Ӧксыяслӧн 1 небӧг 4 - Коми Библия 2023

Йитӧд куд мырддьӧм

¹ [Филистимсаяс чукӧртчисны, мед тышкасьны израильсаяскӧд.] Самуил сёрнитіс став Израиль войтыркӧд, и израильсаяс петісны тышӧ филистимсаяслы паныд. Израильса тышкайӧз сувтісны Эвен-Эзер бокӧ, а филистимсаяс – Афек бокӧ.

² Филистимса тышкайӧз уськӧдчисны израильсаяс вылӧ. Пансис тыш. Найӧ пасьвартісны израильсаясӧс, виисны нёль сюрс гӧгӧр мортӧс.

³ Кор израильса тышкайӧз бӧр косісны асланыс чукӧртчанінӧ, израильса юрнуӧдысьяс шуисны: «Мый понда Господь талун лэдзис филистимсаяслы вермыны миянӧс? Мунамӧй да ваямӧй Силом карысь Господьлысь Йитӧд кудсӧ. Кудйыс кӧ лоӧ миян ордын, сійӧ мездас миянӧс вӧрӧг киысь».

⁴ Херувимъяс вылын пукалысь Господь Саваофлӧн Йитӧд кудла мӧдӧдісны йӧзӧс Силомӧ. Кудсӧ вайысьяскӧд тшӧтш локтісны Офни да Пинес, Илийлӧн пияныс.

⁵ Кор Господьлысь Йитӧд кудсӧ вайисны тышкайӧзлӧн чукӧртчанінӧ, израильсаяс нимкодясьӧмӧн гораа горзісны, мый весиг муыс вӧрис.

⁶ Филистимсаяс кылісны горзӧмсӧ да шуисны: «Мыйла еврейяс татшӧма горзӧны?» Кор филистимсаяс тӧдмалісны Господьлӧн куд йылысь,

⁷ найӧс полӧм босьтіс. Найӧ шуалісны: «Енмыс локтіс израильса тышкайӧз чукӧртчанінӧ. Курыд шог миянлы! Татшӧмыс некор на эз вӧвлы.

⁸ Курыд шог миянлы! Коді мездас миянӧс тайӧ вына Енсьыс? Ӧд тайӧ Енмыс уна ногӧн чорыда мыждыліс египетсаясӧс овтӧминын.

⁹ Филистимсаяс, энӧ полӧй! Вермасьӧй повтӧг, медым ми эгӧ шедӧй еврейяслӧн кипод улӧ, кыдзи найӧ вӧліны миян кипод улынӧсь».

¹⁰ Филистимсаяскӧд бара пансис тыш, и найӧ дзикӧдз пасьвартісны израильсаясӧс. Комын сюрс пода усис тышын, мукӧдыс пышйисны гортаныс.

¹¹ Филистимсаяс мырддисны Енлысь кудсӧ, а Илийлысь Офни да Пинес пиянсӧ виисны.

¹² Сійӧ жӧ лунӧ Венямин чужанкотырысь ӧти морт тэрмасьӧмӧн локтіс тышкасянінысь Силомӧ. Паськӧмсӧ сійӧ вӧлі косялӧма, юрсӧ коялӧма муӧн.

¹³ Илий сэки пукаліс карса дзиръя дорын аслас пуклӧсын. Сійӧ видзӧдіс туй вылӧ да виччысис юӧр вайысьӧс, ӧд поліс Енлӧн куд вӧсна. Кор тышысь воӧм морт висьталіс карса олысьяслы израильсаясӧс пасьвартӧм йылысь, йӧзыс ырзӧмӧн кутісны бӧрдны.

¹⁴ Илий кыліс бӧрдӧмсӧ да юаліс, мыйла йӧзыс татшӧма бӧрдӧны. Сэки сы дінӧ матыстчис юӧр вайысь да ставсӧ висьталіс сылы.

¹⁵ Илийлы вӧлі ӧкмысдас кӧкъямыс арӧс. Синнас сійӧ эз нин аддзы.

¹⁶ Юӧр вайысь шуис: «Ме сӧмын на локті тышкасянінысь, пышйи сэтысь». Илий юаліс: «Мый лои, пиӧй?»

¹⁷ Мӧдыс вочавидзис: «Израильса тышкайӧз пышйисны филистимсаясысь. Миянлысь унаӧс виисны, тэнад Офни да Пинес пияныд тшӧтш кулісны. Енлысь кудсӧ филистимсаяс босьтісны».

¹⁸ Мыйӧн Илий кыліс Енлӧн куд йылысь, сійӧ гатш усис пуклӧссьыс дзиръя дорӧ. Аслас сьӧкта да пӧрысьлун вӧснаыс сійӧ песовтіс сьылідзирсӧ да куліс. Нелямын во чӧж Илий вӧлі ёрдысьӧн Израиль войтырлы.

¹⁹ Илийлӧн моньыс, Пинес пиыслӧн гӧтырыс, буретш нӧбасис, чужтан кад нин вӧлі. И кор сійӧ кыліс, мый Енлысь кудсӧ мырддьӧмаӧсь, а сылӧн айкаыс да верӧсыс кулӧмаӧсь, сійӧс чорыда топӧдіс чужтан дойыс. Сійӧ усис пидзӧс вылас да чужтіс.

²⁰ Кор сійӧ вӧлі куланвыйын, сы дінын отсасьысь аньяс шуалісны: «Эн шогсьы. Тэнад пи чужис». Но мӧдыс чӧв оліс.

²¹ Пиыслы Икавод нимсӧ сетігӧн шуис: «Вешйис Израиль войтыр дінысь Енлӧн дзирдлуныс». Тадзи шуис, ӧд Енлысь кудсӧ вӧлі мырддьӧма, а айкаыс да верӧсыс кулісны.

²² Та вӧсна и шуис: «Вешйис Израиль войтыр дінысь Енлӧн дзирдлуныс, ӧд Енлысь кудсӧ мырддьӧма».