Ӧксыяслӧн 3 небӧг 12 - Коми Библия 2023

Израиль му юксьӧ кык пельӧ

¹ Ровоам локтіс Сикемӧ, ӧд сэтчӧ чукӧртчис Израиль войтыр, медым пуктыны сійӧс ӧксыӧ.

² Та йылысь кывліс Неватлӧн Еровам пиыс. Соломон ӧксыысь пышйӧм бӧрын сійӧ оліс Египетын, а ӧні бӧр локтіс сэтысь.

³ Израильсаяс корисны Еровамӧс да мунісны сыкӧд Ровоам [ӧксы] дінӧ. Найӧ шуисны Ровоамлы:

⁴ «Тэнад батьыд пуктіс миян вылӧ сьӧкыд сийӧс, но тэ кокньӧд миянлысь сьӧкыд уджнымӧс да босьт миян вылысь сийӧссӧ, мый батьыд пуктіс миян вылӧ. Сэки ми кутам кесъявны тэныд».

⁵ Ровоам шуис налы: «Ӧні мунӧй, а коймӧд луннас бӧр локтӧй ме дінӧ». Войтырыс разӧдчис.

⁶ Ровоам ӧксы муніс сёрнитны израильса юрнуӧдысьяскӧд, кодъяс кесъявлісны Соломон батьыслы на. Сійӧ юаліс налысь: «Мый ті шуанныд? Мый меным вочавидзны тайӧ войтырыслы?»

⁷ Найӧ шуисны: «Тэ кӧ талун кутан кесъявны тайӧ войтырыслы, могмӧдан налысь корӧмсӧ да бурногӧн вочавидзан налы, найӧ став олӧм чӧжныс лоасны тэныд кесйӧгъясӧн».

⁸ Но Ровоам эз кывзы юрнуӧдысьяслысь туйдӧдӧмсӧ. Сійӧ сёрнитіс том йӧзкӧд, кодъяс быдмисны сыкӧд ӧтвыв и ӧні кесъялісны сылы.

⁹ Ровоам юаліс налысь: «Мый ті шуанныд? Мый меным вочавидзны тайӧ войтырыслы? Найӧ корӧны, мед ме кокньӧді налысь сийӧссӧ, мый менам батьӧй пуктіс на вылӧ».

¹⁰ Сыкӧд ӧтвыв быдмӧм том йӧз шуисны сылы: «Тайӧ войтырыс элясьӧ, мый тэнад батьыд пуктіс на вылӧ сьӧкыд сийӧс, да корӧны, мед тэ налысь сийӧссӧ вӧчин кокньыдджыкӧн. Но тэ шу налы: ”Менам чалльӧй кызджык батьлӧн лядьвей дорысь.

¹¹ Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на. Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн”».

¹² Коймӧд луннас Еровам став войтырыскӧд локтісны Ровоам ӧксы дінӧ, кыдзи сійӧ тшӧктыліс налы.

¹³ Ӧксы сёрнитіс накӧд чорыда. Сійӧ ӧтдортіс юрнуӧдысьяслысь туйдӧдӧмсӧ,

¹⁴ но том йӧзлӧн туйдӧдӧм серти шуис войтырыслы: «Менам батьӧй пуктіс тіян вылӧ сьӧкыд сийӧс, но ме вӧча сійӧс сьӧкыдджыкӧн на. Менам батьӧй нӧйтліс тіянӧс орсӧн, но ме кута нӧйтны тіянӧс кӧрт пома орсӧн».

¹⁵ Ӧксы эз кывзы войтырӧс, ӧд ставыс тайӧ вӧлі Господьсянь, медым збыльмис Господьлӧн кывйыс, мый Сійӧ висьталіс силомса Ахий пророк пыр Неватлӧн Еровам пилы.

¹⁶ Кор Израиль войтыр гӧгӧрвоис, мый ӧксы оз кывзы найӧс, сэки найӧ шуисны сылы: «Миянӧс нинӧм оз йит Давидкӧд. Миянлы нинӧм вӧчны Ессейлӧн пикӧд. Мунамӧй гортӧ, Израиль войтыр! Давидлӧн рӧдыс мед ачыс тӧждысяс ас вӧснаыс!» Сэсся израильсаяс разӧдчисны гортаныс.

¹⁷ Ровоам лои ӧксыӧн сӧмын Иуда каръясын олысь Израиль войтырлы.

¹⁸ Ӧтчыд Ровоам ӧксы мӧдӧдіс Израиль войтыр дінӧ Адорамӧс. Сійӧ веськӧдліс йӧзӧн, кодъяс уджалӧмнас мынтісны вот. Но израильсаяс изъялісны сійӧс кувтӧдзыс. Сэки Ровоам ӧксы тэрмасьӧмӧн пуксис тарантасӧ да пышйис Ерусалимӧ.

¹⁹ Сійӧ кадас Израиль торйӧдчис Давид рӧдысь, и тайӧ ӧнӧдз тадзи.

Израиль войтыр ӧксыӧ пуктӧ Еровамӧс

²⁰ Израиль войтыр тӧдмаліс, мый Еровам бӧр локтӧма [Египетысь]. Сэки найӧ чукӧртчисны, корисны Еровамӧс да пуктісны сійӧс ӧксыӧ Израильлы. Сӧмын Иуда [да Венямин] чужанкотыр кольччис Давид рӧдкӧд.

²¹ Ерусалимӧ локтӧм бӧрын Соломонлӧн Ровоам пиыс чукӧртіс Иуда да Венямин чужанкотырысь сё кӧкъямысдас сюрс медбур тышкамортӧс, мед петны тышӧ Израильлы паныд да бӧр босьтны аслас киӧ на вылын ӧксыалӧмсӧ.

²² Сэки Енлӧн морт Шемайлы вӧлі Енсянь кыв:

²³ «Висьтав Соломонлӧн Ровоам пилы, иудаса ӧксылы, тшӧтш Иуда да Венямин чужанкотырлы да накӧд олысь мукӧд израильсаяслы,

²⁴ мый Господь тадзи висьталӧ: энӧ петӧй тышӧ асланыд вокъяслы, Израиль пиянлы, паныд, а бӧр бергӧдчӧй гортаныд. Ӧд ставыс тайӧ вӧлі Месянь». Найӧ кывзысисны Господьлысь да бӧр бергӧдчисны гортаныс.

Еровам юрбитӧ бӧлбанъяслы

²⁵ Еровам дзоньталіс-зумыдмӧдіс Ефрем керӧсвыв муын Сикем кар да овмӧдчис сэтчӧ. Сэсянь мӧдӧдчис Пенуэл карӧ да дзоньталіс-зумыдмӧдіс сійӧс.

²⁶ Еровам мӧвпыштіс: «Израильын юралӧмыс вермас бӧр вуджны Давид рӧдлы.

²⁷ Кутас кӧ войтырыс вись вайӧм могысь ветлыны Ерусалимӧ Господьлӧн крамӧ, вермас сувтны аслас Ровоам ыджыдыс дор. Сэки найӧ виасны менӧ да бӧр бергӧдчасны иудаса Ровоам ӧксылӧн кипод улӧ».

²⁸ Туйдӧдысьяскӧд сёрнитчӧм бӧрын Еровам ӧксы вӧчис кык зарни ӧшкӧс. Сэсся шуис войтырыслы: «Тіянлы оз ков ветлыны Ерусалимӧ. Израиль, со тэнад енъясыд, кодъяс петкӧдісны тэнӧ Египетысь».

²⁹ Ӧти ӧшсӧ сійӧ сувтӧдіс Вефильӧ, а мӧдсӧ – Данӧ.

³⁰ Тайӧ кежӧдіс Израиль войтырӧс мыжас. Войтырыс [эновтіс Господьлысь крамсӧ,] кутіс юрбитны тайӧ енъяслы, ветліс весиг Данӧдз.

³¹ Еровам сувтӧдаліс мылькъяс вылын юрбитанінъяс да индіс войтыр пӧвстысь попъясӧс, кодъяс эз вӧвны Левий чужанкотырысь.

³² Сійӧ индіс, мый кӧкъямысӧд тӧлысьлӧн дас витӧд лунӧ лоӧ гаж, Иуда муын кодь пасъян гаж. Вефильӧ сувтӧдӧм висьпуктанін вылын Еровам вайис висьяс вӧчӧм ӧшъяслы да индіс попъясӧс, медым найӧ кесъялісны вись ваян мылькъяс вылын.

³³ Аслас индӧм лунӧ – кӧкъямысӧд тӧлысьлӧн дас витӧд лунӧ – Еровам дасьтіс израильсаяслы гаж. Вефильӧ сувтӧдӧм висьпуктанін вылын сійӧ вайис висьяс да тшынӧдчис.