Ӧксыяслӧн 2 небӧг 10 - Коми Библия 2023

Давид вермӧ аммон да арамей войтыръясӧс

¹ Кад мысти куліс аммон войтырлӧн ӧксыыс, и сы пыдди пуксис ӧксыӧ сылӧн Ханун пиыс.

² Давид шуис: «Ме бурсьӧлӧмтча Ханун дінӧ, ӧд сылӧн Нахаш батьыс вӧлі бур сьӧлӧма ме дінӧ». Давид мӧдӧдіс кесйӧгъяссӧ, медым Ханункӧд тшӧтш юкны шогсӧ сылӧн батьыс вӧсна. Кор Давидлӧн кесйӧгъяс локтісны аммон войтырлӧн муӧ,

³ сэтчӧс юралысьяс шуисны асланыс Ханун ыджыдлы: «Тэ чайтан, Давид збыльысь пыдди пуктӧ тэнсьыд батьтӧ и та вӧсна мӧдӧдіс тэ дінӧ ассьыс йӧзсӧ? Сійӧ мӧдӧдіс найӧс кыйӧдчысьясӧс моз, мед видзӧдлыны карнымӧс, а сэсся бырӧдны сійӧс».

⁴ Ханун босьтіс Давидлысь кесйӧгъяссӧ, быдӧнлысь шырис тош джынсӧ да улісяньыс коскӧдзыс вундіс налысь паськӧмнысӧ шӧрипельӧ. Сэсся бӧр ыстіс найӧс.

⁵ Давидлы кор юӧртісны, мый сылысь кесйӧгъяссӧ татшӧм ногӧн янӧдӧмаӧсь, сэки налы воча мӧдӧдіс йӧзӧс. Ӧксы тшӧктіс висьтавны, медым сылӧн янӧдӧм кесйӧгъясыс кольччасны Ериконӧ да оласны сэні, кытчӧдз оз быдмы тошныс, а сэсся вермасны бӧр локны.

⁶ Аммонсаяс казялісны, мый найӧ лоины мустӧмӧсь Давидлы. Найӧ медалісны отсӧг вылӧ Бет-Реховысь да Цоваысь кызь сюрс пода арамейӧс, Маакаысь [амаликъяслӧн] ӧксылысь – сюрс тышкамортӧс да Истовысь – дас кык сюрс тышкамортӧс.

⁷ Кор Давид кыліс та йылысь, мӧдӧдіс налы паныд Йоавӧс да став ассьыс тышкайӧзсӧ.

⁸ Аммон тышкайӧз сувтісны карса дзиръя дорӧ. Цоваысь да Реховысь арамейяс, Истовысь да Маакаысь медалӧм йӧз сувтісны эрд вылӧ, наысь торйӧн.

⁹ Йоав аддзис, мый вӧрӧг локтӧ кыкладорсянь – водзысяньыс и бӧрсяньыс. Сэки сійӧ бӧрйис израильса тышкайӧзысь медбуръяссӧ да сувтӧдіс найӧс арамейяслы паныд.

¹⁰ А мукӧдсӧ сетіс Авишай вокыслы, мед сійӧ сувтас накӧд аммон тышкайӧзлы паныд.

¹¹ Йоав шуис Авишайлы: «Арамейяс кӧ кутасны вермыны менӧ, тэ отсалан меным, а аммон тышкайӧз кӧ кутасны вермыны тэнӧ, ме локта тэныд отсӧг вылӧ.

¹² Эн пов. Кутам зумыда сулавны асланым войтыр вӧсна, миян Енлӧн каръяс вӧсна. А Господь вӧчас, кыдзи Сылы колана».

¹³ Йоав аслас тышкайӧзкӧд уськӧдчис арамейяс вылӧ, и найӧ пышйисны сыысь.

¹⁴ Аммон тышкайӧз аддзисны арамейяслысь пышйӧмсӧ, и найӧ тшӧтш пышйисны Авишайысь да локтісны асланыс карӧ. Йоав эз кут вӧтчыны на бӧрся, сійӧ бӧр муніс Ерусалимӧ.

¹⁵ Кор арамейяс аддзисны, мый израильсаяс вермисны найӧс, шуисны ӧтувтчыны.

¹⁶ Ададезер ӧксы корис мукӧд арамейясӧс [Халамак] ю сайысь. Найӧ локтісны Хеламӧ. Наӧн веськӧдліс Шовак, Ададезер тышкайӧзлӧн юралысь.

¹⁷ Давидлы кор юӧртісны та йылысь, сійӧ чукӧртіс став израильса тышкайӧзсӧ, вуджис накӧд Йӧрдан ю сайӧ да локтіс Хеламӧ. Арамейяс сувталісны, мед петны Давидлы паныд тышӧ.

¹⁸ Давид пасьвартіс арамейясӧс, и найӧ пышйисны израильсаясысь. Давид бырӧдіс налысь сизимсё тарантас да нелямын сюрс верзьӧмаӧс. Виис тшӧтш Шовакӧс, тышкайӧзлысь юралысьсӧ.

¹⁹ Кор Ададезерлӧн киподувса ӧксыяс аддзисны, мый израильсаяс вермисны найӧс, сэки сёрнитчисны израильсаяскӧд, мед пом пуктыны тышныслы, сэсся сетчисны налы. Арамейяс сэсся эз нин лысьтны отсавны аммон войтырлы.