Ӧксыяслӧн 2 небӧг 19 - Коми Библия 2023

Йоав янӧдӧ Давидӧс

¹ Йоавлы висьталісны, ӧксы пӧ ёна шогсьӧ-бӧрдӧ Авессалом вӧсна.

² Сійӧ лунӧ тышын вермӧмыс Давид йӧзлы бергӧдчис бӧрдӧмӧ, кор налы кывсис, мый ӧксы ёна бӧрдӧ пиыс вӧсна.

³ Тышкайӧз пырисны карас юрнысӧ лэдзӧмӧн, быттьӧ тыш вылысь пышйысьяс, кодъяслы лои юръяндзим.

⁴ А ӧксы чужӧмсӧ тупкӧмӧн гораа бӧрдіс: «Авессалом пиӧй, Авессалом пиӧй!»

⁵ Йоав муніс ӧксы дінӧ да шуис: «Талун тэ янӧдін ассьыд йӧзтӧ. Найӧ видзисны тэнсьыд олӧмтӧ, тшӧтш ныв-пиыдлысь да гӧтыръясыдлысь олӧмсӧ.

⁶ Но тэ, вӧлӧмкӧ, радейтан тэнӧ мустӧмтысьясӧс да мустӧмтан тэнӧ радейтысьясӧс. Талун тэ петкӧдлін, мый тэ нинӧмӧ пуктан ассьыд веськӧдлысьястӧ да тышкайӧзтӧ. Ме аддза, Авессалом кӧ ловйӧн коли, а ми ставным кулім, тэ эськӧ тадзи эн шогсьы.

⁷ Пет да сёрнит аслад йӧзкӧд. Ышӧд найӧс. Господь водзын шуа: он кӧ пет, тайӧ войнас ставныс эновтасны тэнӧ. Тайӧ лоӧ тэныд ыджыдджык лёкторйӧн став сійӧ лёкыс дорысь, мый вӧлі тэнад олӧм чӧжыд».

⁸ Ӧксы петіс да пуксис карса дзиръя дорӧ. Тышкайӧзлы юӧртісны та йылысь, и найӧ ставныс локтісны ӧксы дінӧ. Авессаломлӧн йӧзыс пышйисны тыш вылысь гортаныс.

Давид бӧр локтӧ Ерусалимӧ

⁹ Израильса чужанкотыръяс пондісны мыжавны ӧта-мӧднысӧ. Найӧ шуалісны: «Давид ӧксы мездіс миянӧс став вӧрӧгысь. Сійӧ мездіс миянӧс филистимсаяслӧн киысь, а Авессалом понда пышйис аслас муысь.

¹⁰ Но Авессалом, кодӧс ми мавтыштӧмӧн пуктім аслыным ӧксыӧ, куліс тышын. Мый ті ньӧжмасянныд? Бӧр вайӧдӧй Давид ӧксынытӧ!»

¹¹ Давид ӧксылы кывсис израильсаяслӧн вӧзйӧмыс. Сэки сійӧ мӧдӧдіс Садок да Авиатар попъясӧс иудаса юрнуӧдысьяс дінӧ да шуис: «Висьталӧй налы: ”Мыйла ті нинӧм онӧ вӧчӧй, мед бӧр вайӧдны менӧ ӧксы керкаӧ?

¹² Ті ӧд менам вокъяс, миян вир-яйын визувтӧ ӧти вир. Мыйла онӧ водзмӧстчӧй, мед бӧр вайӧдны менӧ?”

¹³ Амессайлы висьталӧй, мый сійӧ меным ас морт. И Енмыс мед ёна мыждас менӧ, ог кӧ пукты сійӧс Йоав пыдди пыр кежлӧ веськӧдлыны тышкайӧзӧн!»

¹⁴ Тадзи ӧксы бергӧдіс асланьыс став Иуда войтырӧс. Найӧ ӧти сьӧлӧмӧн шуисны мӧдӧдны юӧртысьӧс ӧксы дінӧ да тшӧктісны висьтавны сылы, бӧр лок пӧ, ӧксыӧй, аслад йӧзкӧд.

¹⁵ Ӧксы петіс туйӧ да воис Йӧрдан ю дорӧ. А Иуда войтыр локтіс Галгалӧ, мед вочаавны ӧксыӧс да вуджӧдны сійӧс Йӧрдан ю вомӧн.

Давид бурсьӧлӧмтчӧ Шимей да Мепибошет дінӧ

¹⁶ Бахуримысь Венямин чужанкотырысь Герлӧн Шимей пиыс Иуда войтыркӧд тшӧтш тэрмасис вочаавны Давид ӧксыӧс.

¹⁷ Сыкӧд локтісны Венямин чужанкотырысь сюрс морт, Сауллӧн Сивей кесйӧгыс дас витнан пиыскӧд да кызь кесйӧгыскӧд. Ставныс найӧ вуджисны Йӧрдан ю сайӧ, медым вочаавны ӧксыӧс

¹⁸ да отсавны вуджны сылы да сылӧн гортсаяслы. Найӧ зілисны быд ногыс кесъявны ӧксылы. Кор ӧксы лӧсьӧдчис вуджны Йӧрдан юсӧ, Шимей [кымынь] уськӧдчис ӧксы водзӧ

¹⁹ да шуис: «Ыджыдӧй, эн мыжав менӧ. Эн казьтыв, мый сэки Ерусалимысь петігад ме, тэнад кесйӧг, вӧчи уна лёктор тэныд, ӧксыӧй. Эн кут тайӧс сьӧлӧмад.

²⁰ Ме тӧда, мый ме мыжа. Та вӧсна Ӧсип рӧдысь ме медводдзаӧн локті, мед вочаавны тэнӧ, ӧксыӧй-ыджыдӧй».

²¹ Саруялӧн Авишай пиыс сэки шуис: «Шимейӧс колӧ вины, ӧд сійӧ лёкӧдліс Господьлысь мавтыштӧмасӧ».

²² Давид шуис: «Мый ті ме понда шогсянныд, Саруя пиян? Мыйла ті ӧні меным паныд сувтанныд? Позьӧ ӧмӧй талун кодӧскӧ вины Израиль войтырысь, кор ме бара лои налы ӧксыӧн».

²³ Шимейлы ӧксы кыв сетӧмӧн шуис: «Тэ он кув».

²⁴ Саул Ионафанлӧн Мепибошет пиыс тшӧтш локтіс вочаавны ӧксыӧс. Ӧксылӧн Ерусалимысь петӧмсянь да тайӧ лунӧдзыс, кор сійӧ бӧр локтіс ловъяӧн да дзоньвидзаӧн, Мепибошет эз мыськавлы коксӧ, [эз тшӧтшӧдлы гыжсӧ,] эз шырлы тошсӧ да эз пеславлы паськӧмсӧ.

²⁵ Кор Мепибошет локтіс Ерусалимысь вочаавны ӧксыӧс, ӧксы юаліс сылысь: «Мепибошет, мыйла тэ эн мун мекӧд?»

²⁶ Мӧдыс вочавидзис: «Ӧксыӧй-ыджыдӧй! Кесйӧгӧй ылӧдліс менӧ. Тэ ӧд тӧдан, мый ме, тэнад кесйӧг, чота. Та вӧсна шуи сылы, мися, пукся осёл вылӧ да муна ӧксыкӧд.

²⁷ Но кесйӧгӧй лёкӧдіс менӧ тэ водзын. Тэ, ӧксыӧй-ыджыдӧй, Енлӧн андел кодь. Вӧч, мый кӧсъян.

²⁸ Ӧксыӧй-ыджыдӧй, тэ ӧд вермин бырӧдны менам батьлысь рӧдсӧ, но тэ лэдзин меным, аслад кесйӧглы, сёйны тэнад пызан сайын. Меным нинӧмысь элясьнысӧ тэ вылӧ, ӧксыӧй».

²⁹ Ӧксы шуис Мепибошетлы: «Мыйла тэ меным ставсӧ тайӧс висьтавлан? Оз ков. Ме тшӧкта, мед тэ да Сивей юкинныд ас костаныд видз-мунытӧ».

³⁰ Мепибошет шуис: «Мед босьтас кӧть ставсӧ. Меным тырмана, мый тэ, ӧксыӧй-ыджыдӧй, ловйӧн локтін гортад».

Давид янсӧдчӧ Барзиллайкӧд

³¹ Галаад муысь Роглим карысь локтіс Барзиллай да колльӧдіс Давид ӧксыӧс Йӧрдан ю сайӧдз.

³² Барзиллай вӧлі зэв нин пӧрысь, кӧкъямысдас арӧса. Сійӧ вӧлі зэв озыр. Маханаимын ӧксылӧн олігӧн Барзиллай вайліс сылы сёян-юан да мукӧд коланаторсӧ.

³³ Ӧксы шуис сылы: «Мунам мекӧд Ерусалимӧ. Ме кута тӧждысьны тэ вӧсна».

³⁴ Но мӧдыс вочавидзис: «Ӧксыӧй, мыйла меным мунны тэкӧд Ерусалимас? Код тӧдас, дыр-ӧ меным коли овнысӧ.

³⁵ Меным кӧкъямысдас арӧс нин. Ог нин сяммы торйӧдны бурсӧ лёксьыс. Сёян-юанлысь кӧрсӧ ог нин кыв. Сьӧкыда нин кыла сьылысьяслысь сьылӧмсӧ. Мыйла меным, тэнад кесйӧглы, сьӧктӧдны тэнӧ, ӧксыӧй-ыджыдӧй?

³⁶ Меным оз ковны лышкыд козинъяс, ӧксыӧй. Сӧмын мунышта тэкӧд Йӧрдан ю мӧдлапӧлӧдзыс.

³⁷ Сэсся лэдз менӧ бӧр мунны. Ме кӧсъя кувны аслам чужан карын, кӧні дзебӧма менсьым бать-мамӧс. А тэкӧд, ӧксыӧй-ыджыдӧй, мед мунас Кимхам [пиӧй], тэнад кесйӧгыд. Вӧч сылы, мый чайтан колана».

³⁸ Ӧксы шуис: «Мед, сідзкӧ, Кимхам мунас мекӧд. Сылы вӧча ставсӧ, мый тэ коран. А тэныд ме вӧча ставсӧ, мый шуан».

³⁹ Сэсся став йӧзыс ӧксыкӧд вуджисны Йӧрдан ю сайӧ. Янсӧдчигас ӧксы окыштіс Барзиллайӧс да бурсиис сійӧс, и мӧдыс бӧр муніс гортас.

Израиль да Иуда войтыр костын вензьӧм

⁴⁰ Давид ӧксы мӧдӧдчис Галгалӧ, сыкӧд тшӧтш муніс Кимхам. Ӧксыӧс колльӧдісны иудаса тышкайӧз да израильса джын тышкайӧзыс.

⁴¹ Регыд мысти израильсаяс локтісны ӧксы дінӧ да шуисны: «Мыйла миян вокъяс, Иуда айулов, миянысь гусьӧн вуджӧдісны Йӧрдан сайысь тэнӧ, тэнсьыд гортсатӧ да став йӧзтӧ?»

⁴² Иуда йӧз вочавидзисны израильсаяслы: «Сы вӧсна, мый ӧксы миянлы матыссаджык. А мыйысь ті скӧраланныд миян вылӧ? Ми ӧмӧй чӧсмасьлім ӧксы сёянӧн либӧ босьтлім сысянь козинъяс? [Гашкӧ, сійӧ мездіс миянӧс вот мынтӧмысь?]»

⁴³ Израильсаяс воча шуисны налы: «Ми ӧксылӧн дас чужанкотырыс. Ёнджыкасӧ сійӧ миян ӧксы, абу тіян. [Медводдза чужысьсянь петім ми, а энӧ ті.] Ті миянӧс нинӧмӧ пуктінныд. Ми ӧд водзджык шуим ӧксынымӧс бӧр вайӧдны». Но израильсаяс эз вермыны венны Иуда войтырӧс.