Ӧксыяслӧн 3 небӧг 13 - Коми Библия 2023

Господь жугӧдӧ Вефильӧ сувтӧдӧм висьпуктанін

¹ Кор Еровам висьпуктанін вылын сотіс вись, Вефильӧ локтіс Иуда муысь Енлӧн морт, кодӧс мӧдӧдіс Господь.

² Сійӧ горӧдӧмӧн шуис висьпуктанінлы Господьлысь кывсӧ: «Висьпуктанін, висьпуктанін! Господь тадзи висьталӧ: ”Давид рӧдын чужас Иосей нима пи. Мылькъяс вылын кесъялысь попъясӧс сійӧ ваяс вись пыдди тэ вылын, сотас тэ вылын тшынӧдчысьяслысь лыяссӧ”».

³ Енлӧн морт юӧртіс, мый петкӧдлас индысьпас. Сійӧ шуис: «Господь висьталіс, мый тайӧ висьпуктаніныс киссяс, и сы вылысь пӧимыс разалас».

⁴ Кор Еровам ӧксы кыліс Енлӧн мортлысь вефильса висьпуктанін йылысь шуӧмсӧ, сійӧ висьпуктанінсянь индіс кинас Енлӧн морт вылӧ да горӧдіс: «Босьтӧй сійӧс!» Сэки Еровамлӧн нюжӧдӧм киыс косьмис, и сійӧ бӧрсӧ эз вермы кусыньтны кисӧ.

⁵ Висьпуктаніныс киссис, и сы вылысь пӧимыс разаліс. Тадзи иніс Господьлӧн кывйыс, мый Енлӧн морт юӧртіс.

⁶ Еровам ӧксы шыасис Енлӧн морт дінӧ: «Кевмысь ме вӧсна аслад Господь Енлы, медым Сійӧ бурсьӧлӧмтчас ме дінӧ да бурдӧдас менсьым киӧс». Енлӧн морт кевмысис Господьлы, и ӧксылӧн киыс бурдіс да пондіс важ мозыс куснясьны.

⁷ Сэсся ӧксы шуис Енлӧн мортлы: «Лок мекӧд, мунам менам гортӧ, ме тэнӧ верда-юктала, нӧшта тэныд козин сета».

⁸ Но Енлӧн морт шуис ӧксылы: «Тэ кӧ меным весиг ассьыд овмӧс джынтӧ сетан, ме ог мун тэкӧд. Сёйны-юны ме тані ог кут.

⁹ Ӧд Господь менӧ ӧлӧдіс, медым ме эг сёй нянь ни эг ю ва, и бӧрсӧ мед муні мӧд туйӧд».

¹⁰ И муніс Енлӧн морт Вефильысь мӧд туйӧд, а эз сійӧ туйӧдыс, кыті локтіс.

Ен мортлӧн кывзысьтӧмлун

¹¹ Вефильын оліс ӧти пӧрысь пророк. Сылӧн пияныс локтісны да висьталісны батьныслы ставсӧ, мый сійӧ лунӧ Вефильын вӧчис Енлӧн морт, и мый Енлӧн морт шуис ӧксылы.

¹² Батьыс юаліс пияныслысь: «Кутшӧм туйӧд сійӧ муніс?» Пияныс петкӧдлісны, кыті бӧрсӧ муніс Енлӧн морт, коді воліс Иуда муысь.

¹³ Сэки батьыс тшӧктіс пияныслы дасьтыны осёлӧс. Сылы вайӧдісны осёлӧс, и сійӧ пуксис осёл вылӧ

¹⁴ да муніс Енлӧн морт бӧрся. Сійӧ аддзис Енлысь мортсӧ, коді пукаліс тупу улын, да юаліс сылысь: «Тэ-ӧ Енлӧн мортыс, коді локтіс Иуда муысь?» «Ме», – вочавидзис мӧдыс.

¹⁵ «Мунам ме ордӧ сёйны», – шуис пророк.

¹⁶ Но Енлӧн морт воча шуис: «Ме ог вермы тэкӧд бӧр бергӧдчыны, тані ог вермы сёйны-юны тэкӧд.

¹⁷ Господь меным шуис, медым ме эг сёй нянь ни эг ю ва тані, и бӧрсӧ мед муні мӧд туйӧд».

¹⁸ Пророк шуис: «Ме тэ кодь жӧ пророк. Меным андел вайис Господьсянь кыв. Тшӧктіс вайӧдны тэнӧ ме ордӧ, медым тэ сёйин-юин». Но тайӧ вӧлі пӧръялӧм.

¹⁹ Енлӧн морт бӧр бергӧдчис пророккӧд да сёйис-юис сы ордын.

²⁰ Пызан саяс пукаліганыс пророклы вӧлі Господьсянь кыв.

²¹ Пророк шуис Енлӧн мортлы, коді локтіс Иуда муысь: «Господь тадзи висьталӧ. Тэ эн кывзысь Господьлысь, эн вӧч аслад Господь Енлӧн шуӧм серти,

²² а бӧр бергӧдчин татчӧ сёйны-юны. Господь ӧд шуліс тэныд, мед тэ эн сёй нянь ни эн ю ва тані. Та вӧсна тэнсьыд шойтӧ оз ло дзебӧма батьясыдлӧн дзебанінӧ».

²³ Сёйӧм-юӧм бӧрын пророк дасьтіс ассьыс осёлсӧ Енлӧн мортлы, кодӧс сійӧ бергӧдіс туй вывсьыс.

²⁴ Енлӧн морт петіс туйӧ. Туй вылас сы вылӧ уськӧдчис лев да косявліс сійӧс. Сылӧн шойыс куйліс туй вылын, а лев да осёл сулалісны орччӧн.

²⁵ Сэті мунысьяс кор аддзисны туй вылысь морт шой да сыкӧд орччӧн сулалысь левӧс, мунісны да висьталісны та йылысь сійӧ карас, кӧні оліс пӧрысь пророк.

²⁶ Тайӧс кылӧм бӧрын пророк, коді бергӧдіс Енлысь мортсӧ туй вывсьыс, шуис: «Тайӧ мортыс – Енлӧн морт, коді эз кывзысь Господьлысь. Господь сетіс сійӧс левлы, и лев косявліс сійӧс, кыдзи Господь висьталіс сылы».

²⁷ Пророк тшӧктіс пияныслы дасьтыны осёлӧс, и найӧ дасьтісны.

²⁸ Пророк муніс да аддзис туй вылысь Енлӧн мортлысь шойсӧ. Орччӧн сулалісны лев да осёл. Лев весиг абу сёйӧма мортлысь шойсӧ да абу косявлӧма осёлӧс.

²⁹ Пророк пуктіс осёл вылӧ Енлӧн мортлысь шойсӧ да вайис аслас карӧ, медым бӧрдны-шогсьыны сы вӧсна да дзебны сійӧс.

³⁰ Шойсӧ пуктіс аслас дзебанінӧ. А бӧрдысьяс шуалісны: «Курыд шог, вокӧй!»

³¹ Енлысь мортсӧ дзебӧм бӧрас пророк шуис пияныслы: «Кор ме кула, пуктӧй менӧ тайӧ жӧ дзебанінас, кӧні куйлӧ Енлӧн морт. Пуктӧй менсьым лыясӧс орччӧн сылӧн лыяскӧд.

³² Инас ставыс, мый Господьлӧн тшӧктӧм серти сійӧ шуис Вефильӧ сувтӧдӧм висьпуктанін йылысь да самарияса вись ваян мылькъяс вылын сулалысь юрбитанінъяс йылысь».

Еровамлысь рӧдсӧ бырӧдӧм

³³ Весиг став тайӧ лоӧмтор бӧртиыс Еровам эз бергӧдчы аслас лёк туй вылысь. Сійӧ водзӧ сувтӧдаліс войтыр пӧвстысь попъясӧс кесъявны вись ваян мылькъяс вылын. Коді кӧсйис лоны попӧн, сійӧс Еровам и индыліс.

³⁴ Тайӧ мыжыс вӧсна Еровамлысь рӧдсӧ вӧлі бырӧдӧма му вывсьыс.