Ӧксыяслӧн 2 небӧг 9 - Коми Библия 2023

Давид бур вӧчӧ Мепибошетлы

¹ Давид юаліс: «Колис-ӧ кодкӧ ловйӧн Саул рӧдысь? Ионафан вӧсна ме кӧсъя лоны бур сьӧлӧма на дінӧ».

² Саул керкаын вӧлі Сивей нима кесйӧг. Сійӧс вайӧдісны Давид дінӧ. Ӧксы юаліс: «Сивей-ӧ тэ?» Мӧдыс шуис: «Дзик сідзи. Ме – тэнад кесйӧг».

³ Ӧксы юаліс: «Колис-ӧ кодкӧ ловйӧн Саул рӧдысь? Енмыс моз ме кӧсъя лоны бур сьӧлӧма на дінӧ». Сивей шуис: «Ионафанлӧн чотысь пиыс ловъя».

⁴ «Кӧні сійӧ?» – юаліс ӧксы. Сивей вочавидзис: «Ло-Деварын, Аммиэллӧн Макир пи ордын».

⁵ Давид ӧксы ыстіс сэтчӧ йӧзӧс да тшӧктіс вайӧдны Ионафанлысь писӧ.

⁶ Саул Ионафанлӧн Мепибошет пиыс локтіс Давид дінӧ да муӧдзыс копыртчис сылы. «Мепибошет!» – шыасис Давид сы дінӧ. Мӧдыс вочавидзис: «Ме – тэнад кесйӧг».

⁷ Давид шуис: «Эн пов. Тэнад Ионафан батьыд вӧсна ме лоа бур сьӧлӧма тэ дінӧ. Ме тэныд бӧр сета Саул пӧльыдлысь видз-мусӧ. А ачыд тэ кутан сёйны-юны менам пызан сайын».

⁸ Мепибошет копыртчӧмӧн шуис: «Коді ме сэтшӧмыс, мый тэ тӧждысян аслад кесйӧг вӧсна, татшӧм пон шой вӧсна?»

⁹ Сэсся ӧксы корис Сивейӧс, Сауллысь кесйӧгсӧ, да шуис сылы: «Ставыс, мый вӧлі Сауллӧн да рӧдвужыслӧн, ме сета тэнад ыджыдыдлӧн Мепибошет пилы.

¹⁰ Аслад пиянкӧд да аслад кесйӧгъяскӧд вӧдит сылысь видз-мусӧ. Мувыв быдтассӧ сет аслад ыджыдыдлӧн пилы, медым сылӧн керкаас пыр вӧлі сёян-юан. Ачыс Мепибошет мед пыр сёяс-юас менам пызан сайын». Сивейлӧн вӧлі дас вит пиян да кызь кесйӧг.

¹¹ Сивей воча шуис ӧксылы: «Ӧксыӧй-ыджыдӧй, ставсӧ, мый тэ тшӧктін, ме вӧча». Сійӧ кадсяньыс Мепибошет кутіс сёйны Давидкӧд ӧти пызан сайын ӧксылӧн пияныс моз.

¹² Мепибошетлӧн вӧлі Мика нима ичӧт пи. Сивей керкаын олысьяс ставныс кесъялісны Мепибошетлы.

¹³ Мепибошет сёйис-юис ӧксы ордын, та вӧсна сійӧ оліс Ерусалимын. Мепибошет чотіс кыкнан кокнас.