Ӧксыяслӧн 1 небӧг 7 - Коми Библия 2023

¹ Киръят-Яримын олысьяс локтісны да босьтісны Господьлысь кудсӧ. Вайисны сійӧс ыб вылын сулалысь Авинадав керкаӧ. Авинадавлысь Элазар писӧ вежӧдісны да пуктісны видзны Господьлысь кудсӧ.

Самуил веськӧдлӧ Израиль войтырӧн

² Енлысь кудсӧ Киръят-Яримӧ вайӧмсянь коли уна кад, кызь во. Став Израиль войтыр бергӧдчис Господьлань.

³ Самуил шуис налы: «Ті кӧ став сьӧлӧмнад кӧсъянныд бергӧдчыны Господьлань, сідзкӧ, эновтчӧй мукӧд войтырлӧн енъясысь, тшӧтш Астарта идолысь. Веськӧдӧй сьӧлӧмнытӧ Господьлань да сӧмын Сылы кесъялӧй-юрбитӧй. Сэки Сійӧ мездас тіянӧс филистимсаясысь».

⁴ Израиль войтыр бырӧдаліс Ваал да Астарта бӧлбанъясӧс, кутіс кесъявны-юрбитны сӧмын Господьлы.

⁵ Самуил шуис: «Чукӧртӧй Израиль войтырӧс Миспаӧ. Сэні ме кевмыся тіян вӧсна Господьлы».

⁶ Израильсаяс локтісны Миспаӧ. Сэні найӧ гумлалісны ва да кисьталісны му вылӧ Господь водзын, тайӧн петкӧдлісны мыжсьыныс бергӧдчӧмнысӧ. Сійӧ лунӧ найӧ видзалісны да висьтасисны, ми пӧ мыж вӧчим Господьлы паныд. Тадзи Миспа карын Израиль войтыр чукӧртчис Самуил ёрдысь водзӧ.

⁷ Филистимсаяслы кывсис, мый израильсаяс чукӧртчӧмаӧсь Миспаӧ. Сэки налӧн юралысьясныс тышкайӧзкӧд петісны Израильлы паныд. Кор израильсаяс кылісны та йылысь, ёна повзисны.

⁸ Самуиллы шуисны: «Дугдывтӧг кевмысь миян вӧсна Господьлы, миян Енлы, медым Сійӧ мездас миянӧс филистимсаясысь». [Самуил шуис: «Мед оз ло сэтшӧмторйыс, мый ме кежа Господьысь, аслам Енмысь, да дугда кевмысьны тіян вӧсна».]

⁹ Самуил босьтіс нёньпом баляӧс да вайис [войтырыскӧд] Господьлы сотан вись пыдди. Самуил кевмысьӧмӧн шыасис Господь дінӧ Израиль вӧсна, и Господь кыліс Самуилӧс.

¹⁰ Самуиллӧн вись вайӧм дырйи филистимсаяс матыстчисны израильсаяс дінӧ, медым уськӧдчыны на вылӧ. Но сійӧ лунӧ Господь чорыда гымаліс филистимсаяс весьтын. Найӧ ёна повзисны. Тадзи израильсаяс вермисны филистимсаясӧс.

¹¹ Найӧ вӧтчисны филистимсаяс бӧрся Миспасянь Бет-Кар дорӧдз, вӧтӧдігас унаӧс виисны.

¹² Самуил босьтіс из да сувтӧдіс сійӧс Миспа да Шен каръяс костӧ. Самуил сетіс изйыслы Эвен-Эзер ним да шуис, тайӧ местаӧдзыс пӧ Господь отсаліс миянлы.

¹³ Тадзи вӧлі вермӧма филистимсаясӧс. Та бӧрти найӧ эз нин усьласьны Израиль му вылӧ. Самуиллӧн став олан лунъяс дырйи Господь чорыд кабырын кутіс филистимсаясӧс.

¹⁴ Экронсянь Гефӧдз босьтӧм каръяссӧ филистимсаяс бӧр сетісны Израильлы. Израиль мездіс филистимсаяслӧн кипод улысь тшӧтш нагӧгӧрса муяссӧ. Аморейяскӧд израильсаяс тшӧтш олісны лӧня.

¹⁵ Став аслас олӧм чӧж Самуил вӧлі ёрдысьӧн Израиль войтырлы,

¹⁶ та вӧсна сійӧ быд во кытшовтліс Вефиль, Галгал да Миспа каръяс.

¹⁷ Самуил оліс Рама карын, сэні сійӧ тшӧтш вӧлі ёрдысьӧн. Рама карын Самуил сувтӧдіс Господьлы висьпуктанін.