Ӧксыяслӧн 2 небӧг 13 - Коми Библия 2023

Амнон да Фамар

¹ Авессаломлӧн, Давид пилӧн, вӧлі Фамар нима зэв мича чой. Сійӧс радейтіс Амнон, Давидлӧн мӧд пиыс.

² Амнонлӧн сьӧлӧмыс сы выйӧдз пессис Фамар чойыс вӧсна, мый тайӧ вӧлі сылы висьӧм кодь. Амнон эз тӧд, кыдзи сибӧдчыны Фамар дінӧ, ӧд сійӧ вӧлі ныв на.

³ Амнонлӧн вӧлі Ионадав нима ёрт, Давидлӧн Шимей вокыслӧн пиыс. Ионадав вӧлі зэв сюсь.

⁴ Сійӧ юаліс Амнонлысь: «Висьтав, ӧксы пиӧй, мыйысь тэ лунысь-лун косьман?» Амнон шуис: «Авессалом воклысь Фамар чойсӧ ме радейта».

⁵ Ионадав дзик пыр вӧзйис сылы: «Тэ вод аслад вольпасьӧ да лэччысь висьӧм улӧ. Кор батьыд локтас видлыны тэнӧ, шу сылы: ”Ысты ме дінӧ Фамар чойӧс, медым сійӧ вердас менӧ. Сійӧ мед дасьтас сёян менам син водзын, и ме кута сёйны сылӧн киысь”».

⁶ Амнон водіс вольпасяс да лэччысис висьӧм улӧ. Кор ӧксы локтіс видлыны сійӧс, мӧдыс шуис: «Ысты ме дінӧ Фамар чойӧс, мед сійӧ пӧжалас ме дырйи кык-куим сӧчӧн, сэсся вердас менӧ».

⁷ Давид мӧдӧдіс мортӧс да тшӧктіс висьтавны, мед Фамар мунас Амнон вокыс дінӧ да дасьтас сылы сёян.

⁸ Фамар муніс Амнон ордӧ да аддзис, мый сійӧ куйлӧ. Фамар босьтіс пызь, кӧтіс нянь да вокыслӧн син водзын вӧчаліс сӧчӧнъяс. Сэсся пӧжалӧм сӧчӧнъяссӧ

⁹ рачын вайис Амнонлы, но сійӧ эз кут сёйны. «Петӧй татысь ставныд!» – шуис Амнон. Кор ставныс петісны,

¹⁰ сійӧ шуис Фамарлы: «Пырт меным сӧчӧнъястӧ пыді жыръяс. Ме тэнад киысь кута сёйны». Фамар босьтіс пӧжалӧм сӧчӧнъяссӧ да пыртіс Амнон вокыслы пыді жыръяс.

¹¹ Кор Фамар матыстчис Амнон дінӧ, мӧдыс кватитіс сійӧс да шуис: «Лок, вод ме дінӧ, чойӧй».

¹² Фамар шуис: «Эн янӧд менӧ, вокӧй! Израильын тадзи оз вӧчны. Эн вӧч тайӧ пежторсӧ!

¹³ Ме сэсся некор ог мын тайӧ яналӧмсьыс. А тэнӧ став Израиль войтыр кутас нимтыны йӧйӧн. Сёрнит ӧксыкӧд, сійӧ сетас менӧ тэ сайӧ».

¹⁴ Но Амнон эз кут кывзыны Фамарӧс, а мырдӧналіс сійӧс.

¹⁵ Та бӧрын Амнон пытшкын кыптіс Фамар дінӧ мустӧмлун, мый синнас эз вермы видзӧдны сійӧс. Мустӧмтӧмыс лои вынаджык радейтӧм дорсьыс. Амнон шуис: «Чеччы да мун татысь».

¹⁶ Фамар воча шуис: «[Вокӧй!] Эн вӧтлы менӧ! Тэ кӧ вӧтлан менӧ, лёкджыктор на вӧчан менӧ мырдӧналӧм дорысь». Но Амнон весиг эз кӧсйы кывзыны Фамарӧс.

¹⁷ Сэсся корис кесйӧгсӧ да шуис: «Вӧтлы тайӧс татысь да йигнав ӧдзӧссӧ».

^18-19 Кесйӧг петкӧдіс Фамарӧс да йигналіс сы бӧрся ӧдзӧссӧ. Фамар кояліс ассьыс юрсӧ пӧимӧн да косяліс уна рӧма кузь паськӧмсӧ – татшӧм паськӧм новлісны ӧксы нывъяс, кодъяс эз на вӧвны верӧс сайын. Сійӧ муніс юрас кутчысьӧмӧн да ырзӧмӧн бӧрдіс.

²⁰ Авессалом вокыс юаліс: «Эз-ӧ Амнон тэныд лёктор вӧч? Но тэ чӧв ов та йылысь, чойӧй, сійӧ ӧд тэнад вок. Дугды шогсьынытӧ». Фамар оліс Авессалом вокыс ордын эновтӧм ань моз.

²¹ Кор Давид ӧксы тӧдмаліс тайӧ лоӧмтор йывсьыс, ёна скӧрмис [но эз кӧсйы шогӧдны Амнонӧс, ӧд радейтіс ассьыс медыджыд писӧ].

²² Авессалом дугдіс сёрнитны Амнонкӧд, ӧд сійӧ ёна мустӧмтіс Амнонӧс Фамар чойсӧ янӧдӧмысь.

Авессалом виӧ Амнонӧс

²³ Кык во мысти Ваал-Хацор карын Ефрем му дорын шырисны Авессаломлысь ыжъяссӧ. Авессалом лӧсьӧдіс гаж да корис сэтчӧ ӧксылысь став пиянсӧ.

²⁴ Авессалом локтіс ӧксы дінӧ да шуис: «Ӧні менам, тэнад кесйӧглӧн, ыж шыран кад. Кора тэнӧ, ӧксыӧй, аслад йӧзкӧд волы ме ордӧ».

²⁵ Ӧксы шуис: «Ставным огӧ мунӧй. Ог кӧсйы сьӧктӧдны тэнӧ, пиӧй». Авессалом ёна корис, но ӧксы сулаліс аслас шуӧм кыв вылын. Сӧмын бурсиис писӧ.

²⁶ Авессалом шуис: «Сідзкӧ, мед Амнон вокӧй мунас мекӧд». Ӧксы юаліс: «Мыйла сылы тэкӧд муннысӧ?»

²⁷ Но мӧдыс корӧмӧн-корис. Сэки ӧксы ыстіс Амнонӧс да ассьыс мукӧд пиянсӧ Авессаломкӧд. [Авессалом лӧсьӧдіс ӧксылы кодь ыджыд гаж.]

²⁸ Аслас кесйӧгъяслы Авессалом шуис: «Видзӧдӧй Амнон бӧрся, и кор сійӧ коддзас, ме тшӧкта тіянлы вины сійӧс. Энӧ полӧй, ӧд тайӧ менам тшӧктӧм. Лоӧй повтӧмӧсь да зумыдӧсь!»

²⁹ Кесйӧгъяс вӧчисны Авессаломлӧн тшӧктӧм серти. Сэки ӧксылӧн пиян быдӧн сӧліс аслас мул вылӧ да пышйис.

³⁰ Кор найӧ вӧліны туйынӧсь на, Давид ӧксылы висьталісны, Авессалом пӧ виӧма ӧксылысь став пиянсӧ, некод пӧ ловйӧн абу кольӧма.

³¹ Сэки ӧксы косяліс ассьыс паськӧмсӧ да кымынь уськӧдчис муас. Сыкӧд орччӧн сулалысь кесйӧгъяс тшӧтш косялісны паськӧмнысӧ.

³² Но Ионадав, Давидлӧн Шимей вокыслӧн пиыс, шуис: «Ыджыдӧй, эн эскы, мый тэнсьыд став пиянтӧ виисны. Сӧмын Амнонӧс виисны. Сійӧ лунсяньыс, кор Амнон мырдӧналіс-янӧдіс Авессаломлысь Фамар чойсӧ, Авессалом шуис вины сійӧс.

³³ Эн шогсьы, ӧксыӧй-ыджыдӧй, аслад пиян вӧсна. Найӧ ловъяӧсь. Сӧмын Амноныд куліс,

³⁴ Авессаломыд жӧ пышйис». Карсӧ видзысьясысь ӧти видзӧдліс да аддзис керӧсвыв туйӧд лэччысь уна йӧзӧс. [Карсӧ видзысь локтіс да юӧртіс ӧксылы, ме пӧ аддзылі Орон туйӧд керӧс вывсянь локтысь йӧзӧс.]

³⁵ Сэки Ионадав шуис ӧксылы: «Тайӧ ӧксы пиян локтӧны. Ме жӧ шулі!»

³⁶ Тайӧс шуӧм бӧрын ырзӧмӧн бӧрдігтыр пырисны Давид ӧксылӧн пияныс. Ачыс ӧксы да сылӧн кесйӧгъяс тшӧтш кутісны ырзӧмӧн бӧрдны.

^37-38 Авессалом пышйис [Маака муӧ] гешурса ӧксы дінӧ, Аммиудлӧн Талмай пи дінӧ, да оліс сэні куим во. Давид дыр шогсис Амнон пиыс вӧсна.

³⁹ Но кор дугдіс шогсьынысӧ, сійӧ эз нин кӧсйы водзӧс перйыны Авессаломлысь.