Ӧксыяслӧн 3 небӧг 16 - Коми Библия 2023

¹ Хананилӧн Еху пилы вӧлі Ваас йылысь Господьсянь кыв:

² «Ме лэпті тэнӧ няйтысь да пукті ӧксыӧ Аслам Израиль войтырлы. Но тэ ветлін Еровамлӧн туйӧд да кежӧдін Менсьым Израиль войтырӧс мыжас. Мыж вӧчӧмнаныс найӧ скӧрмӧдісны Менӧ.

³ Таысь Ме бырӧда Ваасӧс да сылысь рӧдсӧ. Ме вӧча сылӧн рӧдкӧд сійӧ жӧ, мый вӧчи Неват Еровамлӧн рӧдкӧд.

⁴ Ваас рӧдысь коді кулас карын, сійӧс сёясны понъяс, а коді кулас видз-му вылын, сійӧс кокаласны лэбачьяс».

⁵ Ваас ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.

⁶ Ваас куліс да вуджис батьясыс дінӧ. Сійӧс дзебисны Тирза карӧ. Ваас бӧрти ӧксыӧ пуксис сылӧн Элай пиыс.

⁷ Но Еху пророк пыр, коді вӧлі Хананилӧн пи, Господьлӧн вӧлі шуӧма нин бырӧдны Ваасӧс да сылысь рӧдсӧ. Ӧд Ваас виис Еровамлысь рӧдсӧ, но ачыс Еровам рӧд моз вӧчис Господь водзын шогмытӧмсӧ да скӧрмӧдіс Сійӧс.

Израиль муын Элайлӧн ӧксыалӧм

⁸ Иудаса Аса ӧксылӧн кызь квайтӧд веськӧдлан воӧ Израиль муын ӧксыӧ пуксис Вааслӧн Элай пиыс. Кык во чӧж сійӧ юраліс Тирза карын.

⁹ Элай ӧксылӧн Зимри нима кесйӧгыс, коді веськӧдліс тарантаса джын тышкакотырӧн, гусьӧн кыпӧдчис ӧксылы паныд. Ӧтчыд Тирза карын, ӧксы керкаӧн веськӧдлысь Арс нима морт ордын, Элай ӧксы коддзытӧдзыс юис.

¹⁰ Сэки Зимри пырис да виис Элай ӧксыӧс. Тайӧ вӧлі иудаса Аса ӧксылӧн кызь сизимӧд веськӧдлан воӧ. Элай пыдди ӧксыӧ пуксис Зимри.

¹¹ Ӧксыӧ пуксьӧм бӧрын Зимри бырӧдіс Вааслысь гортсаяссӧ. Вааслӧн рӧдысь да ёртъяс пӧвстысь весиг ӧти айуловӧс эз коль ловйӧн.

¹² Зимри кушӧдз бырӧдіс Вааслысь рӧдсӧ. Тадзи иніс Ваас йылысь Господьлӧн шуӧмыс, мый Сійӧ висьталіс Еху пророк пыр.

¹³ Ваас да сылӧн Элай пиыс мыж вӧчисны да Израиль войтырӧс кежӧдісны мыжас. Идолъяслы юрбитӧмнас найӧ скӧрмӧдісны Господьӧс, Израильлысь Енсӧ.

¹⁴ Элай ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма израильса ӧксыяслӧн каднебӧгӧ.

Израиль муын Зимрилӧн ӧксыалӧм

¹⁵ Иудаса Аса ӧксылӧн кызь сизимӧд веськӧдлан воӧ Израиль муын ӧксыӧ пуксис Зимри. Сӧмын сизим лун чӧж сійӧ юраліс Тирза карын. Буретш сэки израильса тышкайӧз вӧлі кытшалӧны филистимса Гиббетон кар.

¹⁶ Кор израильса тышкайӧз тӧдмалісны, мый Зимри кыпӧдчӧма Элай ӧксылы паныд да виӧма сійӧс, сійӧ жӧ лунӧ Израиль войтырлы ӧксыӧ пуктісны Омриӧс, тышкайӧзӧн веськӧдлысьӧс.

¹⁷ Израильса тышкайӧзкӧд Омри эновтіс Гиббетон, муніс да кытшаліс Тирза кар.

¹⁸ Зимри кор аддзис, мый израильса тышкайӧз босьтісны карсӧ, пырис аслас ӧксы керкаӧ пыді жыръяс да ӧзтіс керкасӧ, ачыс сотчис. Тадзи сійӧ куліс

¹⁹ аслас мыж вӧсна. Ӧд сійӧ вӧчис Господь водзын шогмытӧмсӧ, ветліс Еровамлӧн туйӧд да сы моз вӧчис мыж. Аслас мыж вӧчӧмнас Еровам коркӧ кежӧдіс Израиль войтырӧс мыжас.

²⁰ Зимри ӧксыалӧм дырйи мукӧд лоӧмторъяс йылысь да ӧксылы паныд кыпӧдчӧмыс йылысь гижӧма израильса ӧксыяслӧн каднебӧгӧ.

²¹ Тайӧ лоӧмторъясыс бӧрын Израиль войтыр юксис кык пельӧ: ӧтияс кӧсйисны пуктыны ӧксыӧ Гинатлысь Тивни писӧ, а мӧдъяс – Омриӧс.

²² Омри дор сулалысьыс вӧлі унджык, та вӧсна найӧ вермисны Гинатлӧн Тивни пи дор сулалысьясӧс. Тивни куліс, а ӧксыӧ пуксис Омри.

Израиль муын Омрилӧн ӧксыалӧм

²³ Иудаса Аса ӧксылӧн комын ӧтиӧд веськӧдлан воӧ Израиль муын ӧксыӧ пуксис Омри. Ӧксыаліс сійӧ дас кык во, квайт восӧ юраліс Тирза карын.

²⁴ Кык эзысь талантысь Омри ньӧбис Шемерлысь Семерон керӧс да лэптіс сэні кар. Нимсӧ карыслы сетіс Самария, керӧс вузалысьлӧн ним серти.

²⁵ Омри вӧчис Господь водзын шогмытӧмсӧ. Сыӧдз вӧвлӧм ӧксыяс дорысь сійӧ ёна унджык на лёксӧ вӧчис.

²⁶ Омри ветліс Неват Еровамлӧн туйӧд, вӧчис сійӧ жӧ мыжъяссӧ, мыйӧн Еровам коркӧ кежӧдіс Израиль войтырӧс мыжас. Идолъяслы юрбитӧмнаныс найӧ скӧрмӧдісны Господьӧс, Израильлысь Енсӧ.

²⁷ Омри ӧксыалӧм дырйи мукӧд лоӧмторъяс йылысь, сылӧн уджъяс да вермӧмъяс йылысь гижӧма израильса ӧксыяслӧн каднебӧгӧ.

²⁸ Омри куліс да вуджис батьясыс дінӧ. Сійӧс дзебисны Самария карӧ. Омри бӧрти ӧксыӧ пуксис сылӧн Ахав пиыс.

Израиль муын Ахавлӧн ӧксыалӧм

²⁹ Иудаса Аса ӧксылӧн комын кӧкъямысӧд веськӧдлан воӧ Израиль муын ӧксыӧ пуксис Омрилӧн Ахав пиыс. Кызь кык во чӧж сійӧ юраліс Самария карын.

³⁰ Ахав вӧчис Господь водзын шогмытӧмсӧ ёна унджык на сыӧдз вӧвлӧм ӧксыяс дорысь.

³¹ Сійӧ вӧчис сійӧ жӧ мыжъяссӧ, мый вӧчліс Неватлӧн Еровам пиыс. Но тайӧ вӧлі этша на. Сійӧ босьтіс гӧтырӧ сидонса Этваал ӧксылысь Езавель нывсӧ да кутіс кесъявны-юрбитны Вааллы.

³² Сійӧ лэптіс Самария карын Вааллы юрбитанін да сувтӧдіс сэтчӧ висьпуктанін.

³³ Сійӧ сувтӧдіс юрбитан пуяс. Сыӧдз вӧвлӧм израильса ӧксыяс дорысь Ахав аслас уджъяснас медъёна скӧрмӧдіс Господьӧс, Израильлысь Енсӧ [та вӧсна сылӧн олӧмыс орис].

³⁴ Ахавлӧн юралігӧн вефильса Хиэл выльысь лэптіс Ерикон кар. Карлы подув пуктӧмысь сійӧ воштіс медводдза чужысь Авирам писӧ, а карса дзиръя сувтӧдӧмысь воштіс Сегув нима медічӧт писӧ. Тадзи иніс Господьлӧн шуӧмыс, мый Сійӧ висьталіс Навлӧн Исус пи пыр.