Ӧксыяслӧн 1 небӧг 21 - Коми Библия 2023

Давид пышйӧ Саулысь

¹ Давид локтіс Нов карӧ Ахимелек поп дінӧ. Ахимелек повзьӧмпырысь петіс Давидлы воча да юаліс сылысь: «Мыйла тэ ӧтнад? Мыйла тэкӧд некод абу?»

² Давид вочавидзис: «Ӧксы тшӧктіс вӧчны меным ӧти удж. Шуис, мед пӧ некод оз тӧд та йылысь, мый могӧн ме тэнӧ мӧдӧда. Та вӧсна ассьым йӧзӧс ме коли мӧдлаӧ.

³ Эм-ӧ тэнад мыйкӧ сёйыштны? Вай меным вит кымын нянь либӧ мый нӧшта сюрас».

⁴ Поп шуис Давидлы: «Быдлунся няньыд менам абу, сӧмын вежа нянь эм. Тэнад йӧзыд кӧ кутчысисны аньяскӧд узьӧмысь, вермасны сёйны».

⁵ Давид вочавидзис: «Тышӧ петігъясӧ миянлы оз позь узьлыны аньяскӧд. Менам йӧз видзӧны асьнысӧ сӧстӧма весиг быдлунъя тшӧктӧмъяс збыльмӧдігӧн. Дерт нин, ӧні найӧ сӧстӧмӧсь».

⁶ Мӧдпӧлӧс няньыс эз вӧв, та вӧсна поп сетіс Давидлы вежа нянь. Тайӧ няньсӧ вӧлі босьтӧма Господьлӧн чужӧмбан водзысь, а сы пыдди вӧлі пуктӧма выль пӧжалӧм нянь.

⁷ Вежаинын сэки вӧлі Сауллӧн Доик нима кесйӧг, сійӧ вӧлі Эдомысь. Сійӧ веськӧдліс Саул ордын ыж-мӧс видзысьясӧн.

⁸ Давид юаліс Ахимелеклысь: «Эм-ӧ тані тэнад шы либӧ шыпурт? Ӧксы менӧ ёна тэрмӧдліс да, аскӧд некутшӧм тышкасянтор эг босьт, весиг шыпуртӧс».

⁹ Поп вочавидзис: «Эм шыпурт филистимса Голиафлӧн, кодӧс тэ ачыд виин тупуа ковтысын. Эстӧн ефод саяс, кӧлуй пытшкӧ гартыштӧма. Кӧсъян кӧ, босьт. Сы кындзи менам нинӧм абу». Давид воча шуис: «Таысь бурджыкыс оз сюр. Вай меным сійӧс». [Поп сетіс сылы.]

¹⁰ Сійӧ жӧ лунӧ Давид пышйис Саулысь. Локтіс гефса Акиш ӧксы дінӧ.

¹¹ Акишлӧн кесйӧгъяс шуисны ӧксыныслы: «Абу-ӧ тайӧ Давид, эсійӧ мусьыс ӧксыыс? Эз-ӧ йӧзыс йӧктӧмӧн сьывны сы йылысь, Саул пӧ вермис сюрсъясӧс, а Давид – дас сюрсъясӧс?»

¹² Тайӧ кывъясыс мӧрччисны Давидлы сьӧлӧмас, и сійӧс полӧм босьтіс гефса Акиш ӧксыысь.

¹³ Та вӧсна Давид лэдзчысис йӧй улӧ. Сійӧ кутіс мыйкӧ визьйӧдлыны карса дзиръя вылын [и шенасьны кинас] да лэдзны дульсӧ тош кузяыс.

¹⁴ Акиш шуис аслас кесйӧгъяслы: «Аддзанныд, сійӧ выжыв. Мыйла ті вайӧдінныд сійӧс ме дінӧ?

¹⁵ Этша на ӧмӧй менам выжывъясыс, нӧшта тайӧс колӧ вӧлі вайӧдны ме водзӧ йӧйтавны? Гашкӧ, аслам керка помӧ на сибӧдны сійӧс?»