Ӧксыяслӧн 1 небӧг 22 - Коми Библия 2023

¹ Давид пышйис Геф карысь да дзебсис Адуллам кар дорӧ кырта горсйӧ. Кор та йылысь тӧдмалісны вокъясыс да став сылӧн рӧдыс, локтісны сы дінӧ.

² Давид дінӧ чукӧртчисны дзескӧдӧмаяс, уджйӧзаяс да шогас вӧйӧмаяс – ставнас нёльсё гӧгӧр морт. Давид лои налӧн веськӧдлысьӧн.

³ Сэсянь Давид муніс Моав муӧ Мицфеӧ. Моавса ӧксылы шуис: «Кора тэнӧ, лэдз бать-мамлы олыштны тэ ордын, кытчӧдз ме ог тӧдмав, мый мекӧд вӧчас Ен».

⁴ Давид вайӧдіс бать-мамсӧ моавса ӧксы дінӧ. Найӧ кольччисны сы ордӧ, кытчӧдз Давид эз пет сайӧдчанінысь.

⁵ Но Гад нима пророк шуис Давидлы: «Пет сайӧдчанінысь да мун Иуда муӧ». Сэки Давид муніс херетса вӧрӧ.

Саул виалӧ Господьлысь попъяссӧ

⁶ Саул вӧлі Гиваын, пукаліс керӧс вылын тамариск пу улын. Киас сійӧ кутіс шы. Кесйӧгъясыс сулалісны сы гӧгӧр. Сауллы висьталісны, мый кодкӧ аддзылӧма Давидӧс да сылысь йӧзсӧ.

⁷ Саул шуис сійӧс кытшалысь кесйӧгъяслы: «Кывзӧй, Венямин пиян. Ті чайтанныд, мый Ессей пи сетас тіянлы ставныдлы видз-му да виноград йӧръяс, пуктас ставнытӧ сюрс да сё тышкамортӧн веськӧдлыны?

⁸ Буракӧ, та вӧсна ті ставныд сёрнитчӧмныд меным паныд. Некод меным эз юӧрт, мый менам пиӧй кӧрталӧма йитӧд Ессей пикӧд. Ті энӧ тӧждысьӧй ме вӧсна да энӧ висьталӧй, мый менам пиӧй ышӧдӧма менсьым кесйӧгӧс, медым тывйыштны менӧ».

⁹ Эдомса Доик сулаліс Сауллӧн кесйӧгъяс пӧвстын. Сійӧ шуис: «Ме аддзылі, кыдзи Ессейлӧн пиыс воліс Новӧ Ахитувлӧн Ахимелек пи дінӧ.

¹⁰ Ахимелек кевмысис Господьлы, медым Сійӧ туйдӧдас Давидӧс. Сэсся сетіс сылы сёян да филистимса Голиафлысь шыпуртсӧ».

¹¹ Саул ӧксы тшӧктіс корны Ахимелек попӧс, Ахитувлысь писӧ, да сылӧн бать рӧдысь став попсӧ, кодъяс кесъялісны Новын. Ставныс найӧ локтісны ӧксы дінӧ.

¹² Саул шуис: «Кывзы, Ахитув пи». Мӧдыс вочавидзис: «Кывза, ыджыдӧй».

¹³ Саул юаліс: «Мый вӧсна ті Ессей пикӧд сёрнитчинныд меным паныд? Тэ сетін сылы нянь да шыпурт, нӧшта корин Енмӧс туйдӧдны сійӧс, медым ӧні сійӧ меным паныд кыпӧдчис да тывйыштіс менӧ».

¹⁴ Ахимелек воча шуис ӧксылы: «Сюрас-ӧ кодкӧ тэнад кесйӧгъяс пиысь Давид кодь эсканаыс? Сійӧ ӧд тэнад зять, вӧчӧ тэнад тшӧктӧмъяс серти, и тэнад керкаын сійӧс пыдди пуктӧны.

¹⁵ Ме збыльысь кори Енмӧс туйдӧдны Давидӧс, кыдзи и водзынджык вӧчлі. Ӧксыӧй, эн мыжды менӧ, ассьыд кесйӧгтӧ, да менсьым рӧдвужӧс. Ме, тэнад кесйӧг, збыльысь нинӧм эг тӧд тэныд паныд кыпӧдчӧм йылысь».

¹⁶ Но ӧксы шуис: «Тэныд, Ахимелек, и тэнад рӧдвужлы ковмас кувны».

¹⁷ Ӧксы шуис сійӧс кытшалысь видзысьяслы: «Мунӧй да виӧй Господьлысь попъяссӧ, ӧд найӧ Давид дор сулалӧны. Найӧ тӧдісны, мый сійӧ пышйис меысь, и эз висьтавны меным та йылысь». Но ӧксылӧн кесйӧгъяс эз кӧсйыны кинысӧ лэптыны, медым вины Господьлысь попъяссӧ.

¹⁸ Сэки ӧксы шуис Доиклы: «Мун да ви найӧс». Эдомса Доик кывзысис. Сійӧ уськӧдчис попъяс вылӧ да сійӧ лунӧ виис кӧкъямысдас вит попӧс. Ставныс найӧ новлісны шабді ефод.

¹⁹ Сійӧ виаліс шыпуртӧн попъяслӧн Нов карысь став олысьсӧ: айуловӧс и аньясӧс, томъясӧс и кагаясӧс, виаліс тшӧтш налысь ӧшъяссӧ, осёлъяссӧ да ыжъяссӧ.

²⁰ Ловйӧн коли сӧмын Авиатар, Ахитув Ахимелеклӧн пиыс. Сійӧ пышйис Давид дінӧ.

²¹ Авиатар висьталіс Давидлы, мый Саул виаліс Господьлысь попъяссӧ.

²² Давид шуис Авиатарлы: «Сійӧ лунӧ, кор ме вӧлі Новын, сэні вӧлі эдомса Доик. Ме тӧді, мый сійӧ висьталас ме йылысь Сауллы. Ме мыжа став тэнад рӧдвужлӧн кулӧмысь.

²³ Кольччы мекӧд. Тэнӧ виысь корсьӧ вины тшӧтш менӧ. Эн пов. Ме доръя тэнӧ».