Ӧксыяслӧн 2 небӧг 20 - Коми Библия 2023

Шевей кыпӧдчӧ Давидлы паныд

¹ Вензьысьяс пӧвстын вӧлі Венямин чужанкотырысь Бикрилӧн Шевей пиыс. Сійӧ вӧлі лёк морт. Шевей букӧстіс буксанӧн да горӧдіс: «Давид миянлы некод! Ессей пикӧд миянӧс нинӧм оз йит! Израиль войтыр, мунӧй быдӧн асланыд чомйӧ!»

² Израильсаяс ставныс эновтісны Давидӧс да мунісны Бикрилӧн Шевей пикӧд. Иуда войтыр кольччис аслас Давид ӧксыкӧд да колльӧдіс сійӧс Йӧрдансянь Ерусалимӧдз.

³ Ерусалимын Давид ӧксы муніс аслас гортӧ. Даснан кесйӧг-гӧтырсӧ, кодъясӧс кольліс керка бӧрсяыс видзӧдны, овмӧдіс торъя керкаӧ. Давид сувтӧдіс сэтчӧ видзысьясӧс да могмӧдіс аньясӧс став коланаторнас, но на дінӧ эз пыравлы. Олӧм помӧдзныс аньяс олісны видзӧдӧм улын дӧваяс моз.

⁴ Давид шуис Амессайлы: «Куим лун тэныд сета. Чукӧрт ме дінӧ став Иуда войтырсӧ. Ачыд мед тшӧтш тані вӧлін».

⁵ Амессай муніс коравны Иуда войтырӧс, но куим луныс сылы эз тырмы.

⁶ Сэки Давид шуис Авишайлы: «Бикрилӧн Шевей пиыс вермас Авессалом дорысь на унджык лёксӧ вӧчны миянлы. Босьт аскӧдыд менсьым йӧзӧс да вӧтчы сы бӧрся. Сійӧ вермас пышйыны миянысь да дзебсьыны изкарӧ».

⁷ Медым вӧтӧдны Бикрилысь Шевей писӧ, Ерусалимысь Авишайкӧд петісны Йоавлӧн йӧзыс, нӧшта керетсаяс, пелетсаяс да мукӧд тышкайӧз.

⁸ Кор найӧ вӧліны Гаваонын ыджыд из дорын, налы паныдасис Амессай. Йоав вӧлі тышкасян паськӧма. Шыпуртыс ӧшаліс пуртӧсас коссьыс улынджык. Кор сійӧ воськовтіс, шыпуртыс усис пуртӧссьыс.

⁹ Йоав юаліс Амессайлысь: «Кыдзи, вокӧй, олан-вылан?» Сэсся босьтіс веськыд кинас Амессайӧс тошкӧдыс, мед окыштны.

¹⁰ Амессай эз видзчысь, мый Йоав бытшкас сійӧс лэптӧм шыпуртнас. Шыпуртыс Амессайлы пырис веськыда кынӧмас, и гырк пытшкӧсыс петіс му вылас. Ӧти бытшкӧмысь Амессай дзик пыр куліс. Йоав Авишай вокыскӧд водзӧ мунісны вӧтӧдны Бикрилысь Шевей писӧ.

¹¹ Йоавлӧн тышкайӧзысь ӧти сувтіс Амессайлӧн шой дорӧ да горӧдіс: «Коді Йоав да Давид дор, мед мунас Йоавкӧд!»

¹² Амессайлӧн вирӧн ойдӧм шойыс куйліс туй шӧрас. Тышкаморт кор аддзис, мый ставныс сувтлӧмӧн видзӧдӧны шойыс вылӧ, вештіс шойсӧ туй вывсьыс да вевттис сійӧс паськӧмӧн.

¹³ Та бӧрын тышкайӧз мунісны Йоав бӧрся вӧтӧдны Бикрилысь Шевей писӧ.

¹⁴ Шевей кытшовтіс став израильса чужанкотырсӧ да локтіс Авел-Бет-Маакаӧ. Беримын [да каръясын] став олысьыс чукӧртчис да пырис Шевейкӧд Авел-Бет-Маакаӧ.

¹⁵ Йоав аслас тышкайӧзкӧд локтіс сэтчӧ да кытшаліс карсӧ. Карса стен гӧгӧр лэптісны тымӧд, медым сибавны стен дорӧ. Йоав аслас йӧзкӧд пондісны жуглыны стенсӧ.

¹⁶ Сэки ӧти сюсь мывкыда ань горӧдіс стен сайсяньыс: «Кывзӧй! Висьталӧй Йоавлы, мед матыстчас татчӧ. Ме кӧсъя сёрнитны сыкӧд».

¹⁷ Кор Йоав матыстчис, ань юаліс: «Йоав-ӧ тэ?» Йоав вочавидзис: «Ме». «Кывзышт менӧ, ассьыд кесйӧгтӧ», – шуис ань. «Кывза», – воча шуис Йоав.

¹⁸ Ань шуис: «Важӧн шулӧмаӧсь, Авел карӧ пӧ юасьнытӧ ветлы. Сэні тӧдмавлісны, мый водзӧ вӧчны. [Колисны-ӧ Израиль войтырысь найӧ, кодъяс шуисны помӧдз лоны эсканаӧн? Мед ветласны юавны Авел карӧ.]

¹⁹ Ми лӧня олам асланым Израиль войтыр пӧвстын, ми эсканаӧсь. Тайӧ карыс – израильса [каръяслӧн] мам, а тэ кӧсъян бырӧдны сійӧс! Мыйла тэныд бырӧдны сійӧ, мый Господьлӧн?»

²⁰ Йоав вочавидзис: «Тайӧ абу тадз. Ме ог кӧсйы кисьтны-бырӧдны тайӧ карсӧ.

²¹ Но тіян карын эм Шевей нима морт. Сійӧ Ефрем керӧсвыв муысь, Бикрилӧн пиыс. Сійӧ кыпӧдчис Давид ӧксылы паныд. Сетӧй меным сійӧс, и ме вешъя тіян кар дорысь». Ань шуис Йоавлы: «Сылысь юрсӧ ми шыбитам тэныд стен вывсяньыс».

²² Ань муніс карса олысьяс дінӧ. Сійӧ аслас мывкыдлунӧн кужис ышӧдны найӧс, и найӧ керыштісны Шевейлысь юрсӧ да шыбитісны Йоавлы. Сэки Йоав букӧстіс буксанӧн, и тышкайӧз вешйисны кар дорсьыс. Ставныс мунісны бӧр гортаныс, а Йоав локтіс Ерусалимӧ ӧксы дінӧ.

²³ Йоав веськӧдліс став израильса тышкайӧзӧн, а Иодайлӧн Бенай пиыс веськӧдліс ӧксыӧс видзысь керетса да пелетса шыпуртаясӧн.

²⁴ Адорам веськӧдліс йӧзӧн, кодъяс уджалӧмнас мынтісны вот. Ахилудлӧн Иосафат пиыс пасъяліс небӧгӧ вӧвлӧмторъяс.

²⁵ Шевай вӧлі гижалысьӧн, Садок да Авиатар вӧліны попъясӧн.

²⁶ Яирысь Ир тшӧтш вӧлі попӧн Давид ордын.