Ӧксыяслӧн 2 небӧг 23 - Коми Библия 2023

Давидлӧн бӧръя кывъясыс

¹ Давидлӧн бӧръя кывъясыс: – Висьталӧ Давид, Ессейлӧн пи, Израильлӧн муса сьылысь. Енмӧн вылӧ пуктӧма, Яковлӧн Енмӧн мавтыштӧма.

² Господьлӧн Лов сёрнитӧ ме пыр, Сылӧн кывйыс петӧ менам вомысь.

³ Израильлӧн Ен сёрнитіс мекӧд, Израильӧс Дорйысь шуис: «Веськыда ыджыдалысь, Енмысь полӧмӧн юралысь

⁴ асъя кыа кодь, кымӧртӧм енэжын дзирдалысь шонді кодь, зэрӧм бӧрын петысь веж турун кодь».

⁵ Абу-ӧ татшӧм менам рӧдӧй Ен водзын? Енмыс пыр кежлӧ кӧрталіс мекӧд йитӧд – зумыдӧс да вежсьывлытӧмӧс. Быд кадӧ Сійӧ мездыліс менӧ, збыльмӧдліс менсьым кӧсйӧмъясӧс.

⁶ Лёк вӧчысьяс нетшыштӧм лежнӧг кодьӧсь. Киад сійӧс он босьт,

⁷ сӧмын кӧрт беддьӧн либӧ шыӧн инмӧдчан сы дінӧ, сійӧс дзикӧдз сотасны биын.

Давидлӧн нималана тышкайӧз

⁸ Давидлӧн тышкайӧзысь тӧдчанлунныс серти торъялісны куимӧн. Медтӧдчанаыс на пиысь вӧлі Тахкемонысь Ишбошет. Аслас шыӧн сійӧ ӧтчыдӧн виис вӧрӧглысь кӧкъямыссё мортӧс.

⁹ Мӧдыс вӧлі Элазар, Ахоах Додолӧн пиыс. Сійӧ вӧлі куим медтӧдчана тышкаморт пиысь ӧти. Давидкӧд найӧ янӧдісны тыш вылӧ чукӧртчӧм филистимсаясӧс.

¹⁰ Израильсаяс сэки бӧрыньтчисны, но Элазар кольччис да ки дубавмӧныс виаліс филистимсаясӧс. Весиг чуньяссӧ эз вермы веськӧдны, мед лэдзны кабырсьыс шыпуртсӧ. Сійӧ лунӧ Господь сетіс ыджыд вермӧм Израильлы. Израильсаяс бӧр локтісны Элазар дінӧ, мед виӧмаяслысь босьтавны шыпуртъяссӧ да мукӧд тышкасянторсӧ.

¹¹ Коймӧдыс вӧлі Харарысь Шаммей, Агелӧн пиыс. Филистимсаяс чукӧртчисны Лехиӧ, кӧні вӧлі кӧдзӧм чечевица му. Израильса тышкайӧз кутісны пышйыны филистимсаясысь,

¹² а кӧдзӧм мусӧ видзӧм могысь Шаммей сувтіс му шӧрас да сэні виаліс филистимсаясӧс. Тадзи Господь сетіс Израильлы ыджыд вермӧм.

¹³ Вундан кадӧ комын веськӧдлысь пиысь куим мортыс мунісны Давид дінӧ адулламса кырта горсйӧ. Филистимса тышкайӧз чукӧртчисны Рефаим ковтысӧ.

¹⁴ Давид вӧлі сайӧдчанінын, а филистимсаяслӧн тышкакотырыс – Виплиемын.

¹⁵ Давидлӧн горшыс кутіс косьмыны. Сійӧ шуис: «Коді эськӧ ваяс меным юкмӧсысь ва Виплием дзиръя дорысь!»

¹⁶ Сэки тайӧ куим тышкамортыс мунісны филистимсаяслӧн сувтанінӧ, тышкасьӧмӧн матыстчисны Виплием дзиръя дорӧ да гумовтісны юкмӧсысь васӧ. Сэсся вайисны Давидлы. Но Давид эз кут юны тайӧ васӧ, а кисьтіс сійӧс Господьлы вись пыдди.

¹⁷ «Господьӧй, ме ог вермы юны тайӧ васӧ! Тайӧ – йӧзлӧн вир, найӧ дасьӧсь вӧліны воштыны олӧмнысӧ», – шуис Давид и эз кут юны. Татшӧм уджъяс вӧчисны тайӧ куим тышкамортыс.

¹⁸ Саруялӧн Авишай пиыс, Йоавлӧн вокыс, веськӧдліс тышкайӧзлӧн куим юралысьӧн. Сійӧ виис аслас шыӧн куимсё мортӧс. Тайӧ куим юралысьыс моз сійӧ вӧлі нималана

¹⁹ да пыдди пуктана. Сійӧ веськӧдліс наӧн, но накӧд сійӧс он ӧткодяв.

²⁰ Кавцелысь Бенай, Иодайлӧн пиыс, вӧлі збой тышкасьысь да нималіс аслас ыджыд уджъясӧн. Сійӧ виис моавса Ариллысь кыкнан писӧ. Коркӧ лым усигӧн сійӧ лэччис косьмӧм вайӧртӧдӧ да виис сэні левӧс.

²¹ Нӧшта сійӧ виис ыджыд тушаа египетсаӧс. Египетса кутіс киас шы, а Бенай петіс сылы паныд беддьӧн. Бенай мырддис египетсалӧн киысь шысӧ да бытшкис сійӧс.

²² Со татшӧмторъяс вӧчис Иодайлӧн Бенай пиыс. Сійӧ тшӧтш нималіс куим юралысьыс моз.

²³ Комын нималана тышкаморт пӧвстын Бенай вӧлі тӧдчана морт, но тайӧ куим юралысьыскӧд сійӧс он ӧткодяв. Давид пуктіс сійӧс веськӧдлыны аслас видзысьясӧн.

²⁴ Давид ӧксылӧн комын нималана тышкаморт лыдӧ пырисны: Йоавлӧн Асаил вокыс, Виплиемысь Додолӧн Элханан пиыс,

²⁵ Хародысь Шаммей да Эликей,

²⁶ Палтиысь Хелец, Текоя карысь Икешлӧн Ир пиыс,

²⁷ Анатотысь Авиэзер, Хушаысь Мебуннай,

²⁸ Ахоахысь Цалмон, Нетофаысь Махрай,

²⁹ Нетофаысь Баанлӧн Хелев пиыс, Гиваысь Венямин чужанкотырысь Рибайлӧн Иттай пиыс,

³⁰ Пиратонысь Бенай, Нахле-Гаашысь Хиддай,

³¹ Арбаысь Ави-Албон, Бархумысь Азмавет,

³² Шаалбонысь Элияхаб, Яшен пиянысь Ионафан,

³³ Харарысь Шаммей, Арарысь Шарарлӧн Ахиам пиыс,

³⁴ Маакаысь Ахасбайлӧн Элипелет пиыс, Гилоысь Ахитофеллӧн Элиам пиыс,

³⁵ Кармилысь Хецро, Арбиысь Паарай,

³⁶ Цоваысь Нафанлӧн Игал пиыс, Гадысь Бани,

³⁷ аммон войтырысь Целек, Беротысь Нахарай – Саруялӧн Йоав пилысь шыпуртсӧ новлӧдлысь,

³⁸ Итриысь Ир да Гарев,

³⁹ хеттей Урий. Ставнас комын сизим морт.