Ӧксыяслӧн 1 небӧг 27 - Коми Библия 2023

Давид филистимсаяс дорын

¹ Давид мӧвпаліс: «Коркӧ ме збыльысь веськала Саул киӧ. Бурджык меным пышйыны Филистим муӧ, сэки Саул ӧвсяс меысь, дугдас корсьны менӧ став Израиль му пасьтала. Тадзи ме мына сыысь».

² Давид босьтіс аскӧдыс квайтсё мортӧс да мӧдӧдчис гефса ӧксы дінӧ, Маоклӧн Акиш пи дінӧ.

³ Давид аслас кыкнан гӧтырыскӧд, Изреельысь Ахиноамакӧд да Кармилысь Авигеякӧд, Наваллӧн вӧвлӧм гӧтыркӧд, овмӧдчис Гефӧ. Давидкӧд локтӧм йӧзыс асланыс став котырнас тшӧтш овмӧдчисны сэтчӧ.

⁴ Сауллы юӧртісны, Давид пӧ пышйӧма Гефӧ. Сэки Саул дугдіс вӧтлысьны Давид бӧрся.

⁵ Давид шуис Акишлы: «Ло бур сьӧлӧма ме дінӧ. Овмӧд менӧ кутшӧмкӧ ичӧтик карӧ. Мыйла меным, тэнад кесйӧглы, овны ӧксылӧн карын?»

⁶ Сэки Акиш сетіс Давидлы Сиклаг кар. Тайӧ карас ӧнӧдз веськӧдлӧны Иуда войтырлӧн ӧксыяс.

⁷ Филистим муын Давид оліс во да нёль тӧлысь.

⁸ Аслас йӧзкӧд Давид тшӧкыда уськӧдчывліс гешурсаяс, гирзейяс да амаликъяс вылӧ. Найӧ важысянь овмӧдчылӧмаӧсь тайӧ муас, паськӧдчылӧмаӧсь Шурӧдз да весиг Египетӧдз.

⁹ Давид пазӧдліс тайӧ муяссӧ, виавліс сэтчӧс айуловӧс и аньясӧс, а налысь ыж-мӧссӧ, осёлъяссӧ, верблюдъяссӧ да став кӧлуйсӧ босьтліс аскӧдыс. Быд пӧрйӧ тышысь воӧм бӧрти Давид петкӧдчывліс Акишлы.

¹⁰ Акиш юавліс: «Код вылӧ талун уськӧдчылін?» Давид вочавидзліс: «Негевын олысь Иуда войтыр вылӧ», либӧ «Негевын олысь Ерахмель рӧд вылӧ», либӧ «Негевын олысь кеней войтыр вылӧ».

¹¹ Давид некодӧс эз вайӧдлы Гефӧ, а ставнысӧ – айуловӧс и аньясӧс – виавліс. Эз кӧсйы, медым ловйӧн кольысьяс висьталісны, мый сійӧ збыльвылас вӧчӧ. Филистим муын олігас Давид век вӧчліс тадзи.

¹² Акиш эскис Давидлы. Чайтіс, мый Давид мустӧммис аслас Израиль войтырлы. Та вӧсна мӧвпаліс, мый Давид кутас пыр кесъявны сылы.