Ӧксыяслӧн 1 небӧг 8 - Коми Библия 2023

Израиль войтыр корӧ ӧксыӧс

¹ Кор Самуил пӧрысьмис, сійӧ пуктіс ассьыс пиянсӧ Израиль войтырлы ёрдысьясӧ.

² Ыджыд пиыслӧн нимыс вӧлі Йоиль, ичӧтыслӧн – Авий. Найӧ вӧліны ёрдысьясӧн Бер-Шеваын.

³ Найӧ эз ветлыны батьыслӧн туйӧд да эз веськыда мыждыны йӧзсӧ, а сетчисны горшасьӧмӧ да босьтісны козинъяс.

⁴ Израильса юрнуӧдысьяс чукӧртчисны да мунісны Самуил дінӧ Рамаӧ.

⁵ Найӧ шуисны сылы: «Тэ пӧрысь нин, а тэнад пияныд оз ветлыны тэнад туйӧд. Инды ӧксыӧс, мед сійӧ лоас миянлы ёрдысь-веськӧдлысьӧн. Мукӧд войтыръяслӧн тай эмӧсь ӧксыяс».

⁶ Самуиллы эз во сьӧлӧм вылас, мый войтырыс корӧ ӧксыӧс, коді кутас веськӧдлыны наӧн. Сэки сійӧ шыасис Господь дінӧ.

⁷ Господь шуис Самуиллы: «Вӧч ставсӧ налӧн корӧм серти. Найӧ оз тэнӧ ӧтдортны, а Менӧ, медым Ме эг вӧв налӧн ӧксыӧн.

⁸ Сійӧ кадсяньыс, кор Ме петкӧді найӧс Египетысь, найӧ унаысь эновтлісны Менӧ да юрбитлісны мукӧд енъяслы. Найӧ ӧнӧдз тадзи вӧчӧны. Кыдзи найӧ вӧчисны Мекӧд, тадзи вӧчӧны и тэкӧд.

⁹ Вӧч налӧн корӧм серти. Но ӧлӧд найӧс да висьтав, мый вӧчас налы ӧксы, коді кутас ыджыдавны на вылын».

¹⁰ Самуил юӧртіс Господьлысь кывъяссӧ войтырыслы, коді корис сылысь ӧксыӧс.

¹¹ Сійӧ висьталіс налы: «Со, мый вӧчас ӧксы, коді кутас ыджыдавны тіян вылын: сійӧ босьтас тіянлысь пияннытӧ аслас тышкайӧз лыдӧ. Ӧтиясӧс сійӧ индас веськӧдлыны тарантасъясӧн, мӧдъясӧс пуктас верзьӧмаясӧ, а коймӧдъяслы тшӧктас котӧртны аслас тарантас водзын.

¹² Ӧтиясӧс сійӧ сувтӧдас веськӧдлыны сюрс тышкамортӧн, мӧдъясӧс – ветымынӧн. Сійӧ тшӧктас пиянныдлы гӧрны ассьыс муяссӧ да вундыны няньсӧ, вӧчны шыпуртъяс, мукӧд тышкасянтор да тарантасъяслы коланаторъяс.

¹³ Ӧксы босьтас тіянлысь нывъяснытӧ, медым найӧ дасьтасны чӧскыд дука мавтасъяс, пуасны сёян да пӧжаласны нянь.

¹⁴ Сійӧ босьтас тіянлысь медбур муяснытӧ, виноград да олив йӧръяснытӧ да сетас аслас кесйӧгъяслы.

¹⁵ Тіян мувыв быдтасысь да виноград вотӧсысь босьтас дасӧд юкӧнсӧ да сетас аслас ыджыд чина йӧзлы да аслас кесйӧгъяслы.

¹⁶ Тіянлысь кесйӧгъяснытӧ – айуловӧс и аньясӧс, медбур зонъяснытӧ да тіянлысь осёлъяснытӧ босьтас да кутас уджӧдны ас вылас.

¹⁷ Тіян ыжъясысь дасӧд юкӧнсӧ сійӧ аслыс босьтас, а асьныд ті лоанныд кесйӧг туйынӧсь.

¹⁸ Ті кутанныд ойзыны асланыд ӧксыысь, кодӧс ті бӧрйинныд, но Господь сэки оз вочавидз тіянлы».

¹⁹ Израиль войтыр эз кӧсйы кывзыны Самуилӧс, найӧ шуисны: «Мед ӧксы ыджыдалас миян вылын.

²⁰ Сэки ми мукӧд войтыр кодь лоам: ӧксы лоас миянлы ёрдысьӧн, кутас ветлыны миянкӧд тышъясӧ да веськӧдлыны сэні».

²¹ Самуил кывзіс войтырыслысь кывъяссӧ, сэсся ставсӧ висьталіс Господьлы.

²² Господь шуис Самуиллы: «Кывзы найӧс. Пукты налы ӧксыӧс». Сэки Самуил тшӧктіс Израиль войтырлы быдӧнлы мунны аслас карӧ.