Ӧксыяслӧн 1 небӧг 24 - Коми Библия 2023

Давид бурсьӧлӧмтчӧ Саул дінӧ

¹ Давид муніс Маон овтӧминысь Эн-Гедиӧ да сэні оліс-дзебсясис.

² Кор Саул бӧр локтіс филистимсаясӧс вӧтӧдӧмысь, сылы юӧртісны, Давид пӧ Эн-Геди дорын овтӧминын.

³ Саул босьтіс аскӧдыс Израиль войтырысь куим сюрс медбур айуловӧс да муніс корсьны Давидӧс да сылысь йӧзсӧ изкыртаясысь, кӧні олісны керӧсвывса кӧзаяс.

⁴ Туй вывті муніганыс найӧ воисны ыж йӧр дінӧ. Сэні Саул пырис кырта горсйӧ асмогасьны. Буретш тайӧ кырта горсъяс, пыді пельӧсас, дзебсясис Давид аслас йӧзкӧд.

⁵ Найӧ шуисны Давидлы: «Воис сійӧ луныс, мый йылысь висьтавліс тэныд Господь. Сійӧ кӧсйысис сетны вӧрӧгтӧ тэнад киӧ, и тэ верман вӧчны сыкӧд, мый кӧсъян». Давид гусьӧникӧн матыстчис да вундыштіс Сауллысь паськӧм дорышсӧ.

⁶ Но Давидлы сьӧкыд лои сьӧлӧм вылас таысь.

⁷ Давид шуис аслас йӧзлы: «Господь мед оз лэдз меным лёксӧ вӧчны аслам ыджыдлы, Господьлӧн мавтыштӧмалы. Мед видзас менӧ сы вылӧ киӧс лэптӧмысь, ӧд сійӧ – Господьлӧн мавтыштӧм морт».

⁸ Тайӧ кывъяснас Давид ӧлӧдіс ассьыс йӧзсӧ да эз лэдз уськӧдчыны Саул вылӧ. Саул петіс кырта горсйысь да мӧдӧдчис водзӧ.

⁹ Давид тшӧтш петіс кырта горсйысь да горӧдіс Сауллы: «Ӧксыӧй-ыджыдӧй!» Саул бергӧдчис, а Давид сійӧс пыдди пуктӧмӧн муӧдзыс копыртчыліс сылы

¹⁰ да шуис: «Мыйла тэ кывзан йӧзыслысь сёрнисӧ, Давид пӧ мӧвпыштӧма лёк вӧчны тэныд.

¹¹ Тэ аслад синмӧн аддзан, мый талун изкыртаас Господь сетіс тэнӧ менам киӧ. Йӧзӧй корисны вины тэнӧ. Но ме бурсьӧлӧмтчи тэ дінӧ, шуи, мый ог лэпты киӧс аслам ыджыд вылӧ, ӧд сійӧ – Господьлӧн мавтыштӧм морт.

¹² Видзӧдлы, батьӧй, менам киын тэнад паськӧм дорышыд. Ме вундішті тэнсьыд паськӧмтӧ, но асьтӧ тэнӧ эг ви. Тӧд, ме ог кӧсйы тэныд лёксӧ и ог мун тэныд паныд. Ме абу мыжа тэ водзын, но тэ кӧсъян вины менӧ.

¹³ Мед Ачыс Господь лоас ёрдысьӧн тэа-меа костын. Мед Сійӧ водзӧс перъяс тэнсьыд ме вӧсна. Но менам киӧй оз кыпты тэ вылӧ.

¹⁴ Важӧн шулӧмаӧсь, лёкыс пӧ петӧ лёк йӧзсянь. Но ме ог лэпты киӧс тэ вылӧ.

¹⁵ Кодлы паныд петін тэ, Израильлӧн ӧксы? Код бӧрся тэ вӧтлысян? Пон шой бӧрся? Кутшӧмкӧ пытш бӧрся?

¹⁶ Мед Господь лоас ёрдысьӧн миян костын. Господь тӧдӧ, мый ме абу мыжа. Сійӧ доръяс да мездас менӧ тэнад киысь».

¹⁷ Кор Давид помаліс сёрнисӧ, Саул шуис: «Тэнсьыд-ӧ гӧлӧс шытӧ кыла, Давид пиӧй?» Сэсся гораа бӧрддзис.

¹⁸ Саул шуис Давидлы: «Тэ веськыда вӧчин, ме эг. Тэ вӧчин меным бурсӧ, а ме мынтыси тэныд лёкӧн.

¹⁹ Талун тэ петкӧдлін, мый тэ бур сьӧлӧма ме дінӧ. Господь сетіс менӧ тэнад киӧ, но тэ эн ви менӧ.

²⁰ Лэдзас ӧмӧй морт ассьыс вӧрӧгсӧ лӧня мунны, шедіс кӧ мӧдыс сылӧн киӧ? Талунъя бур вӧчӧмсьыд Господь мед сетас тэныд быд бурсӧ.

²¹ Ме тӧда, мый тэ лоан ӧксыӧн, и тэнад юралӧмыд Израильын лоӧ зумыд.

²² Господь водзын сет меным кыв, мый менам кулӧм бӧрын тэ он ви месянь чужысьясӧс да он бырӧд менсьым нимӧс бать рӧдысь».

²³ Давид кыв сетіс Сауллы. Сэсся Саул муніс гортас, а Давид аслас йӧзкӧд кайисны изкырта вылӧ сайӧдчанінас.