Ӧксыяслӧн 3 небӧг 11 - Коми Библия 2023

Соломон кежӧ Енмысь

¹ Фараон нылысь ӧтдор Соломонлӧн вӧлі мукӧд войтыръяс пиысь босьтӧм уна гӧтыр, кодъясӧс сійӧ тшӧтш радейтіс. Найӧ вӧліны моав, аммон, эдом, сидон да хеттей

² войтыръясысь, кодъяс йылысь Господь шуліс Израиль войтырлы: «Энӧ рӧдвужасьӧй накӧд, медым найӧ эз кежӧдны тіянӧс асланыс енъяс дорӧ». Но Соломонлы мусаӧсь вӧліны тайӧ аньясыс.

³ Сылӧн вӧлі сизимсё гӧтыр да куимсё кесйӧг-гӧтыр. Тайӧ аньясыс кежӧдісны Соломонлысь сьӧлӧмсӧ

⁴ асланыс енъяс дорӧ. Пӧрысьладорыс Соломонлӧн сьӧлӧмыс эз вӧв йитчӧма аслас Господь Енкӧд сідзи, кыдзи вӧлі Давид батьыслӧн.

⁵ Соломон кутіс юрбитны сидонсаяслӧн Астарта енлы да аммон войтырлӧн зывӧк Милком идоллы.

⁶ Соломон вӧчис Господь водзын шогмытӧмсӧ. Сійӧ эз тырвыйӧ кывзысь Господьлысь, кыдзи кывзысис сылӧн Давид батьыс.

⁷ Ерусалимсянь асыввылын сулалысь керӧс вылын Соломон вӧчис моавсаяслӧн зывӧк Кемош идоллы да аммон войтырлӧн зывӧк Молок идоллы юрбитанінъяс.

⁸ Татшӧм юрбитанінъяссӧ сійӧ вӧчис тшӧтш мукӧд войтыръяс пиысь босьтӧм гӧтыръясыслы, кодъяс сэні тшынӧдчисны да вись вайисны асланыс енъяслы.

⁹ Господь ёна скӧрмис Соломон вылӧ, мыйла сійӧ кежис аслас Господьысь, Израильлӧн Енмысь, коді кыкысь петкӧдчыліс сылы

¹⁰ да ӧлӧдліс, мед сійӧ эз юрбит мукӧд енъяслы. Но Соломон эз вӧч, мый Господь [Ен] тшӧктіс сылы.

¹¹ Та вӧсна Господь шуис Соломонлы: «Татшӧм оласногсьыд да сыысь, мый тэ торкин Менсьым йитӧдӧс да эн ов Менам тшӧктӧмъяс серти, мый Ме сеті тэныд, Ме босьта тэнсьыд юралӧмтӧ да сета тэнад кесйӧглы.

¹² Но Давид батьыд вӧсна Ме ог вӧч тайӧс тэнад олан лунъяс дырйи. Ме нетшышта юралӧмсӧ тэнад пиыдлӧн киысь,

¹³ но ог ставнас. Ерусалим кар вӧсна, мый Ме бӧрйи, да Аслам Давид кесйӧгӧй вӧсна Ме коля пиыдлы ӧти чужанкотыр».

Соломонлы паныд кыпӧдчысьяс

¹⁴ Соломонлы паныд Господь кыпӧдіс эдомса ӧксы рӧдысь Хадад нима мортӧс.

¹⁵ Кор Давид тышкасис Эдомын, сылӧн тышкайӧзӧн веськӧдлысь Йоав муніс дзебны виӧмаясӧс. Та дырйи Йоав виис Эдомысь став айуловсӧ.

¹⁶ Квайт тӧлысь чӧж израильса тышкайӧз вӧліны Эдомын да виалісны сэтысь став айуловсӧ.

¹⁷ Но Хадад да батьыслӧн ӧткымын эдомса кесйӧг пышйисны Египетӧ. Хадад сэки вӧлі ичӧт зонка на.

¹⁸ Мадиан му эновтӧм бӧрын найӧ воисны Паранӧ. Сэтысь босьтісны аскӧдныс сэтчӧс олысьяссӧ да мунісны Египетӧ фараон, египетса ӧксы, дінӧ. [Хадад пырис фараон дінӧ.] Фараон сетіс Хададлы керка, му да сёян-юан.

¹⁹ Фараонлы сьӧлӧм вылас воис Хадад. Сійӧ сетіс Хадад сайӧ аслас Тахпенес гӧтырлысь, ӧксы-аньлысь, чойсӧ.

²⁰ Тахпенеслӧн чойыс чужтіс Хададлы Генуват нима пиӧс. Тахпенес быдтіс чойыслысь писӧ фараон керкаын. Сэні Генуват оліс фараон пиянкӧд ӧтлаын.

²¹ Кор Хадад тӧдмаліс, мый Давид да сылӧн тышкайӧзӧн веськӧдлысь Йоав абу нин ловъяӧсь, шуис фараонлы: «Лэдз менӧ бӧр мунны аслам муӧ».

²² Фараон юаліс: «Тэныд ӧмӧй мыйкӧ оз тырмы ме ордын? Мыйла тэ кӧсъян мунны аслад муӧ?» Хадад вочавидзис: «Тырмӧ. Но кора, лэдз менӧ». [И муніс Хадад аслас муӧ.]

²³ Соломонлы паныд Енмыс нӧшта кыпӧдіс Элиадлысь Разон писӧ, коді вӧлі пышйӧма аслас ыджыдысь, цоваса Ададезер ӧксыысь.

²⁴ Кор Давид пасьвартіс Ададезерӧс, Разон чукӧртіс йӧзӧс да лои налӧн веськӧдлысьӧн. Найӧ мунісны Дамаскӧ, овмӧдчисны сэтчӧ да босьтісны тайӧ карсӧ асланыс кипод улӧ.

²⁵ Соломонлӧн олан лунъяс чӧж Разон, арамейяслӧн ӧксы, эз дугдыв Израильлы паныд кыпӧдчыны. Хадад моз Разон уна лёк вӧчис Израильлы.

Енлӧн кӧсйысьӧм Еровамлы

²⁶ Соломон ӧксылы паныд кыпӧдчис Неватлӧн Еровам пиыс, коді кесъяліс сы дінын. Еровам вӧлі Цереда карысь Ефрем чужанкотырысь. Дӧва мамсӧ шуисны Церуя.

²⁷ Со кыдзи Еровам кыпӧдчис Соломонлы паныд. Кор Соломон вӧлі лэптӧ Милло да дзоньталӧ Давид батьыслысь кар стенъяссӧ,

²⁸ сылы синмас шыбитчис вына том морт – тайӧ вӧлі Еровам. Соломон аддзис, мый сійӧ киподтуя морт и пуктіс сійӧс веськӧдлыны Ӧсип рӧдысь уджалысьясӧн.

²⁹ Ӧтчыд Ерусалимысь петігӧн Еровамлы туй вылас паныдасис Силомысь Ахий нима пророк. Пророк вылын вӧлі выль кышан. Найӧ вӧліны ӧтнанысӧсь.

³⁰ Ахий пӧрччис ас вывсьыс выль кышансӧ, косяліс дас кык пельӧ

³¹ да шуис Еровамлы: «Босьт аслыд дас юкӧнсӧ. Господь, Израильлӧн Ен, тадзи висьталӧ: ”Ме босьта Соломон киысь юралӧмсӧ да сета тэныд дас чужанкотыр.

³² Ӧти чужанкотыр Ме коля Соломонлы Давид батьыс вӧсна да Ерусалим кар вӧсна, мый Ме бӧрйи Израиль чужанкотыръяслӧн став карыс пӧвстысь.

³³ Ме вӧча тадзи, ӧд Израиль войтыр эновтіс Менӧ да кутіс юрбитны сидонсаяслӧн Астарта енлы, моавсаяслӧн Кемош енлы да аммон войтырлӧн Милком енлы. Найӧ оз ветлыны Менам туйӧд, оз вӧчны Ме водзын шогманасӧ, оз овны Менам индӧд-тшӧктӧмъяс серти, оз овны Соломонлӧн Давид батьыс моз.

³⁴ Ме ог босьт Соломонлысь юралӧмсӧ, ӧд пукті сійӧс юравны олӧм помӧдзыс. Тадзи вӧча Аслам Давид кесйӧгӧй вӧсна, кодӧс Ме бӧрйи да коді оліс Менам индӧд-тшӧктӧмъяс серти.

³⁵ Ме босьта юралӧмсӧ Соломон пиыслӧн киысь да сета тэныд дас чужанкотыр.

³⁶ Соломонлӧн пиыслы коля ӧти чужанкотыр, медым Менам Давид кесйӧгсянь чужысь юралас нэмъяс чӧж Ме водзын Ерусалим карын, мый Ме бӧрйи Аслым, медым сэні вӧлі Менам нимӧй.

³⁷ Ме бӧрйи тэнӧ, Еровам, медым тэнад кипод улын вӧлі ставыс, мый тэ кӧсъян. Тэ лоан Израиль войтырлы ӧксыӧн.

³⁸ Тэ кӧ пондан кывзысьны Менсьым, ветлыны Менам туйясӧд, вӧчны Ме водзын шогманасӧ да овны Менам индӧд-тшӧктӧмъяс серти, кыдзи оліс Менам Давид кесйӧгӧй, Ме лоа тэкӧд. Давидлысь рӧдсӧ моз Ме вӧча зумыдӧн тэнсьыд рӧдтӧ. Ме сета тэныд Израильӧс.

³⁹ Соломонлӧн мыжъясыс вӧсна Ме янӧда Давидлысь рӧдсӧ, но ог пыр кежлӧ”».

⁴⁰ Соломон корсис вины Еровамӧс, но мӧдыс пышйис Египетӧ Шишак ӧксы дінӧ, и сэні оліс Соломонлӧн кувтӧдз.

Соломонлӧн кулӧм

⁴¹ Соломон ӧксыалӧм дырйи мукӧд лоӧмторъяс йылысь, сылӧн уджъяс да мывкыдлун йылысь гижӧма ”Соломонлӧн уджъяс” небӧгӧ.

⁴² Нелямын во чӧж Соломон ӧксыаліс Ерусалим карын, веськӧдліс став Израиль войтырӧн.

⁴³ Сэсся Соломон куліс да вуджис батьясыс дінӧ. Сійӧс дзебисны Давид батьыслӧн карӧ. Соломон бӧрти ӧксыӧ пуксис сылӧн Ровоам пиыс.