Ӧксыяслӧн 2 небӧг 21 - Коми Библия 2023

Саул рӧдысь айуловӧс виӧм

¹ Давидлӧн ӧксыалан кадӧ куим во чӧж вӧлі тшыгъялӧм. Давид сэки шыасис Господь дінӧ. Господь шуис: «Тайӧ лои Саул да сылӧн рӧдвуж понда. Найӧ мыжаӧсь Гаваонын олысьяслысь вирсӧ кисьтӧмысь, ӧд найӧс Саул виис».

² Давид корис Гаваонысь йӧзӧс, мед сёрнитны накӧд. Гаваонсаяс эз вӧвны израильсаясӧн, найӧ петлӧмаӧсь аморей войтырысь. Израильсаяс коркӧ кыв сетлӧмаӧсь, мый оз вӧчны налы лёксӧ. Но Израиль да Иуда войтыр вӧсна Саул кӧсйис бырӧдны найӧс.

³ Давид юаліс гаваонсаяслысь: «Мый ме верма вӧчны тіянлы? Мыйӧн мынтысьны Сауллӧн мыжысь, мед ті бурсиинныд Господьлысь войтырсӧ?»

⁴ Гаваонсаяс вочавидзисны: «Эзысь-зарни Саулсянь да сылӧн рӧдвужсянь миянлы оз ков. Вины Израиль войтырысь некодӧс ми огӧ вермӧй». Давид шуис: «Ме вӧча тіянлы ставсӧ, мый ті коранныд».

⁵ Сэки найӧ шуисны Давид ӧксылы: «Саул виис миян пӧвстысь унаӧс, кӧсйис бырӧдны миянӧс став Израиль му пасьталаысь.

⁶ Та вӧсна сет миянлы Саул рӧдысь сизим айуловӧс. Ми ӧшӧдам найӧс [лунъюгыднас] Господь водзын Гиваын, Господьӧн бӧрйӧм Сауллӧн карын». Давид вочавидзис: «Ме сета найӧс тіянлы».

⁷ Но Саул Ионафанлысь Мепибошет писӧ Давид эз сет. Давид кутіс Господь водзын Ионафанлы сетӧм кывсӧ.

^8-9 Давид ӧксы сетіс гаваонсаяслӧн киӧ Сауллысь Армон да Мепибошет пиянсӧ, кодъясӧс чужтіс Риспа, Аейлӧн нылыс. Нӧшта сетіс Сауллӧн Мерова нылыслысь вит пиӧс, кодъясӧс сійӧ чужтіс мехоласа Барзиллайлӧн Адриэл пилы. Господь водзын гаваонсаяс ӧшӧдісны найӧс [лунъюгыднас] керӧс вылӧ. Сизимнанныс ӧтлаын кулісны. Найӧс виисны ид вундан кадӧ медводдза лунъясас.

¹⁰ Аейлӧн Риспа нылыс босьтіс чорыд дӧра да вольсаліс аслыс керӧс вылӧ. Вундан кад заводитчӧмсянь зэралан кадӧдз сійӧ пукаліс керӧс вылын. Сэні видзис пияныслысь шойяссӧ, луннас – лэбачьясысь, а войнас – зверъясысь.

¹¹ Давидлы висьталісны, мый вӧчӧ Сауллӧн Риспа кесйӧг-гӧтырыс. [Сісьмӧм шойяссӧ босьтіс Иойлӧн Дан пиыс. Сійӧ петлӧма ыджыд тушаа йӧз рӧдысь.]

¹² Давид муніс Галаад муӧ, мед босьтны Явис карысь Сауллысь да сылӧн Ионафан пилысь лыяссӧ. Гелвуын Саулӧс вермӧм бӧрын филистимсаяс ӧшӧдісны налысь шойяссӧ Бет-Шеан карса изэрд вылӧ, но Явис карын олысьяс гусялісны найӧс.

¹³ Давид вайис сэтысь Сауллысь да Ионафанлысь лыяссӧ. Вайис лыяссӧ тшӧтш налысь, кодъясӧс вӧлі ӧшӧдӧма [лунъюгыднас].

¹⁴ Найӧс дзебисны ӧтлаын Саулкӧд да Ионафанкӧд Венямин муӧ Села карӧ, Сауллӧн Кис батьыслӧн дзебанінӧ. Ставсӧ вӧчисны ӧксылӧн тшӧктӧм серти. Та бӧрын Енмыс кыліс войтырлысь му вӧсна кевмӧмсӧ.

Филистимсаяскӧд тыш

¹⁵ Израильса да филистимса костын бара пансис тыш. Кор Давид эбӧстӧммис,

¹⁶ Рефай рӧдысь Есвий нима морт кӧсйис вины сійӧс. Рефайлӧн вӧлі куимсё сикель сьӧкта ыргӧн пома шы, коскас ӧшаліс дзик выль шыпурт.

¹⁷ Но Давидлы отсӧг вылӧ локтіс Саруялӧн Авишай пиыс [да мездіс сійӧс]. Авишай виис тайӧ филистимсасӧ. Та бӧрын Давидлӧн йӧзыс шуисны Давидлы: «Водзӧ миянкӧд он пет тышӧ, медым Израильлӧн биыс эз кус».

¹⁸ Бӧрынджык Гобын вӧлі филистимсаяскӧд тыш, кӧні Хушаысь Сиббекай виис Рефай рӧдысь Саф нима мортӧс.

¹⁹ Сэсся Гобын вӧлі филистимсаяскӧд мӧд тыш. Виплиемысь Яир-Оргимлӧн Элханан пиыс виис гефса Голиафӧс, кодлӧн шы беддьыс вӧлі шӧрт гартан юранӧш кодь кыз.

²⁰ Гефын тшӧтш пансис тыш. Сэні вӧлі зэв ыджыд тушаа морт, сійӧ тшӧтш вӧлі Рефай рӧдысь. Сылӧн быд ки-кокын вӧлі квайт чунь – ставнас вӧлі кызь нёль чунь.

²¹ Тайӧ мортыс омӧльтіс израильсаясӧс, но Давидлӧн Шимей вокыслӧн Ионафан пиыс виис сійӧс.

²² Давид да сылӧн йӧзыс виисны гефса Рефай рӧдысь тайӧ нёльнан мортсӧ.