Ӧксыяслӧн 1 небӧг 29 - Коми Библия 2023

Филистимсаяс ӧтдортӧны Давидӧс

¹ Филистимсаяс чукӧртісны став ассьыныс тышкайӧзсӧ Афекӧ, а израильсаяс сувтісны чукӧрнас Изреельӧ ва петанін дорӧ.

² Филистимса юралысьяс мунісны тышкайӧзныскӧд, быдӧн веськӧдліс сё либӧ сюрс мортӧн. А Давид аслас йӧзкӧд да Акиш ӧксыкӧд мунісны на бӧрся.

³ Филистимса юралысьяс кутісны шуасьны: «Мыйсяма еврейяс мунӧны миянкӧд?» Акиш вочавидзис налы: «Онӧ ӧмӧй тӧдӧй? Тайӧ ӧд Давид, израильса Саул ӧксылӧн кесйӧгыс. Сійӧ воысь дырджык нин олӧ ме дорын да локтӧмсяньыс бура кесъялӧ меным».

⁴ Филистимса юралысьяс скӧрмисны Акиш вылӧ да шуисны: «Ысты сійӧс бӧр. Мед мунас сэтчӧ, кытчӧ тэ сійӧс овмӧдін. Сылы оз позь миянкӧд ӧтвыв петны тышӧ, вермас миянлы паныд сувтны. Сэсся миянӧс виалӧмнас бурмӧдас аслас ыджыдлысь сьӧлӧмсӧ.

⁵ Тайӧ Давид йывсьыс ӧд коркӧ йӧзыс йӧктӧмӧн сьылісны, Саул пӧ вермис сюрсъясӧс, а Давид пӧ – дас сюрсъясӧс».

⁶ Акиш корис Давидӧс да шуис: «Ловъя Господь водзын шуа, мый тэ веськыд морт, и ме эськӧ кӧсйи, мед тэ ветлін мекӧд тышъясӧ. Локтӧмсяньыд тэ бура кесъялан меным, но мукӧд юралысьыс мустӧмтӧны тэнӧ.

⁷ Бӧр бергӧдчы, мед оз скӧрмыны найӧ. Мун лӧнь сьӧлӧмӧн».

⁸ «Мыйысь ме мыжми? – юаліс Давид. – Эг-ӧ ме локтӧмсянь бура кесъяв тэныд, ӧксыӧй-ыджыдӧй? Мыйла ме ог вермы мунны да тышкасьны тэнад вӧрӧгыдкӧд?»

⁹ Акиш вочавидзис: «Тӧд, тэ меным Енлӧн андел кодь бур. Но филистимса юралысьяс шуисны, мый тэныд оз позь миянкӧд ӧтвыв петны тышӧ.

¹⁰ Аски асывнас чеччы да мун Саул ыджыдыдлӧн кесйӧгъяскӧд, кодъяс локтісны тэкӧд тшӧтш. [Мунӧй сійӧ карас, кытчӧ ме тіянӧс овмӧді. Эн босьт сьӧлӧмад юралысьяслысь сёрнисӧ. Ме тӧда, мый тэ бура кесъялан.] Асывнас югдӧм бӧрас петӧй туйӧ».

¹¹ Давид аслас йӧзкӧд чеччисны асывнас да бӧр мунісны Филистим муӧ. А филистимсаяс мунісны [тышкасьны] Изреельӧ.