавельлӧн пызан сайын».

²⁰ Ахав мӧдӧдіс юӧр став Израиль войтырлы да чукӧртіс пророкъясӧс Кармил керӧсӧ.

²¹ Илля матыстчис войтырыс дінӧ да шуис: «Дыр-ӧ на ті кутанныд чотны кыкнан кокнаныд? Господь кӧ эм Ен, кывзысьӧй Сылысь, Ваал кӧ енмыс, сылысь кывзысьӧй». Войтырыс чӧв оліс.

²² Сэки Илля шуис войтырыслы: «Господьлӧн пророкъясысь ме ӧтнам коли, а Вааллӧн пророкъясыс – нёльсё ветымын морт. [Нӧшта Астарталӧн – нёльсё пророк.]

²³ Вайӧдӧй миянлы кык ӧшкӧс. Вааллӧн пророкъяс мед бӧръясны ӧтисӧ, начкасны-кераласны сійӧс да пуктасны пес вылӧ, но бисӧ мед оз ӧзтыны. Мӧд ӧшсӧ начка ме, тшӧтш пукта пес вылӧ, но бисӧ ог ӧзты».

²⁴ Вааллӧн пророкъяслы Илля шуис: «Ті шыасьӧй асланыд ен дінӧ, а ме шыася Господь [аслам Ен] дінӧ. Сійӧ енмыс, коді ыстас бисӧ, эм збыль Ен». Став войтырыс вочавидзис: «Бур. [Мед лоӧ тадз.]»

²⁵ Илля шуис Вааллӧн пророкъяслы: «Ті унджыкӧнӧсь, та вӧсна медводз ті бӧрйӧй ӧшсӧ да начкӧй сійӧс. Сэсся шыасьӧй асланыд ен дінӧ, но бисӧ энӧ ӧзтӧй».

²⁶ Найӧ босьтісны ӧшкӧс да начкисны сійӧс. Сэсся асывсяньыс луншӧрӧдзыс найӧ горзісны: «Ваал! Кыв миянӧс!» Найӧ весиг чеччалісны висьпуктанін гӧгӧр, но некод эз вочавидз.

²⁷ Луншӧр кадӧ Илля кутіс серавны на вылын: «Гораджыка горзӧй! Сійӧ ӧд ен! Гашкӧ, сійӧ мӧвпалӧ мый йылысь кӧ? Гашкӧ, мыйкӧ вӧчӧ ӧні? А колӧкӧ, кытчӧкӧ муніс? Гашкӧ, узьӧ да, и сійӧс колӧ садьмӧдны?»

²⁸ Пророкъяс нӧшта на гораджыка горзісны и, кыдзи век вӧчлісны, бытшйӧдлісны асьнысӧ пуртӧн да шыӧн, кытчӧдз эз ойдны вирнас.

²⁹ Луншӧр кадсянь рытъя вись ваян кадӧдз найӧ этшсьыс петмӧн горзісны. Но некод эз вочавидз. [Тишбиса Илля шуис Вааллӧн пророкъяслы: «Вешйӧй. Ӧні ме кута вись вайны». Мӧдъясыс ланьтӧмӧн вешйисны.]

³⁰ Илля корис Израиль войтырӧс матыстчыны ас дінас. Ставныс матыстчисны. Илля кутіс тэчны Господьлысь жуглӧм висьпуктанінсӧ.

³¹ Сійӧ босьтіс дас кык из – Яковсянь петӧм чужанкотыръяслӧн лыдыс серти. Яковлы коркӧ Господь шуис: «Тэнад нимыд лоӧ Израиль».

³² Тайӧ изъяссьыс Илля тэчис Господьлы висьпуктанін, гӧгӧрыс кодйис гуран, кытчӧ позьӧ вӧлі тӧрӧдны кык куд тыр шыдӧс.

³³ Висьпуктанін вылӧ пукталіс пес, начкис-кераліс ӧшкӧс да пуктіс пес вылӧ.

³⁴ Сэсся Илля шуис: «Тыртӧй ваӧн нёль ыджыд гырнич, кисьтӧй васӧ сотан вись вылас да пес вылас». [Тадзи и вӧчисны.] Сэсся тшӧктіс мӧдысь тадзикӧн вӧчны. Тадзи вӧчисны. Сэсся коймӧдысь на тшӧктіс васӧ кисьтны. И коймӧдысь тадзи вӧчисны.

³⁵ Ваыс кутіс ызбыльтны-визувтны висьпуктанінысь, и сы гӧгӧр кодйӧм гураныс тырис ваӧн.

³⁶ Рытъя вись ваян кадӧ Илля пророк матыстчис висьпуктанін дорӧ да [енэжас видзӧдӧмӧн гораа] шуис: «Господьӧй, Ӧвраамлӧн, Исааклӧн да Израильлӧн Ен! [Кыв менӧ, Господьӧй, кыв менӧ талун би пытшсянь!] Талун мед тӧдмаласны тайӧ йӧзыс, мый Тэ – Израильлӧн Ен, и мый ме – Тэнад кесйӧг. Найӧ мед аддзасны, мый ме ставсӧ вӧчи Тэнад тшӧктӧм серти.

³⁷ Вочавидз меным, Господьӧй! Вочавидз, медым тайӧ войтырыс тӧдмалас, мый Тэ, Господьӧй, эм Ен, и мый Тэ бергӧдан налысь сьӧлӧмсӧ Ас дінад».

³⁸ Сэки вылысянь сяркнитіс Господьлӧн биыс да ньылыштіс сотан висьсӧ, пессӧ, изъяссӧ, висьпуктанін дорысь мусӧ да кодйӧм гуранысь васӧ.

³⁹ Кор йӧзыс аддзисны тайӧс, кымынь уськӧдчисны муас да шуисны: «Господь эм Ен! Господь эм Ен!»

⁴⁰ Илля шуис войтырыслы: «Босьтӧй Вааллысь пророкъяссӧ, энӧ лэдзӧй некодлы пышйыны». Вааллысь пророкъяссӧ босьтісны. Сэсся Илля нуӧдіс найӧс Кишон ю дорӧ да сэні ставнысӧ виис.

Господь бара ыстӧ зэр

⁴¹ Илля шуис Ахавлы: «Мун сёйны-юны. Зэр шыыс кылӧ нин».

⁴² Ахав муніс сёйны-юны. А Илля кайис Кармил керӧсӧ, сувтіс пидзӧс вылас да юрсӧ пидзӧс костас сюйӧмӧн копыртчис муӧдзыс.

⁴³ Аслас кесйӧглы шуис: «Мун да видзӧдлы саридзланьыс». Мӧдыс ветліс, видзӧдліс да шуис: «Ме нинӧм эг аддзы». «Мун, бара ветлы», – шуис кесйӧгыслы Илля. Тадзи сизимысь тшӧктіс ветлыны.

⁴⁴ Сизимӧдысь ветлӧм бӧрас кесйӧгыс шуис: «Саридз весьтас кыпӧдчӧ ки пыдӧс пасьта ичӧтик кымӧр». Илля шуис: «Мун да висьтав Ахавлы, мед ӧдйӧджык доддялас вӧвъяссӧ тарантасас да мунас, медым зэрыс эз су сійӧс».

⁴⁵ Енэжыс пемдіс, тӧлыс вайис сьӧд кымӧръяс, кутіс сувтсӧн зэрны. Ахав [бӧрддзӧмӧн] сӧліс аслас тарантасӧ да рӧдтіс Изреельӧ.

⁴⁶ Господьлӧн вына киыс вӧлі Илля вылын. Коссӧ вӧнялӧмӧн сійӧ котӧртіс Ахав водзвылын Изреельӧдз.