Ӧксыяслӧн 2 небӧг 14 - Коми Библия 2023

Авессалом бӧр локтӧ Ерусалимӧ

¹ Саруялӧн Йоав пиыс казяліс, мый ӧксы оз вермы вунӧдны Авессаломӧс.

² Сійӧ тшӧктіс вайӧдны Текоя карысь сюсь мывкыда аньӧс. Сылы шуис: «Лэччысь бӧрдӧм улӧ. Пасьтав шогалан паськӧм, чӧскыд дука выйнад эн мавтчы. Петкӧдлы, быттьӧ тэ дыр кад нин бӧрдан кулысь вӧсна.

³ Мун ӧксы дінӧ да висьтав сылы, мый ме тэныд тшӧкта». Йоав велӧдіс аньӧс, мый шуны ӧксылы.

⁴ Текояысь ань локтіс ӧксы дінӧ, муӧдзыс уськӧдчӧмӧн копыртчис сылы да шуис: «Отсав меным, ӧксыӧй!»

⁵ «Кутшӧм мог суис тэнӧ?» – юаліс ӧксы. Мӧдыс висьталіс: «Ме [важӧн нин] дӧва, верӧсӧй кувліс.

⁶ Менам, тэнад кесйӧглӧн, коли кык пи. Ӧтчыдысь видз вылын найӧ тышӧ воисны. Торйӧдысьыс некод эз вӧв, сэки ӧтиыс кучкис мӧдсӧ да виис.

⁷ Та бӧрын став рӧдвужӧй сувтіс меным паныд. Найӧ шуалісны, сет пӧ миянлы питӧ, ассьыс воксӧ виысьӧс. Ми пӧ виам сійӧс вокыс вӧсна, мед сылы батьыслӧн овмӧсыс оз вудж. Ӧксыӧй, найӧ кӧсйӧны кусӧдны менсьым бӧръя бикиньсӧ, мед бырӧдны верӧслысь нимсӧ да сысянь чужысьӧс».

⁸ Ӧксы шуис аньлы: «Мун гортад. Ме тшӧкта тӧждысьны тэ вӧсна».

⁹ Но Текояысь локтӧм ань шуис ӧксылы: «Ӧксыӧй-ыджыдӧй, мед мыжыс кольӧ ме вылын да менам батьлӧн рӧд вылын. Тэнад мыжыс абу, и тэнад ыджыдалӧмын мыжыс абу».

¹⁰ Ӧксы шуис: «Тэ вылӧ кӧ кодкӧ кутас шуасьны, вайӧд сійӧс ме дінӧ. Водзӧ сійӧ оз кут тэнӧ дӧзмӧдны».

¹¹ Ань шуис: «Кора тэнӧ, ӧксыӧй, кыв сет аслад Господь Ен водзын, мый вир кисьтӧм вӧсна водзӧс перйӧм могысь оз кутны водзӧ виавны да оз вины менсьым пиӧс». Ӧксы воча шуис: «Ловъя Господь водзын кыв сета: тэнад пилӧн весиг ӧти юрси сі оз усь юр вывсьыс».

¹² Ань шуис: «Лэдз аслад кесйӧглы нӧшта мыйкӧ висьтавны тэныд, ӧксыӧй-ыджыдӧй».

¹³ «Висьтав», – шуис ӧксы. Ань шуис: «Мыйла тэ ачыд татшӧм ногӧн вӧчан Енлӧн войтыркӧд? Меным кыв сетӧмнад, ӧксыӧй, тэ асьтӧ мыждан. Ӧд тэ он сибӧд сійӧс, кодӧс коркӧ вӧтлін.

¹⁴ Ми ставным коркӧ кулам, лоам муӧ кисьтӧм ва кодьӧн, кодӧс бӧр он курав. Но Енмыс оз кӧсйы бырӧдны мортсӧ. Мӧдарӧ, Сійӧ зільӧ сибӧдны ӧтдортӧмаӧс.

¹⁵ Ме, тэнад кесйӧг, локті тэ дінӧ, ӧксыӧй-ыджыдӧй, медым висьтавны тайӧс. Йӧзыс повзьӧдлӧны менӧ, но ме шуи сёрнитны тэкӧд. Мӧвпышті, мый ӧксы отсалас меным,

¹⁶ кывзас да мездас менӧ лёк йӧзысь, кодъяс кӧсйӧны бырӧдны менӧ да менсьым пиӧс Енлӧн кӧсйысьӧм муысь.

¹⁷ Ме, тэнад кесйӧг, аслым шуи: ”Мед ӧксылӧн, менам ыджыдлӧн, шуӧмыс бурӧдас-лӧньӧдас менӧ. Ӧд менам ӧксыӧй-ыджыдӧй Енлӧн андел кодь, кужӧ торйӧдны бурсӧ лёксьыс”. Ӧксыӧй, мед Господь, тэнад Енмыд, лоӧ тэкӧд!»

¹⁸ Ӧксы воча шуис аньлы: «Эн дзеб меысь, ме кӧ мыйкӧ юала тэнсьыд». «Юав, ӧксыӧй-ыджыдӧй», – шуис ань.

¹⁹ «Эз-ӧ Йоав мӧдӧд тэнӧ?» – юаліс ӧксы. Ань вочавидзис: «Ӧксыӧй-ыджыдӧй, тэ водзын кыв сетӧмӧн шуа: тайӧ тадз. Тэнад Йоав кесйӧгыд тшӧктіс меным висьтавны ставсӧ тайӧс.

²⁰ Сійӧ вӧчис тадзи, мед мӧдар боксянь петкӧдлыны тэныд тайӧ лоӧмторсӧ. Но тэ, ыджыдӧй, Енлӧн андел кодь ыджыд мывкыдлуна. Тӧдан ставсӧ, мый вӧчсьӧ тайӧ муас».

²¹ Йоавлы ӧксы шуис: «Бур. Ме вӧча, кыдзи тэ шуин. Мун да бӧр вайӧд Авессаломӧс».

²² Йоав муӧдзыс уськӧдчӧмӧн копыртчис сылы да шуис: «Енмыс мед бурсиас тэнӧ, ӧксыӧй-ыджыдӧй! Ӧні ме тӧда, мый тэ бур сьӧлӧма ме дінӧ, ӧд тэ эн ӧтдорт менсьым корӧмӧс».

²³ Сэсся Йоав муніс Гешурӧ да вайӧдіс Авессаломӧс Ерусалимӧ.

²⁴ Ӧксы шуис: «Авессалом мед мунас аслас керкаӧ, но менам чужӧмбан водзӧ мед оз петкӧдчыв». Авессалом овмӧдчис аслас керкаӧ, но ӧксы дінӧ сійӧс эз лэдзны.

Давид бурсьӧлӧмтчӧ Авессалом дінӧ

²⁵ Израиль му пасьтала эз вӧв Авессаломысь мичаджыкыс да ошканаыс. Юр вывсяньыс да кок пыдӧсӧдзыс сылӧн ставыс вӧлі тыр-бур.

²⁶ Ӧтчыдысь вонас сійӧ шырліс юрсисӧ, кор юрсиыс ёна сьӧктӧдліс. Ӧксыӧн индӧм сикель серти кӧ артавны, шырӧм юрсиыслӧн сьӧктаыс вӧлі кыксё сикель.

²⁷ Авессаломлӧн чужисны куим пи да Фамар нима ӧти ныв. Фамар вӧлі зэв мича ань. [Сійӧ петіс Соломонлӧн Ровоам пи сайӧ да чужтіс сылы Авийӧс.]

²⁸ Кык во чӧж Авессалом оліс Ерусалимын, а ӧксыкӧд эз и аддзысьлы.

²⁹ Ӧтчыд Авессалом корис Йоавӧс, мед мӧдӧдны сійӧс ӧксы дінӧ. Но мӧдыс эз лок. Корис мӧдысь, но сійӧ бара эз лок.

³⁰ Сэки Авессалом шуис аслас кесйӧгъяслы: «Ті ӧд тӧданныд, мый Йоавлӧн муыс сулалӧ менам му бокын, сэні сылӧн ид быдмӧ. Мунӧй да сотӧй». Кесйӧгъяс мунісны да сотісны Йоавлысь ид мусӧ. [Йоавлӧн кесйӧгъясыс косялісны паськӧмнысӧ да локтісны Йоав дінӧ. Шуисны, Авессаломлӧн кесйӧгъясыс пӧ сотісны тэнсьыд мутӧ.]

³¹ Сэки Йоав локтіс Авессалом дінӧ гортас да юаліс: «Мыйысь тэнад кесйӧгъясыд сотісны менсьым ид муӧс?»

³² Авессалом вочавидзис: «Ме корлі тэнӧ, мед мӧдӧдны ӧксы дінӧ да юавны сылысь, мыйла сійӧ коркӧ корис менӧ Гешурысь. Меным сэні бурджык вӧлі. Ме кӧсъя аддзысьлыны ӧксыкӧд. Ме кӧ мыжа, мед сійӧ виас менӧ».

³³ Йоав муніс ӧксы дінӧ да ставсӧ висьталіс сылы. Ӧксы корис Авессаломӧс ас дорас. Мӧдыс локтіс да муӧдзыс копыртчис сылы. Ӧксы окыштіс Авессаломӧс.