Ӧксыяслӧн 2 небӧг 6 - Коми Библия 2023

Енлысь кудсӧ вайӧны Ерусалимӧ

¹ Давид чукӧртіс Израиль войтырысь комын сюрс медбур тышкамортӧс.

² Сэсся накӧд муніс Иуда муӧ Баала карӧ, мед вайны сэтысь Енлысь кудсӧ. Кудсӧ вӧлі сиӧма херувимъяс вылын пукалысь Господь Саваофлы.

³ Енлысь кудсӧ босьтісны Авинадав керкаысь, пуктісны выль тарантасӧ да лэччӧдісны ыб вылысь. Тарантасӧн веськӧдлісны Авинадавлӧн Уззай да Ахио пиян.

⁴ Ахио муніс [Господьлӧн] куд водзвылын.

⁵ Та дырйи Давид да Израиль войтыр Господь водзын нимкодясьӧмӧн йӧктісны да ворсісны кипарисысь вӧчӧм ворсанторъясӧн – гуслиӧн, арфаӧн, тимпанӧн, сярганӧн да кимвалӧн.

⁶ Кор воисны Наконлӧн гумла дорӧ, ӧшъяс пӧлыньтісны тарантассӧ. Пӧрӧмсьыс кутыштӧм могысь Уззай инмӧдчис Енлӧн кудйӧ.

⁷ Господь таысь скӧрмис Уззай вылӧ да дзик пыр виис сійӧс. Уззай куліс Енлӧн куд дорын.

⁸ Давид шогӧ усис, мый Господь виис Уззайӧс. Тайӧ местасӧ Давид нимтіс Перез-Узза. Тадзи ӧнӧдз шуӧны.

⁹ Сійӧ лунӧ Давид ёна повзис Господьысь. Сійӧ шуис: «Ме ог вермы босьтны Господьлысь кудсӧ ас дінӧ».

¹⁰ Та вӧсна Давид эз босьт Господьлысь кудсӧ ас дінас, Давид карӧ, а мӧдӧдіс сійӧс гефса Овед-Эдом керкаӧ.

¹¹ Куим тӧлысь чӧж Господьлӧн кудйыс вӧлі Овед-Эдом керкаын, и Господь бурсиис Овед-Эдомӧс да став сылысь гортсасӧ.

¹² Давидлы висьталісны, Енлӧн куд вӧсна пӧ Господь бурсиӧма Овед-Эдомӧс, сылысь гортсасӧ да ставсӧ, мый сылӧн эм. Сэки Давид нимкодясьӧмӧн вайис Енлысь кудсӧ Овед-Эдомлӧн керкаысь аслас Давид карӧ.

¹³ Господьлысь кудсӧ нуысьяслӧн квайт воськов бӧрын Давид вайис вись пыдди ӧшкӧс да тшӧгӧдӧм куканьӧс.

¹⁴ Шабді ефод кежсьыс Давид став сьӧлӧмсяньыс чеччаліс-йӧктіс Господь водзын.

¹⁵ Тадзи буксан шы улӧ гораа нимкодясьӧмӧн Давид да став Израиль войтыр вуджӧдісны Господьлысь кудсӧ.

¹⁶ Кор Господьлысь кудсӧ пыртісны Давид карӧ, Сауллӧн Мелкола нылыс видзӧдіс ӧшиньӧдыс. Сійӧ аддзис, мый Давид ӧксы чеччалӧ-йӧктӧ Господь водзын, да омӧльтіс сійӧс ас пытшкас.

¹⁷ Господьлысь кудсӧ вайисны да пуктісны аслас местаӧ, Давидӧн сувтӧдӧм чом шӧрӧ. Та бӧрын Давид вайис Господьлы сотан да бурасян висьяс.

¹⁸ Вись вайӧм бӧрын Давид бурсиис войтырсӧ Господь Саваоф нимӧн.

¹⁹ Чукӧртчӧм став Израиль войтырлы [войвыв Дансянь лунвыв Бер-Шеваӧдз олысьяслы], быд айловлы да аньлы, сетіс нянь, пражитӧм яйтор да изюм. Та бӧрын йӧзыс муналісны гортаныс.

²⁰ Давид муніс гортас, мед бурсины гортсаяссӧ. Сылы воча петіс Сауллӧн Мелкола нылыс [чолӧмасис сыкӧд] да шуис: «Израильлӧн ӧксы талун янӧдіс асьсӧ. Тэ пасьтӧгыд чеччалін аслад йӧзлӧн кесйӧг аньяс водзын, асьтӧ йӧй туйӧ пуктін».

²¹ Давид шуис Мелколалы: «Господь водзын ме йӧкті [и кута йӧктыны. Ошкӧм Господьлы]. Сійӧ ӧд менӧ бӧрйис, а эз тэнсьыд батьтӧ да сылысь рӧдсӧ. Пуктіс менӧ юравны Израильӧн, Господьлӧн войтырӧн. Господь водзын ме кӧсъя гажӧдчыны

²² и ачымӧс нӧшта на улӧ пукта. А кесйӧг аньяс, кодъяс йылысь тэ шуин, кутасны пыдди пуктыны менӧ».

²³ Мелколалӧн, Саул нывлӧн, олӧм чӧжыс эз вӧв челядьыс.