Ӧксыяслӧн 3 небӧг 10 - Коми Библия 2023

Соломон да саваса ӧксы-ань

¹ Саваса ӧксы-ань кыліс, мый Соломонлӧн нималӧмыс вайӧ ошкӧм Господьлы, да петіс туйӧ, медым нӧдкывъясӧн тӧдмавны Соломонлысь мывкыдлунсӧ.

² Сійӧ локтіс Ерусалимӧ зэв уна йӧзкӧд. Верблюдъяс вылын найӧ вайисны зэв уна зарни, дона изъяс да чӧскыд ӧвтанторъяс. Ӧксы-ань аддзысис Соломонкӧд. Сійӧ сёрнитіс Соломонкӧд быдтор йылысь, мый кӧсйис тӧдны.

³ Соломон вочавидзис ӧксы-аньлӧн став юалӧмыс вылӧ. Эз вӧв сэтшӧмтор, мый вылӧ эськӧ сійӧ эз вермы вочавидзны.

⁴ Саваса ӧксы-ань гӧгӧрвоис, мый Соломон зэв мывкыд морт. Сійӧ аддзыліс керкасӧ, мый Соломон лэптіс,

⁵ аддзыліс, кутшӧм озыр Соломонлӧн пызаныс, кыдзи кесъялӧны, олӧны да пасьтасьӧны сылӧн йӧзыс, кесйӧгъясыс да вина кисьталысьясыс. Аддзыліс тшӧтш пемӧсъясӧс, кодъясӧс Соломон вайис сотан вись пыдди Господьлӧн крамын. Ёна шензьӧмӧн ӧксы-ань

⁶ шуис Соломон ӧксылы: «Ставыс, мый ме кывлі ас муын тэнад уджъясыд да мывкыдлуныд йылысь, збыль.

⁷ Сэки ме эг эскы, а ӧні эска, ӧд аслам синмӧн ставсӧ аддзылі. Меным, вӧлӧмкӧ, сӧмын мыйтакӧ висьтавлӧмаӧсь тэнад мывкыдлуныд йылысь. Тэнад мывкыдлуныд да озырлуныд ёна унджык на менам кывлӧм дорысь.

⁸ Шудаӧсь тэнад йӧзыд да тэнад кесйӧгъясыд, кодъяс век тэкӧд орччӧнӧсь да кылӧны тэнсьыд мывкыд сёрнитӧ.

⁹ Ошкӧм Господьлы, тэнад Енлы! Аслас кӧсйӧм серти Сійӧ пуксьӧдіс тэнӧ Израильлӧн юралан пуклӧсӧ. Господь дугдывтӧг радейтӧ Израиль войтырӧс, та вӧсна пуктіс тэнӧ ӧксыӧ, медым тэ юралін да мыждін веськыда».

¹⁰ Ӧксы-ань козьналіс Соломон ӧксылы сё кызь талант зарни, дона изъяс да унасьыс-уна чӧскыд ӧвтантор. Та мында ӧвтанторйыс, мый саваса ӧксы-ань козьналіс Соломон ӧксылы, Израильын эз на вӧвлы.

¹¹ Хирамлӧн пыжъясӧн, мыйӧн ваявлісны Офирысь зарни, вайисны сэтысь Соломонлы тшӧтш зэв уна гӧрд пу да дона из.

¹² Гӧрд пуысь ӧксы тшӧктіс вӧчны Господьлӧн крамӧ да аслас ӧксы керкаӧ поскӧд каян кутчысянін, сьылысьяслы гусли да арфа. Та мында гӧрд пусӧ таӧдз и та бӧрти эз вайлыны.

¹³ Козинъяс кындзи Соломон ӧксы сетіс саваса ӧксы-аньлы ставсӧ, мый сійӧ корис да кӧсйис. Сэсся ӧксы-ань аслас йӧзкӧд бӧр муніс аслас муӧ.

Соломонлӧн озырлун

¹⁴ Быд во Соломонлы вайлісны квайтсё квайтымын квайт талант зарни.

¹⁵ Таысь ӧтдор вузасьысьяс, ӧксыув муясын юралысьяс да аравияса ӧксыяс мынтылісны сылы вот.

¹⁶ Дорӧм зарниысь Соломон ӧксы вӧчӧдіс кыксё ыджыд сайӧд, быд сайӧд вылӧ муніс квайтсё сикель зарни.

¹⁷ Нӧшта вӧчӧдіс куимсё ичӧтджык сайӧд, быд сайӧд вылӧ муніс куим мина дорӧм зарни. Сайӧдъяссӧ ӧксы пуктіс ливанса пуысь вӧчӧм керкаӧ.

¹⁸ Слӧн лыысь ӧксы вӧчӧдіс ыджыд юралан пуклӧс, сійӧс эжисны весалӧм зарниӧн.

¹⁹ Юралан пуклӧс бердас йитісны квайт тшупӧда сод. Пуклӧс мышкыс вӧлі гӧгрӧс. Пуклӧс ӧтар-мӧдарладорас вӧчисны гырддзаув, а быд гырддзаув дорӧ вӧчисны левӧс.

²⁰ Нӧшта вӧчисны дас кык левӧс, кодъяс сулалісны квайт тшупӧд вылын ӧтар-мӧдар бокас. Татшӧм пуклӧсыс эз вӧв сэсся некутшӧм муын.

²¹ Соломон ӧксылӧн став юан дозйыс вӧлі зарниысь, а ливанса пуысь вӧчӧм керкаын став дозмук-кӧлуйыс вӧлі весалӧм зарниысь. Соломон веськӧдлан кадӧ эзысьсӧ эз вылӧ донъявны, та вӧсна эзысьысь вӧчӧмторйыс эз вӧв.

²² Хирамлӧн корабльясысь ӧтдор саридз вылын Соломон ӧксылӧн вӧліны тшӧтш фарсисса корабльяс. Куим во пытшкас ӧтчыдысь фарсисса корабльяс вайлісны зарни-эзысь, слӧн лы, ӧблезянаясӧс да павлинъясӧс.

²³ Мувывса став ӧксыыс дорысь Соломон вӧлі медся озыр да медся мывкыд.

²⁴ Мувывса став йӧзыс зілисны аддзывны Соломонӧс да кывзыны сійӧс, ӧд сылӧн вӧлі Енсянь мывкыдлун.

²⁵ Соломон дінӧ волысьяс вайлісны аскӧдныс козинъяс: эзысь-зарниысь вӧчӧм дозмук-кӧлуй, паськӧм, шыпуртъяс, чӧскыд ӧвтанторъяс, вӧвъясӧс да мулъясӧс. Тадзи вӧлі быд во.

²⁶ Соломон лӧсьӧдіс аслыс тарантаса вӧвъясӧс: тарантас лыдыс вӧлі сюрс нёльсё, а вӧвъяслӧн лыдыс – дас кык сюрс. Сійӧ видзис найӧс тарантаса тышкайӧзлы торйӧдӧм каръясын да аслас Ерусалим карын. [Ефрат юсянь Филистим муӧдз да Египетӧдз став ӧксыыс вӧліны Соломон кипод улынӧсь.]

²⁷ Соломон ӧксы дырйи Ерусалимын эзысьыс вӧлі из мында, а сус пуыс вӧлі сы мында, мыйта вӧлі керӧсбердса муын быдмысь инжир пуыс.

²⁸ Вӧвъяссӧ Соломонлы вайлісны Египетысь да Куваысь. Найӧс ньӧблісны ӧксылӧн вузасьысьяс.

²⁹ Египетысь вайӧм тарантасыс сулаліс квайтсё сикель эзысь, а вӧлыс – сё ветымын. Соломон ӧксылӧн вузасьысьяс ставсӧ тайӧс вайлісны тшӧтш хеттей войтырлӧн ӧксыяслы да арамейяслӧн ӧксыяслы.