Ӧксыяслӧн 1 небӧг 23 - Коми Библия 2023

Давид мездӧ Кейла кар

¹ Давидлы юӧртісны, филистимсаяс пӧ уськӧдчисны Кейла кар вылӧ да сэні пӧ гусявлӧны вартанінъясысь няньсӧ.

² Давид юаліс Господьлысь: «Мунны-ӧ меным сэтчӧ? Верма-ӧ ме тайӧ филистимсаяссӧ?» Господь вочавидзис: «Мун. Тэ верман найӧс, тшӧтш Кейла карсӧ мездан».

³ Но Давидлӧн йӧзыс шуисны: «Тані, Иуда муын, ми полам-тіралам. А мый лоӧ миянкӧд, ми кӧ мунам Кейлаӧ да петам филистимса тышкайӧзлы паныд? [Филистимсаяс босьтасны миянӧс пленӧ.]»

⁴ Давид бара шыасис Господь дінӧ. Господь шуис сылы: «Чеччы да мун Кейлаӧ. Ме сета филистимсаясӧс тэнад киӧ».

⁵ Давид аслас йӧзкӧд муніс Кейла карӧ, уськӧдчис филистимсаяс вылӧ да босьтіс налысь ыж-мӧссӧ. Филистимсаясӧс пасьвартӧмнас Давид мездіс Кейлаын олысьясӧс.

⁶ Кор Ахимелеклӧн Авиатар пиыс локтіс Давид дінӧ [сэсся муніс сыкӧд] Кейлаӧ, сійӧ аскӧдыс вайис ефод.

⁷ Сауллы юӧртісны, Давид пӧ Кейлаӧ локтӧма. Саул шуис: «Енмыс сетіс сійӧс менам киӧ. Карса иган сайӧ пырӧмнас сійӧ ачыс асьсӧ йӧртіс».

⁸ Саул чукӧртіс став тышкайӧзсӧ, мед мунны Кейлаӧ да кытшавны сэні Давидӧс да сылысь йӧзсӧ.

⁹ Кор Давид тӧдмаліс, мый Саул мӧвпыштӧма сылы лёктор вӧчны, тшӧктіс Авиатар поплы вайны [Господьлысь] ефод.

¹⁰ Давид шыасис: «Господьӧй, Израильлӧн Енмӧй! Меным, Тэнад кесйӧглы, кывсис, мый Саул кӧсйӧ локны да ме вӧсна бырӧдны Кейла кар.

¹¹ Сетасны-ӧ Кейлаын олысьяс менӧ сы киӧ? Збыльысь-ӧ Саул локтас татчӧ, кыдзи меным висьталісны? Господьӧй, Израильлӧн Енмӧй, вочавидз Аслад кесйӧглы». Господь вочавидзис: «Локтас».

¹² Давид юаліс: «Сетасны-ӧ Кейлаын олысьяс менӧ да менсьым йӧзӧс Саул киӧ?» Господь вочавидзис: «Сетасны».

¹³ Сэки Давид да сылӧн йӧзыс, морт квайтсё, пышйисны Кейла карысь. Найӧ пышъялісны-ветлӧдлісны ӧти местасянь мӧдлаӧ. Кор Сауллы юӧртісны, мый Давид пышйӧма Кейлаысь, сійӧ эновтчис сэтчӧ мунӧмсьыс.

Саул вӧтлысьӧ Давид бӧрся

¹⁴ Давид дзебсясис овтӧминын, сэсся муніс Зиф овтӧминса керӧсӧ. Саул быд лун корсис Давидӧс, но Енмыс эз сет сійӧс Саул киӧ.

¹⁵ Давид тӧдіс, мый Саул корсьӧ сійӧс, медым вины. Зиф овтӧминса вӧрын дзебсясигӧн

¹⁶ Давид дінӧ локтіс Сауллӧн Ионафан пиыс да ышӧдіс сійӧс лача кутны Енмыс вылӧ.

¹⁷ Ионафан шуис: «Эн пов, Давид. Саул батьӧй оз аддзы тэнӧ да оз вермы тэныд вӧчны лёксӧ. Тэ кутан ӧксыавны Израильын, а ме лоа тэнад веськыд киӧн. Батьӧй тшӧтш тӧдӧ тайӧс».

¹⁸ Господь водзын найӧ кӧрталісны ӧта-мӧдыскӧд йитӧд. Давид кольччис вӧрӧ, а Ионафан бӧр муніс гортас.

¹⁹ Зифын олысьяс локтісны Саул дінӧ Гиваӧ да висьталісны: «Давид дзебсясьӧ миян вӧрын, Хакила керӧс бокын Есимонсянь лунвылын.

²⁰ Ӧксыӧй, кор кӧсъян, сэки и лок. Ми сетам сійӧс тэнад киӧ».

²¹ Саул воча шуис: «Господь мед бурсиас тіянӧс, ӧд ті тӧждысянныд ме вӧсна.

²² Мунӧй да нӧшта бура ставсӧ тӧдмалӧй. Кыйӧдӧй, кытчӧ сійӧ мунас. Гашкӧ, кодкӧ аддзыліс сійӧс. Меным висьталӧны, сійӧ пӧ зэв сюсь.

²³ Тӧдмалӧй да видзӧдалӧй, кӧні сійӧ дзебсясьӧ. Кор ставсӧ бура тӧдмаланныд, локтӧй да юӧртӧй меным. Сэки ме муна тіянкӧд. Сійӧ кӧ тані, Иуда муын, ме кута корсьны сійӧс став кар-сиктысь».

²⁴ Зифын олысьяс бӧр мунісны Зифӧ Саулысь водзджык. Давид аслас йӧзкӧд вӧлі Маон овтӧминса ковтысын, Есимонсянь лунвылын.

²⁵ Саул муніс аслас йӧзкӧд корсьны Давидӧс. Кор Давидлы юӧртісны та йылысь, сійӧ муніс Маон овтӧминса изкыртаӧ да кольччис сэтчӧ. Саул тӧдмаліс та йылысь да вӧтчис Давид бӧрся.

²⁶ Саул локтіс керӧс ӧтар сайсяньыс, а Давид аслас йӧзкӧд вӧлі керӧс мӧдар саяс. Давид зілис пышйыны Саулысь. Но Саул аслас йӧзкӧд уськӧдчис керӧс ӧтар и мӧдар боксяньыс, медым босьтны Давидӧс да сылысь йӧзсӧ.

²⁷ Сэки Саул дінӧ локтіс юӧр вайысь да висьталіс, ӧдйӧджык пӧ бӧр лок, филистимсаяс пӧ уськӧдчисны муным вылӧ.

²⁸ Саул ӧвсис Давид бӧрся вӧтчӧмысь, бӧр бергӧдчис да петіс тышӧ филистимсаяслы паныд. Та вӧсна тайӧ местасӧ кутісны шуны Села-Хаммахлекотӧн.