Ӧксыяслӧн 3 небӧг 14 - Коми Библия 2023

¹ Сійӧ кадас висьмис Еровамлӧн Авий пиыс.

² Еровам шуис гӧтырыслы: «Пасьтась сідзи, мед некод оз тӧд, мый тэ менам гӧтыр, да ветлы Силомӧ. Сэні олӧ Ахий нима пророк. Буретш сійӧ юӧртліс меным, мый ме лоа ӧксыӧн Израиль войтырлы.

³ Босьт аскӧдыд [Енлӧн мортлы] дас тупӧсь нянь, сӧчӧн, ма доз да мун сы дінӧ. Сійӧ висьталас, мый лоӧ миян пикӧд».

⁴ Еровамлӧн гӧтырыс тадзи и вӧчис. Муніс Силомӧ Ахий пророк ордӧ. Ахий вӧлі пӧрысь нин, и синнас сійӧ эз нин аддзы.

⁵ Господь шуис Ахийлы: «Ӧні тэ дінӧ локтас Еровамлӧн гӧтырыс, медым тӧдмавны пиыс йылысь, коді висьӧ. Ме сета тэныд, мый шуны аньыслы. Аньыс локтас мӧд паськӧмӧн, медым сійӧс эз тӧдны».

⁶ Пырысьлысь воськов шысӧ кылігӧн Ахий шуис: «Пыр, Еровамлӧн гӧтыр. Мыйла тэ локтін мӧд паськӧмӧн? Меным сетӧма висьтавны тэныд лёк юӧр.

⁷ Мун да висьтав Еровамлы, мый Господь, Израильлӧн Ен, тадзи висьталӧ: ”Ме бӧрйи тэнӧ войтыр пӧвстысь да пукті веськӧдлыны Менам Израиль войтырӧн.

⁸ Ме босьті Давид рӧдлысь юралӧмсӧ да сеті тэныд. Но тэ абу вӧлӧмыд Менам Давид кесйӧг кодь. Сійӧ оліс Менам тшӧктӧмъяс серти, кывзысис Менсьым став сьӧлӧмнас да вӧчис Ме водзын сӧмын шогманасӧ.

⁹ Тэ вӧчин лёксӧ унджык на дорысь, кодъяс вӧліны тэӧдз. Тэ сувтӧдалін аслыд мукӧд енъясӧс да бӧлбанъясӧс, медым Менӧ скӧрмӧдны. Тадзи тэ ӧтдортін Менӧ.

¹⁰ Та вӧсна Ме ыста ыджыд шог Еровам рӧд вылӧ. Ме бырӧда сылысь рӧдсӧ Израильысь, бырӧда став айуловсӧ ичӧтсянь ыджыдӧдз. Куйӧдӧс моз Ме шыбита сылысь рӧдсӧ.

¹¹ Еровам рӧдысь коді кулас карын, сійӧс сёясны понъяс, а коді кулас видз-му вылын, сійӧс кокаласны лэбачьяс”. Тадзи шуис Господь.

¹² Ӧні бӧр мун гортад. Карад воӧм мысти тэнад пиыд кулас.

¹³ Став Израиль войтыр кутас бӧрдны-шогсьыны сы вӧсна. Еровам рӧдысь сійӧс ӧтнассӧ дзебасны морт ногӧн, ӧд Еровам рӧдын сӧмын сы пытшкысь Господь, Израильлӧн Ен, аддзис бурсӧ.

¹⁴ Израиль войтырлы Господь пуктас мӧд ӧксыӧс, коді бырӧдас Еровамлысь рӧдсӧ. Сійӧ луныс воас на, но бырӧдӧмыс заводитчис нин.

¹⁵ Господь ёна дойдас Израильӧс, сійӧ лоӧ ваын легзьысь эжӧр кодь. Господь нетшыштас Израиль войтырӧс тайӧ бур му вывсьыс, мый сетіс налӧн батьяслы. Юрбитан пуяс сувтӧдӧмысь да тайӧн Господьӧс скӧрмӧдӧмысь Сійӧ разӧдас Израиль войтырӧс Ефрат ю сайӧ.

¹⁶ Еровамлӧн мыж вӧчӧмысь да Израиль войтырӧс мыжас кежӧдӧмысь Господь эновтас Израильӧс».

¹⁷ Еровамлӧн гӧтырыс бӧр муніс аслас Тирза карӧ. Гортас пыригӧн муртса на сійӧ воськовтіс тагӧс вомӧныс, пиыс куліс.

¹⁸ Писӧ дзебигӧн став Израиль войтыр бӧрдіс-шогсис сы вӧсна. Тадзи иніс Господьлӧн шуӧмыс, мый Сійӧ висьталіс Аслас кесйӧг, Ахий пророк, пыр.

¹⁹ Еровамлӧн мукӧд уджъяс йылысь, сылӧн тышъяс да ӧксыалӧм йылысь гижӧма израильса ӧксыяслӧн каднебӧгӧ.

²⁰ Еровам ӧксыаліс кызь кык во чӧж. Еровам куліс да вуджис батьясыс дінӧ. Сы бӧрти ӧксыӧ пуксис сылӧн Надав пиыс.

Иуда муын Ровоамлӧн ӧксыалӧм

²¹ Соломонлӧн Ровоам пиыс ӧксыаліс Иуда муын. Ӧксыӧ пуксигас Ровоамлы вӧлі нелямын ӧти арӧс. Дас сизим во чӧж сійӧ юраліс Ерусалим карын. Израильса чужанкотыръяслӧн каръясысь Господь бӧрйис тайӧ карсӧ, медым сэні вӧлі Сылӧн нимыс. Ровоамлӧн мамыс вӧлі аммон войтырысь Наама.

²² Иуда войтыр вӧчис Господь водзын шогмытӧмсӧ. Асланыс мыж вӧчӧмнас найӧ дӧзмӧдісны Господьӧс батьясныс дорысь ёнджыка на.

²³ Джуджыд мылькъяс вылын да пашкыр пуяс улын найӧ вӧчисны аслыныс юрбитанінъяс, сувтӧдісны юрбитан изъяс да юрбитан пуяс.

²⁴ Татшӧм юрбитанінъясын вӧліны кырсалысьяс. Иуда войтыр вӧчис быд зывӧксӧ сійӧ войтыръясыс моз, кодъясӧс Господь вӧтліс Израиль войтыр водзысь.

²⁵ Ровоам ӧксылӧн витӧд веськӧдлан воӧ египетса Шишак ӧксы аслас тышкайӧзкӧд уськӧдчис Ерусалим кар вылӧ.

²⁶ Сійӧ босьтіс Господьлӧн крамысь да ӧксылӧн керкаысь став озырлунсӧ [тшӧтш зарни сайӧдъяс, кодъясӧс Давид босьтліс цоваса Ададезер ӧксылӧн кесйӧгъяслысь да вайис Ерусалимӧ]. Босьтіс тшӧтш Соломонӧн вӧчӧдӧм зарни сайӧдъяссӧ.

²⁷ На пыдди Ровоам ӧксы вӧчӧдіс ыргӧн сайӧдъяс да сетіс найӧс веськӧдлысьяслы, кодъяс видзӧдісны ӧксы керкаӧ пыранін видзысьяс бӧрся.

²⁸ Кор ӧксы вӧлі мунӧ Господьлӧн крамӧ, ӧксыӧс видзысьяс босьтлісны аскӧдныс тайӧ сайӧдъяссӧ, а бӧрыннас бӧр пуктывлісны найӧс видзанінӧ.

²⁹ Ровоам ӧксыалӧм дырйи мукӧд лоӧмторъяс йылысь да сылӧн уджъясыс йылысь гижӧма иудаса ӧксыяслӧн каднебӧгӧ.

³⁰ Ровоам да Еровам костын пыр муніс тыш.

³¹ Сэсся Ровоам куліс да вуджис батьясыс дінӧ. Сійӧс дзебисны Давид карӧ батьясыскӧд орччӧн. Ровоамлӧн мамыс вӧлі аммон войтырысь Наама. Ровоам бӧрти ӧксыӧ пуксис сылӧн Авий пиыс.