Ӧксыяслӧн 1 небӧг 20 - Коми Библия 2023

Давид да Ионафан кӧрталӧны йитӧд

¹ Давид пышйис рамаса Найотысь да локтіс Ионафан дінӧ норасьӧмӧн: «Мый ме сэтшӧмсӧ вӧчи тэнад батьлы? Кутшӧм мыж вӧсна сійӧ кӧсйӧ вины менӧ?»

² Ионафан шуис: «Тэ он кув. Батьӧй меным висьталӧ ставсӧ, мый кӧсйӧ вӧчны. Кӧсйис кӧ вины тэнӧ, ме эськӧ тӧді та йылысь. Оз ло тадзи!»

³ Давид эскӧдӧмӧн шуаліс: «Тэнад батьыд бура тӧдӧ, мый ме тэныд муса. Сійӧ оз висьтав тэныд ассьыс мӧвпыштӧмсӧ, мед тэ эн шогсьы. Но ловъя Господь водзын да тэ водзын шуа: кулӧмӧдзыс меным ӧти воськов».

⁴ Ионафан шуис Давидлы: «Тэ ради ме вӧча ставсӧ, мый шуан».

⁵ Давид вочавидзис: «Аски выль тӧлысь пасъян лун. Меным колӧ ӧксыкӧд ӧтлаын пажнайтны. Но кора тэнӧ, лэдз меным петны кар сайӧ да дзебсьыны. Лоа сэні аскомысь рытӧдзыс.

⁶ Батьыд кӧ юалас ме йылысь, висьтав, мый ме тэнсьыд вӧзйыси ветлыны Виплиемӧ, ӧд сэні став менам рӧдӧй чукӧртчӧ вайны быдвося вись.

⁷ Батьыд кӧ шуас та вылӧ ”бур”, сідзкӧ, меным, тэнад кесйӧглы, нинӧмысь повнысӧ. А скӧрмас кӧ, тӧд, мый лёктӧр кӧсйӧ вӧчны.

⁸ Ло бур сьӧлӧма ме дінӧ, аслад кесйӧг дінӧ, ӧд Господь водзын тэ кӧрталін мекӧд йитӧд. А ме кӧ мыйыськӧ мыжа, ачыд ви менӧ. Сӧмын батьыдлы эн сет менӧ».

⁹ Ионафан шуис: «Оз ло тэкӧд тайӧ. Тӧда кӧ вӧлі, мый батьӧй мӧвпыштӧма тэныд лёктор вӧчны, ме эськӧ висьталі тэныд та йылысь».

¹⁰ Давид юаліс: «Батьыд кӧ скӧрысь вочавидзас тэныд, кыдзи ме тӧдмала та йылысь?»

¹¹ Ионафан вочавидзис: «Лок мунам кар сайӧ». Кор найӧ мунісны кар сайӧ,

¹² Ионафан шуис: «Ловъя Господь водзын, Израильлӧн Ен водзын, кыв сета: аски либӧ аскомысь тайӧ кадас ме тӧдмала, бур сьӧлӧма-ӧ батьӧй тэ дінӧ. Бур сьӧлӧма кӧ, ме юӧрта тэныд та йылысь.

¹³ Господь мед ёна мыждас менӧ, ог кӧ ме юӧрт, мый батьӧй лёктор кӧсйӧ вӧчны тэныд, да ог кӧ отсав тэныд мунны лӧнь сьӧлӧмӧн. Господь мед лоас тэкӧд, кыдзи Сійӧ вӧлі менам батькӧд.

¹⁴ Ме кӧ ловйӧн коля, Господь моз тэ ло бур сьӧлӧма ме дінӧ.

¹⁵ А ме кӧ кула, ло бур сьӧлӧма менам рӧд дінӧ нэмъяс чӧж. Ло бур сьӧлӧма весиг сэки, кор Господь бырӧдас му вывсьыс тэнсьыд вӧрӧгтӧ».

¹⁶ Тадзи Ионафан кӧрталіс йитӧд Давид рӧдкӧд да шуис: «Господь мед водзӧс перъяс Давидлӧн вӧрӧглысь».

¹⁷ Аслас муслунӧн Ионафан кӧсйысис Давидлы видзны кӧрталӧм йитӧдсӧ, ӧд сійӧ радейтіс Давидӧс асьсӧ моз.

¹⁸ Сэсся Ионафан шуис: «Аски выль тӧлысь пасъян лун. Тэ кӧ он ло пызан саяс, тэ йылысь, дерт, юаласны.

¹⁹ Но аскомысь тэ лэччы сэтчӧ, кытчӧ тэ водзынсӧ дзебсьылін, да пуксьы Азель из дорӧ.

²⁰ Сыланьӧ ме лэдза куим ньӧв, быттьӧ мыйкӧ лыйла.

²¹ Сэсся мӧдӧда зонкаӧс корсьны ньӧвъяссӧ. Шуа кӧ сылы: ”Ньӧвъясыс со бӧрвыладӧсь, босьт сэтысь”, сэки лок ме дінӧ. Ловъя Господь водзын кыв сета: тэкӧд нинӧм оз ло.

²² А шуа кӧ зонкаыслы: ”Ньӧвъясыс водзвыладӧсь”, сэки пышйы. Тӧд, мый тадзи кӧсйӧ Господь.

²³ А мый йылысь ми сёрнитчим тэкӧд йитӧд кӧрталігӧн, тӧдӧ Господь».

²⁴ Давид дзебсис кар сайӧ. Выль тӧлысь пасъян лунӧ ӧксы пуксис пажнайтны.

²⁵ Сійӧ пуксис аслас пукаланінӧ стен бердас. Ионафан чеччис, а сы местаӧ Саулкӧд орччӧн пуксис Авенир. Давидлӧн местаыс вӧлі куш.

²⁶ Сійӧ лунӧ Саул нинӧм эз шу та вылӧ. Мӧвпыштіс, гашкӧ пӧ, Давид виччысьтӧг пежаліс асьсӧ.

²⁷ Мӧд луннас выль тӧлысь пасйигӧн пызан сайын Давидлӧн местаыс бара вӧлі куш. Сэки Саул юаліс Ионафан пиыслысь: «Мыйла Ессейлӧн пиыс тӧрыт ни талун абу пызан сайын?»

²⁸ Ионафан вочавидзис: «Давид вӧзйысис менсьым ветлыны Виплиемӧ.

²⁹ Шуис, лэдзлы пӧ менӧ чужан карӧ, вокӧй пӧ корис. Сэні пӧ став рӧдным вись вайӧ. Ло пӧ бур сьӧлӧма да лэдз менӧ ветлыны аддзысьлыны вокъяскӧд. Та вӧсна Давид эз лок пажын вылад».

³⁰ Саул ёна скӧрмис Ионафан вылӧ да шуис: «Шогмытӧм да кывзысьтӧм пи! Ме ӧмӧй ог тӧд, мый тэ ёртасян Ессей пикӧд. Тэ асьтӧ янӧдан и мамтӧ тшӧтш.

³¹ Кытчӧдз Ессейлӧн пиыс пондас овны му вылын, тэ да тэнад ӧксыалӧмыд оз ло зумыд. Мӧдӧд йӧзӧс, медым вайӧдасны сійӧс ме дінӧ. Сійӧс колӧ вины».

³² Ионафан воча шуис батьыслы: «Мыйысь сійӧс винысӧ? Мый сійӧ вӧчис?»

³³ Сэки Саул лыйис шыпуртсӧ, медым вины Ионафанӧс. Ионафан гӧгӧрвоис, мый батьыс кӧсйӧ вины Давидӧс.

³⁴ Ионафан скӧрмӧмӧн чеччис пызан сайсьыс да весиг эз пажнайт сійӧ лунӧ. Сійӧ шогсис Давид вӧсна, ӧд батьыс сійӧс ёна омӧльтіс.

³⁵ Мӧд асывнас Ионафан том зонкакӧд петіс кар сайӧ, кыдзи вӧлі сёрнитчӧма Давидкӧд.

³⁶ Ионафан шуис зонкалы: «Ме лыя ньӧвъяссӧ, а тэ котӧрт да корсь найӧс». Зонка котӧртіс. Ионафан жӧ лыйис ньӧвъяссӧ зонкаысь ылӧджык.

³⁷ Зонка котӧртіс сэтчӧ, кытчӧ усисны ньӧвъясыс. Ионафан горӧдіс зонкалы: «Видзӧд, ньӧвйыс водзвылад!

³⁸ Ӧдйӧджык котӧрт! Эн сувтлась!» Зонка чукӧртіс Ионафан ыджыдыслысь ньӧвъяссӧ да бӧр локтіс сы дінӧ.

³⁹ Зонка эз тӧд, мыйла Ионафан тадзи шуис. Тӧдісны сӧмын Ионафан да Давид.

⁴⁰ Ионафан сетіс ассьыс ньӧввужсӧ зонкалы да тшӧктіс нуны карас.

⁴¹ Зонка муніс. Сэки Давид петіс лунвывладорсяньыс да куимысь муӧдзыс копыртчыліс Ионафанлы. Найӧ окалісны ӧта-мӧднысӧ да кыкнанныс бӧрдісны, но Давид бӧрдіс ёнджыка.

⁴² Ионафан шуис Давидлы: «Мун лӧнь сьӧлӧмӧн. Господь водзын ми кыв сетім видзны кӧрталӧм йитӧднымӧс. Господь лоӧ миян костын, месянь да тэсянь чужысьяс костын нэмъяс чӧж».

⁴³ Сэсся Давид муніс, а Ионафан бӧр локтіс карас.