Ӧксыяслӧн 2 небӧг 22 - Коми Библия 2023

Давидлӧн сьыланкыв

¹ Давид сьыліс тайӧ сьыланкывсӧ Господьлы, кор Господь мездіс сійӧс став вӧрӧгысь да Саулысь. Сійӧ сьыліс тадзи:

² – Господьӧй, Тэ – менам зумыд изйыс, менам выныс да менӧ Мездысьыс.

³ Енмӧй, Тэ – менам изкыртаыс, Тэ вылӧ ме лача кута. Тэ – менам сайӧдыс, вына Дорйысьыс да Видзысьыс, Тэ – менам дзебсяніныс. Мездысьӧй, Тэ мездін менӧ виысь-дзескӧдысьясысь!

⁴ Ме шыася ёна ошкана Господь дінӧ, Сійӧ мездас менӧ мустӧмтысьясысь.

⁵ Менӧ вевттисны кулӧм вайысь гыяс, лёкыс повзьӧдліс менӧ бузгысь ва моз.

⁶ Пыдӧстӧминлӧн чепъясыс дорисны менӧ, кулӧмыслӧн тывъясыс гартыштісны менӧ.

⁷ Кор менӧ топӧдіс сьӧкыдлун, ме чукӧсті Господьӧс, шыаси аслам Ен дінӧ. Сійӧ кыліс менсьым гӧлӧс шыӧс Аслас вежаинсянь, менам бӧрдӧм шыӧй воис Сылӧн пельӧдзыс.

⁸ Муыс сыркмунліс да вӧрзис, енэжсӧ пыкысь керӧсъяс кыпмунлісны да вешйисны места вывсьыс, сэтшӧма скӧрмис Господь.

⁹ Сылӧн скӧралӧмсянь кыптіс тшын, Сылӧн вомысь петіс сотысь би. Сысянь киссисны биа ӧгыръяс.

¹⁰ Сійӧ доровтіс енэжсӧ да лэччис, сувтіс кокнас сьӧд кымӧръяс вылӧ.

¹¹ Пуксис херувимъяс вылӧ да лэбзис, лэбис тӧв бордъяс вылын.

¹² Сап пемыднас вевттьысис Сійӧ, сук сьӧд кымӧръясӧн кытшаліс Асьсӧ.

¹³ Сы водзын дзирдаліс яръюгыд би, сэтысь ыпнитісны биа ӧгыръяс.

¹⁴ Господь муркнитіс енэжас, Медвылыссаыс сетіс Ассьыс гӧлӧс шысӧ.

¹⁵ Лэдзис Ассьыс гымньӧвъяссӧ да чардбиӧн сявкйис найӧс енэж пасьталаыс.

¹⁶ Господьлӧн шыасьӧмысь, Сылӧн скӧрлунӧн пӧльтысь ловшыысь тыдовтчис саридзлӧн пыдӧсыс да муыслӧн подулыс.

¹⁷ Вылісянь Сійӧ нюжӧдіс кисӧ, босьтіс менӧ да лэптіс джуджыд ваысь,

¹⁸ мездіс менӧ вына вӧрӧгысь, мездіс мустӧмтысьясысь, кодъяс вӧліны меысь ёнджыкӧсь.

¹⁹ Менам шог дырйи найӧ уськӧдчисны ме вылӧ, но Господь вӧлі меным зумыд пыкӧдӧн.

²⁰ Сійӧ петкӧдіс менӧ паськыдінӧ да мездіс менӧ, ӧд Сійӧ радейтӧ менӧ.

²¹ Господь меным бурӧн мынтысис веськыда вӧчӧмысь, сетіс меным тырдон сӧстӧма олӧмысь,

²² ӧд ме ветлі Господьлӧн туйӧд, аслам Ен водзын шогмытӧмсӧ эг вӧч.

²³ Став Сылысь тшӧктӧмъяссӧ пыр куті тӧд вылын, Сылӧн велӧдӧмысь эг кежлы.

²⁴ Сы водзын ме вӧлі сӧстӧм, видзи ачымӧс мыж вӧчӧмысь.

²⁵ Та вӧсна Господь мынтысис меным бурӧн менам веськыда вӧчӧмысь да Сылӧн син водзын сӧстӧм олӧмысь.

²⁶ Бур сьӧлӧма дінӧ Тэ бур сьӧлӧма, веськыда вӧчысьлы Тэ вӧчан веськыда,

²⁷ сӧстӧмлы вӧчан сӧстӧма, а наянлы – сылӧн наянлуныс серти.

²⁸ Увтыртӧмаясӧс Тэ мездан, а вылӧ кыпӧдчысьясӧс Тэ улӧ лэдзан.

²⁹ Господьӧй, Тэ меным югдӧдысь биыс, Тэ югдӧдан менсьым пемыдӧс.

³⁰ Тэкӧд ме пасьварта тышкайӧзӧс, Тэкӧд ме кая карса стен вылӧ.

³¹ Енлӧн туйыс тыр-бур, Господьлӧн кывйыс сӧстӧм. Ен вылӧ лача кутысьяслы Сійӧ – сайӧдыс.

³² Господьысь кындзи мӧд Енмыс абу, миян Енмысь кындзи мӧд Дорйысьыс абу.

³³ Енмыс вӧньӧдӧ менӧ вынӧн, лӧсьӧдӧ меным веськыд туй,

³⁴ вӧчӧ менсьым кокӧс кӧрлӧн кодь тэрыбӧн, сувтӧдӧ менӧ выліинӧ,

³⁵ велӧдӧ менӧ тышкасьны, менсьым киӧс – зэвтны ыргӧн ньӧввуж.

³⁶ Тэ – менам сайӧдыс, менӧ Мездысьыс. Тэнад буралӧмыд кыпӧдӧ менӧ.

³⁷ Тэ зумыдмӧдан менсьым воськовъясӧс, менам кокӧй оз лигышмун.

³⁸ Ме вӧтӧда да виа вӧрӧгъясӧс. Кытчӧдз ог бырӧд найӧс, бӧр ог бергӧдчы.

³⁹ Ме дойдала найӧс, и найӧ усясны менам кок улӧ, сувтнысӧ оз вермыны.

⁴⁰ Тэ вӧньӧдін менӧ вынӧн тыш вылӧ, уськӧдін менам кок улӧ паныд кыпӧдчысьясӧс.

⁴¹ Тэ бергӧдан вӧрӧгӧс пышйӧмӧ, ме вӧтча мустӧмтысьяс бӧрся да бырӧда найӧс.

⁴² Найӧ горзӧны, но мездысьыс абу, шыасьӧны Господь дінӧ, но Сійӧ оз вочавидз.

⁴³ Ме шердъя найӧс тӧвйыв бусӧс моз, таляла найӧс туйвыв няйтӧс моз.

⁴⁴ Тэ мездін менӧ паныд кыпӧдчысь войтырысь, видзин менӧ, мед пуктыны юралысьӧ тшӧтш мукӧд войтыръяслы. Меным кесъялӧны войтыръяс, кодъясӧс водзын эг тӧдлы.

⁴⁵ Йӧз муысь локтысьяс леститчӧны ме дінӧ. Сӧмын шуа налы, менсьым кывзысьӧны нин.

⁴⁶ Найӧ нюкыртчӧмаӧсь, тіралӧны асланыс изкаръясын.

⁴⁷ Господь ловъя! Ме ошка Тэнӧ, Дорйысьӧй! Мед лоӧ нимӧдӧма Тэнӧ, Енмӧй! Тэ – менам мездмӧмлӧн зумыд подулыс.

⁴⁸ Тэ – водзӧс перйысь Ен, Тэ сетан менам кипод улӧ войтыръясӧс,

⁴⁹ мездан менӧ вӧрӧгысь. Тэ лэптін менӧ паныд кыпӧдчысьясысь вылӧджык, мездін менӧ виалысь-дзескӧдысьясысь.

⁵⁰ Та вӧсна, Господьӧй, кута ошкыны Тэнӧ мукӧд войтыръяс пӧвстын, кута сьылӧмӧн ошкыны Тэнсьыд нимтӧ.

⁵¹ Ыджыд вынӧн Тэ мездан ӧксыӧс. Тэ мавтыштін Давидӧс, Тэ петкӧдлан буралӧмтӧ сы дінӧ да сысянь чужысьяс дінӧ нэмъяс чӧж.