Ӧксыяслӧн 2 небӧг 16 - Коми Библия 2023

Сивей нуӧ Давид йӧзлы сёян

¹ Олив керӧсысь лэччигӧн Давидлы паныдасис Сивей, Мепибошетлӧн кесйӧгыс. Кык осёл вылын сійӧ нуис кыксё тупӧсь нянь, сё ёкмыль изюм да сё ёкмыль косьтӧм инжир, нӧшта кучик дозйын вина.

² Ӧксы юаліс Сивейлысь: «Кытчӧ тэ нуан ставсӧ тайӧс?» Мӧдыс вочавидзис: «Осёлъяссӧ вая тэнад гортсаяслы, мед ветласны на вылын, няньсӧ да косьтӧм вотӧссӧ – тэнад тышкайӧзлы пӧткӧдчыны, а винасӧ – овтӧминын эбӧстӧмъясыдлы горшнысӧ веськӧдны».

³ Ӧксы юаліс: «Кӧні тэнад ыджыдыд?» Сивей вочавидзис: «Сійӧ Ерусалимӧ кольччис. Чайтӧ, мый ӧні израильсаяс пуктасны сійӧс ӧксыӧ, кыдзи коркӧ пуктісны сылысь Саул пӧльсӧ».

⁴ Сэки ӧксы шуис Сивейлы: «Ставыс, мый ӧнӧдз вӧлі Мепибошетлӧн, лоӧ тэнад». Сивей копыртчылӧмӧн воча шуис: «Ӧксыӧй-ыджыдӧй, тэ бур сьӧлӧма ме дінӧ! Мед и водзӧ лоас тадзи».

Шимей лёкӧдӧ Давидӧс

⁵ Кор Давид ӧксы воис Бахуримӧ, сылы воча петіс Герлӧн Шимей пиыс. Сійӧ вӧлі Саул рӧдысь. Шимей ветлӧдліс да быд ногыс лёкӧдіс Давидӧс.

⁶ Лыйліс сійӧс да сылысь йӧзсӧ изйӧн. Но Давид ӧксыӧс веськыдладорсяньыс и шуйгаладорсяньыс видзисны сылӧн тышкайӧзыс веськӧдлысьясныскӧд.

⁷ Шимей лёкӧдӧмӧн шуаліс Давидлы: «Весась, морт виысь! Весась, шогмытӧм морт!

⁸ Господь водзӧс перйӧ тэнсьыд Саул рӧдлысь вирсӧ кисьтӧмысь. Тэ пуксин ӧксыӧ Саул пыдди, но ӧні Господь сетіс ӧксыалӧмтӧ тэнад Авессалом пилы. Тэ морт виысь, та вӧсна тэнӧ суис тайӧ шогыс».

⁹ Саруялӧн Авишай пиыс шуис ӧксылы: «Кыдзи лысьтӧ тайӧ пон шойыс лёкӧдны тэнӧ, ӧксыӧй-ыджыдӧй! Муна да керышта сылысь юрсӧ».

¹⁰ Ӧксы шуис: «Мый ті ме понда шогсянныд, Саруя пиян? [Кольӧй сійӧс.] Мед лёкӧдас менӧ. Господь кӧ тшӧктіс лёкӧдны, вермас-ӧ кодкӧ юавны, мыйла сійӧ тадзи вӧчӧ».

¹¹ Сэсся Авишайлы да тышкайӧзлы Давид шуис: «Менам кӧ пиӧй, аслам вир-яйсянь чужысьӧй, корсьӧ вины менӧ, мый позьӧ виччысьны Веняминлӧн писянь? Кольӧй сійӧс. Мед лёкӧдас. Сылы, буракӧ, Господь тшӧктӧма.

¹² Гашкӧ, Господь аддзас, кыдзи увтыртӧны менӧ, да менӧ ёрӧмысь бурӧн мынтысяс меным».

¹³ Давид водзӧ муніс аслас йӧзкӧд. А Шимей вӧтчис Давид бӧрся керӧс пӧлӧн туй бокиті, лёкӧдіс сійӧс, лыйліс изъясӧн да кояліс муӧн.

¹⁴ Кор ӧксы да сылӧн йӧзыс воисны Йӧрдан ю дорӧ, сувтісны сэтчӧ шойччыны, ӧд вӧлі ёна мудзӧмаӧсь.

Авессалом Ерусалимын

¹⁵ Авессалом израильса тышкайӧзкӧд пырис Ерусалимӧ. Накӧд тшӧтш вӧлі Ахитофел.

¹⁶ Аркиысь Хушай, Давидлӧн ёртыс, локтіс Авессалом дінӧ да шуис сылы: «Мед олас ӧксы! Мед олас ӧксы!»

¹⁷ Авессалом воча шуис: «Со тадзи тэ и кесъялан Давид ёртыдлы! Мыйла эн мун сыкӧд?»

¹⁸ Хушай шуис: «Ме лоа сыкӧд, кодӧс бӧрйисны Господь, тайӧ тышкайӧзыс да став Израиль войтыр. Та вӧсна ме кольчча тэкӧд.

¹⁹ Ме кута кесъявны тэныд, ӧд тэ менам ёртлӧн пи. Кыдзи ме кесъялі тэнад батьыдлы, сідзи кута кесъявны и тэныд».

²⁰ Авессалом шыасис Ахитофел дінӧ: «Висьтав, мый водзӧ вӧчны».

²¹ Ахитофел вӧзйис: «Пыр батьыдлӧн кесйӧг-гӧтыръяс дінӧ, кодъясӧс сійӧ колис керка бӧрсяыс видзӧдны. Кор Израиль войтыр тӧдмалас, мый тэ вӧчин, гӧгӧрвоас, мый батьыд некор оз бурась тэкӧд. Сэки тэ дор сулалысьяс збойджыкӧсь лоасны».

²² Авессаломлы сувтӧдісны чом Давидлӧн керка вевт вылӧ. Израиль войтырлӧн син водзын Авессалом пыравліс тайӧ чомъяс да сэні узьліс батьыслӧн кесйӧг-гӧтыръяскӧд.

²³ Сійӧ кадас Ахитофел дінӧ шыасьлісны Ен дінӧ моз, ӧд Ахитофеллӧн быд шуӧм-вӧзйӧм вӧлі Енсянь шуӧм кодь. Тадзи вӧлі Давидлы, тадзи лои тшӧтш Авессаломлы.