Ӧксыяслӧн 2 небӧг 7 - Коми Библия 2023

Давидлы Енлӧн кӧсйысьӧм

¹ Давид ӧксы оліс аслас ыджыд керкаын. Господь сетіс сылы лӧнь кад, мездіс сійӧс кытшалысь вӧрӧгъясысь.

² Ӧтчыд ӧксы шуис Нафан пророклы: «Кывзы, ме ачым ола сус пуысь вӧчӧм керкаын, а Енлӧн кудйыс сулалӧ чомйын».

³ Нафан шуис ӧксылы: «Вӧч, мый тэнад сьӧлӧмыд висьталӧ. Господь тэкӧд».

⁴ Но войнас Нафанлы вӧлі Господьсянь кыв:

⁵ «Мун да висьтав Менам Давид кесйӧглы, мый шуӧ Господь. Тэ он лэпты Меным керка, мед Ме олі сэні.

⁶ Израиль войтырӧс Египетысь петкӧдӧмсянь да ӧнӧдз Ме эг овлы керкаын. Ӧтиласянь мӧдлаӧ ветлігӧн Ме олі вежа чомйын.

⁷ Израиль войтыркӧд ветлігъясӧ Ме эг тшӧктывлы израильса веськӧдлысьяслы – Менсьым Израиль войтырӧс видзысьяслы – лэптыны Меным сус пуысь керка.

⁸ Висьтав Менам Давид кесйӧглы, мый шуӧ Господь Саваоф. Ме босьті тэнӧ ыж йирсянінысь, кӧні тэ видзин ыжъясӧс, да пукті ӧксыӧ Аслам Израиль войтырлы.

⁹ Ме вӧлі тэкӧд быдлаын, кытчӧ тэ ветлін. Ме бырӧді тэ водзысь вӧрӧгтӧ. Ӧні Ме нимӧда тэнӧ, кыпӧда тэнӧ мувывса нималана йӧзысь вылӧджык на.

¹⁰ Ме торйӧда Аслам Израиль войтырлы му да вужйӧда найӧс сэтчӧ. Найӧ лӧня да повтӧг кутасны овны асланыс муын. Лёк вӧчысьяс оз кутны дзескӧдны найӧс воддза мозыс,

¹¹ кыдзи вӧлі сэки, кор Ме пукті ёрдысьясӧс веськӧдлыны Аслам Израиль войтырӧн. Ме сета тэныд лӧнь олӧм, мезда тэнӧ став вӧрӧгсьыд. Ме, Господь, кӧсйыся тэныд, мый зумыдмӧда тэнсьыд рӧдтӧ.

¹² Кор помасясны тэнад олан лунъясыд, и тэ кутан куйлыны аслад батьяс дінын, сэки Ме пукта ӧксыӧ тэсянь чужысьӧс да зумыдмӧда сылысь юралӧмсӧ.

¹³ Сійӧ лэптас Меным керка, и Ме зумыдмӧда сылысь юралӧмсӧ нэмъяс кежлӧ.

¹⁴ Ме лоа сылы батьӧн, а сійӧ – Меным пиӧн. Сійӧ кӧ мыжмас, Ме чорыда чирышта сійӧс, кыдзи бать чирыштӧ ассьыс писӧ.

¹⁵ Но Ассьым буралӧмӧс ог босьт сы вылысь, кыдзи босьті Саул вылысь. Ме вешті сійӧс ыджыдалӧмсьыс, кор пукті тэнӧ ӧксыӧ.

¹⁶ Тэнад рӧдыд да ӧксыалӧмыд пыр кежлӧ лоӧ Ме водзын зумыд. Тэнад юралан пуклӧсыд кутас сулавны нэмъяс чӧж».

¹⁷ Став тайӧ кывъяссӧ да Енсянь восьтӧмсӧ Нафан висьталіс Давидлы.

Давидлӧн кевмысьӧм

¹⁸ Давид ӧксы муніс вежаинӧ да пондіс кевмысьны Господьлы: «Господьӧй Ыджыдӧй! Коді ме да менам рӧдӧй, мый Тэ татшӧм вылӧ лэптін менӧ!

¹⁹ Но тайӧ, вӧлӧмкӧ, Тэнад абу на ставыс, Господьӧй Ыджыдӧй! Тэ нӧшта висьталін, мый виччысьӧ Тэнад кесйӧглысь рӧдсӧ. Господьӧй Ыджыдӧй, тадзи Тэ вӧчан морткӧд.

²⁰ Мый ме верма нӧшта шунысӧ? Тэ тӧдан менӧ, Ассьыд кесйӧгтӧ, Господьӧй Ыджыдӧй.

²¹ Аслад шуӧмыд да кӧсйӧмыд серти Тэ дасьтін тайӧ ыджыдторсӧ да восьтін сійӧс Аслад кесйӧглы.

²² Господьӧй Ыджыдӧй, Тэ – ыджыд Ен! Тэ кодь мӧдыс абу! Тэысь кындзи мӧд Енмыс абу! Тэ йылысь висьталӧ ставыс, мый ми кывлім.

²³ Енмӧй, сюрас-ӧ Тэнад Израиль войтыр кодь мӧдыс? Му вылас олысь войтыръясысь сӧмын на дінӧ Тэ локтін. Локтін, медым мездыны найӧс да вӧчны Аслад войтырӧн, ыдждӧдлыны Ассьыд нимтӧ, вӧчны налӧн синъяс водзын ыджыд да повзьӧдана уджъяс. Тэ мездін Ассьыд войтыртӧ Египетысь, вӧтлін на водзысь мукӧд войтыръясӧс да налысь енъяссӧ.

²⁴ Тэ вӧчин Израиль войтырӧс Аслад войтырӧн пыр кежлӧ. И Тэ, Господьӧй, лоин налӧн Енмӧн.

²⁵ Ӧні, Господьӧй Енмӧй, пыр кежлӧ вынсьӧд да збыльмӧд Ассьыд кывъястӧ, мый Тэ шуин ме йылысь да менам рӧд йылысь.

²⁶ Мед лоӧ ошкӧма Тэнсьыд нимтӧ нэмъяс чӧж! Мед шуасны: ”Господь Саваоф – Израильлӧн Ен”. Тэнад Давид кесйӧглӧн рӧдыс мед вӧрзьывтӧг сулалас Тэнад чужӧмбан водзын.

²⁷ Тэ, Господь Саваоф, Израильлӧн Ен, восьтін меным, Аслад кесйӧглы, мый зумыдмӧдан менсьым рӧдӧс. Та вӧсна ме повтӧг шыаси Тэ дінӧ аслам кевмысьӧмӧн.

²⁸ Господьӧй Ыджыдӧй, Тэ – Ен. Тэнад кывъясыд збыльӧсь. Татшӧм буртор Тэ кӧсйысин меным, Аслад кесйӧгыдлы.

²⁹ Ӧні кора Тэнӧ, бурси менсьым рӧдӧс, мед сійӧ пыр лоас Тэнад чужӧмбан водзын. Ӧд Тэ, Господьӧй Ыджыдӧй, Ачыд тадзи шуин. Тэ кӧ бурсиан, сэки Тэнад кесйӧглӧн рӧдыс пыр кежлӧ лоӧ бурсиӧма».