Ӧксыяслӧн 2 небӧг 17 - Коми Библия 2023

Ахитофеллӧн да Хушайлӧн вӧзйӧмъяс

¹ Ахитофел шуис Авессаломлы: «Лэдз меным босьтны аскӧд дас кык сюрс мортӧс. Талун войнас муна вӧтӧдны Давидӧс.

² Кор сійӧ ёна мудзас да эбӧстӧммас, ме виччысьтӧг уськӧдча сы вылӧ. Сійӧ повзяс меысь, и сылӧн йӧзыс пышъяласны. Сэки ме виа Давид ӧксыӧс.

³ Тадзи войтырыс сувтас тэ дор. Тэ ӧд ловсӧ босьтны кӧсъян сӧмын ӧти мортлысь. Сійӧ кӧ кулас, сэки став войтырыслы бур лоӧ».

⁴ Ахитофеллӧн вӧзйӧмыс сьӧлӧм вылас воис Авессаломлы да израильса став юрнуӧдысьлы.

⁵ Но Авессалом тшӧктіс корны тшӧтш Аркиысь Хушайӧс. Кывзам пӧ, мый сійӧ шуас.

⁶ Кор Хушай локтіс, Авессалом висьталіс сылы Ахитофеллысь вӧзйӧмсӧ. «Мый тэ шуан? Кывзыны-ӧ миянлы сійӧс?» – юаліс Авессалом.

⁷ Хушай вочавидзис: «Ахитофеллӧн вӧзйӧмыс абу бур.

⁸ Тэ ӧд тӧдан ассьыд батьтӧ да сылысь йӧзсӧ. Найӧ повтӧмӧсь да зэв скӧрӧсь, ошпиянсӧ воштӧм ош кодьӧсь [да видз вылын шӧйтысь скӧр кабан кодьӧсь]. Тэнад батьыд зэв сюсь веськӧдлысь, сійӧ оз ӧтилаын кут узьлыны аслас тышкайӧзкӧд.

⁹ Ӧні сійӧ, гашкӧ, кутшӧмкӧ кырта горсйын либӧ кӧнкӧ дзебсясьӧ. Тыш дырйи кӧ тэнад йӧзысь кодсюрӧ куласны, та йылысь дзик пыр паськалас юӧр. Кутасны шуны, Авессаломлысь тышкайӧзсӧ пӧ Давид пасьвартӧма.

¹⁰ Сэки тэнад йӧзысь медся повтӧмыс, кӧть сылӧн сьӧлӧмыс левлӧн кодь, усяс ловнас. Ӧд став Израиль войтыр тӧдӧ, мый тэнад батьыд да сылӧн йӧзыс вына тышкасьысьяс.

¹¹ Та вӧсна ме вӧзъя тэныд: войвыв Дансянь лунвыв Бер-Шеваӧдз став Израиль войтырсӧ чукӧрт ас дінад. Налӧн лыдыс мед лоӧ саридздор лыа мында. Ачыд накӧд тшӧтш мун.

¹² Ми корсям Давидӧс, кӧні эськӧ сійӧ эз дзебсясь. Кыдзи лысва усьӧ да вевттьӧ ставнас мусӧ, тадзи уськӧдчам Давид вылӧ да сылӧн йӧз вылӧ, и некод ловйӧн оз коль.

¹³ А дзебсяс кӧ сійӧ кутшӧмкӧ карӧ, сэки став Израиль войтыр локтас сэтчӧ гезъясӧн. Весиг ӧти из оз коль тайӧ карас, ставсӧ кыскалам ковтысӧ».

¹⁴ Авессалом да Израиль войтыр шуисны, Ахитофеллӧн вӧзйӧм дорысь пӧ Аркиысь Хушайлӧн вӧзйӧмыс бурджык. Медым бырӧдны Авессаломӧс, Господь татшӧм ногӧн торкис Ахитофеллысь бур вӧзйӧмсӧ.

Хушай ыстӧ юӧр Давидлы

¹⁵ Хушай висьталіс Садок да Авиатар попъяслы, мый Ахитофел вӧзйис Авессаломлы да израильса юрнуӧдысьяслы. Ассьыс вӧзйӧмсӧ тшӧтш висьталіс.

¹⁶ Сэсся шуис налы: «Мунӧй ӧдйӧджык да висьталӧй Давидлы, мед оз кольччы тайӧ войнас овтӧминӧ, но дзик пыр мед вуджас аслас йӧзкӧд Йӧрдан ю сайӧ. Вермасны вины ӧксыӧс да сылысь став йӧзсӧ».

¹⁷ Ионафанлы да Ахимааслы оз позь вӧлі мыччысьны карас, та вӧсна найӧ виччысисны юӧртысьӧс Рогель ва петанін дорын. На дінӧ локтіс кесйӧг ань да ставсӧ висьталіс налы. А найӧ тайӧ юӧрнас мунісны Давид дінӧ.

¹⁸ Ӧти том морт аддзыліс найӧс да висьталіс та йылысь Авессаломлы. Но зонъяс ӧдйӧ пышйисны сэтысь да локтісны Бахуримӧ сэтчӧс ӧти олысь дінӧ. Сэні йӧрас дзебсисны сылӧн ӧшмӧсӧ.

¹⁹ Гӧтырыс вевттис ӧшмӧс вомсӧ дӧраӧн да кояліс дӧра вылас шыдӧс, медым ӧшмӧсыс эз тыдав.

²⁰ Тайӧ керкаас локтісны Авессаломлӧн йӧзыс да юалісны аньлысь, кӧнӧсь Ахимаас да Ионафан. Мӧдыс вочавидзис, найӧ пӧ юсӧ келӧмӧн вуджисны. Авессаломлӧн йӧзыс корсисны зонъясӧс, но эз аддзыны. Сэсся бӧр локтісны Ерусалимӧ.

²¹ Налӧн мунӧм бӧрын зонъяс петісны ӧшмӧсысь да мунісны Давид ӧксы дінӧ. Сылы висьталісны, мый Ахитофел вӧзйис Авессаломлы, да тшӧктісны ӧдйӧджык вуджны ю мӧдлапӧлас.

²² Давид став аслас йӧзкӧд вуджис Йӧрдан ю сайӧ. Асылӧдзыс некод эз коль ю таладорас.

²³ Кор Ахитофел аддзис, мый сылысь вӧзйӧмсӧ ӧтдортісны, пуксис осёл вылӧ да муніс гортас, аслас карӧ. Гортсаясыслы висьталіс, мый вӧчны керканас, сэсся та бӧрти джагӧдчис. Сылысь шойсӧ пуктісны батьыслӧн дзебанінӧ.

²⁴ Давид локтіс Маханаимӧ, а Авессалом израильса тышкайӧзкӧд вуджис Йӧрдан ю сайӧ.

²⁵ Йоав пыдди тышкайӧзӧн веськӧдлыны Авессалом пуктіс Амессайӧс. Амессайлӧн батьыс вӧлі Изреельысь Йитрей, а мамыс вӧлі Авигея, Нахашлӧн ныв да Саруялӧн чой. Саруя вӧлі Йоавлӧн мам.

²⁶ Авессалом израильса тышкайӧзкӧд сувтіс Галаад муӧ.

²⁷ Кор Давид локтіс Маханаимӧ, сэтчӧ воисны аммон войтырлӧн Равва карысь Нахашлӧн Шови пиыс, Ло-Деварысь Аммиэллӧн Макир пиыс да Роглим карысь галаадса Барзиллай.

²⁸ Найӧ вайисны [водзвыв дасьтӧм дас] вольпась, [дас] тасьті да сёй дозъяс. Нӧшта вайисны пызь, шобді, ид, проса, анькытш, чечевица, пражитӧм тусь,

²⁹ ма, вый, ыжъясӧс да мӧс йӧлысь вӧчӧм сыр. Ставсӧ тайӧс вайисны, мед вердны Давидӧс да сылысь йӧзсӧ. Ас костаныс сёрнитісны, овтӧминын пӧ найӧ ёна мудзисны да тшыгъялісны.