Ӧксыяслӧн 1 небӧг 28 - Коми Библия 2023

¹ Сійӧ кадас филистимсаяс чукӧртісны тышкайӧзӧс, медым уськӧдчыны Израиль вылӧ. Акиш ӧксы шуис Давидлы: «Кывзы, тэныд да тэнад йӧзлы ковмас мунны мекӧд тышӧ».

² Давид вочавидзис Акишлы: «Талун тэ аддзан, мый вылӧ сяммӧ тэнад кесйӧгыд». Акиш шуис Давидлы: «Таысь ме пукта тэнӧ пыр кежлӧ менӧ видзысьӧ».

Саул мунӧ кулӧмаӧс корысь ань дінӧ

³ Самуил кор куліс, став Израиль ёна бӧрдіс-шогсис сы вӧсна. Дзебисны сійӧс аслас Рама карӧ. Та бӧрын Саул вӧтлаліс аслас муысь кулӧмаӧс корысьясӧс да тунасьысьясӧс.

⁴ Филистимсаяс чукӧртчисны, локтісны Шунем карӧ да сувтісны сэтчӧ. Саул чукӧртіс израильса тышкайӧзӧс да сувтіс накӧд Гелву керӧс вылӧ.

⁵ Саул кор аддзис филистимса тышкайӧзӧс, ёна повзис, сьӧлӧмыс чеччыны кутіс.

⁶ Сэки сійӧ шыасис Господь дінӧ, но Господь сылы эз вочавидз вӧт пыр ни уримӧн пудъясьӧм пыр, весиг пророкъяс пыр.

⁷ Саул шуис аслас кесйӧгъяслы: «Корсьӧй меным аньӧс, коді вермӧ корны кулӧмаӧс. Ме ветла сы дінӧ отсӧгла». Кесйӧгъяс вочавидзисны: «Эн-Дорын эм татшӧм аньыс».

⁸ Саул вежис паськӧмсӧ, медым сійӧс эз тӧдны, босьтіс аскӧдыс кык мортӧс да петіс туйӧ. Войнас сійӧ локтіс ань дорӧ да шуис: «Кора тэнӧ, тунав меным. Кор меным ловсӧ сылысь, кодлысь нимсӧ ме шуа».

⁹ Но ань вочавидзис: «Тэ ӧд тӧдан, мый вӧчис Саул кулӧмаӧс корысьяскӧд да тунасьысьяскӧд. Сійӧ вӧтліс найӧс аслас муысь. Мыйла тэ сюян менӧ налькйӧ, тойлалан менӧ кулӧмӧ?»

¹⁰ Господь нимӧн кӧсйысьӧмӧн Саул шуис: «Ловъя Господь водзын кыв сета: тэныд таысь лёкыс оз ло».

¹¹ Сэки ань юаліс: «Кодӧс тэныд корны?» Саул вочавидзис: «Самуилӧс».

¹² Ань кор аддзис Самуилӧс, гораа горӧдіс. Сэсся шыасис Саул дінӧ: «Тэ – Саул! Мыйла тэ менӧ пӧръялін?»

¹³ Ӧксы вочавидзис сылы: «Эн пов. Висьтав, мый тэ аддзан». Ань вочавидзис: «Аддза, мый му пытшсьыс кыпӧдчӧ кодкӧ ен кодь».

¹⁴ «Кутшӧм сійӧ?» – юаліс Саул. Мӧдыс вочавидзис: «Кыпӧдчӧ кузь паськӧма пӧрысь морт». Саул гӧгӧрвоис, мый тайӧ Самуил, и муӧдзыс копыртчис.

¹⁵ Самуил шуис Сауллы: «Мыйла тэ менӧ вӧрӧдан, корин локны?» Саул вочавидзис: «Меным зэв сьӧкыд. Филистимсаяс тыш панісны, а Енмыс вешйис ме дінысь. Сійӧ оз вочавидз меным пророкъяс пыр ни вӧт пыр [ни петкӧдчылӧм пыр]. Ме кори тэнӧ, мед тэ висьталін, мый меным вӧчны».

¹⁶ Самуил шуис: «Мыйла тэ менсьым юасян, Ачыс кӧ Господь вешйис тэ дінысь да тэныд паныд сувтіс?

¹⁷ Господь вӧчас сійӧ, мый шуліс ме пыр. Господь босьтас тэнад киысь ӧксыалӧмтӧ да сетас мӧдлы, Давидлы,

¹⁸ ӧд тэ эн кывзысь Господьлысь. Сійӧ кӧсйис кисьтны Ассьыс скӧрлунсӧ амалик войтыр вылӧ, но тэ эн вӧч Сылӧн тшӧктӧм серти. Та вӧсна Господь вӧчас тадзи:

¹⁹ Сійӧ сетас тэнӧ да Израильӧс филистимсаяслӧн киӧ. Аски тэ да тэнад пияныд лоанныд ме дінын, а израильса тышкайӧзӧс Господь сетас филистимсаяслӧн киӧ».

²⁰ Самуиллӧн кывъясысь повзьӧмысла Саул усис му вылас. Эбӧсыс сылӧн дзикӧдз бырис, ӧд таӧдз сійӧ лунтыр и войбыд эз босьтлы вомас няньтор.

²¹ Ань матыстчис Саул дінӧ да аддзис, мый сійӧ ёна повзьӧма. Сэсся шуис: «Ме, тэнад кесйӧг, кывзыси тэнсьыд. Ассьым олӧмӧс верми воштыны, но ме вӧчи, мый тэ тшӧктін.

²² Ӧні кора, кывзы менӧ, ассьыд кесйӧгтӧ. Босьт да сёйышт тайӧ няньторсӧ, мед выныд лоӧ туяд петны».

²³ Но Саул пыксис, шуис, ог пӧ кут сёйны. Но кесйӧгъясыслӧн да аньлӧн ёна корӧм бӧрын Саул кӧсйысис сёйны, чеччис му вывсьыс да пуксис вольпась вылӧ.

²⁴ Тайӧ аньыслӧн гортас вӧлі тшӧгӧдӧм кукань. Аньыс тэрмасьӧмӧн начкис сійӧс. Сэсся босьтіс пызь, кизьӧртіс сійӧс да пӧжаліс шомтӧм нянь.

²⁵ Ставсӧ тайӧс вайис Сауллы да сылӧн кесйӧгъяслы. Найӧ сёйыштісны да сійӧ жӧ войнас мунісны.