Ӧксыяслӧн 1 небӧг 18 - Коми Библия 2023

Саул вежалӧ Давидлы

¹ Давидлӧн Саулкӧд сёрнитӧм бӧрын Ионафан став сьӧлӧмнас кӧртасис Давид дінӧ, кутіс радейтны сійӧс асьсӧ моз.

² Сійӧ лунӧ Саул кольӧдіс Давидӧс ас ордас, эз лэдз мунны батьыс дінӧ гортас.

³ Ионафан асьсӧ моз радейтіс Давидӧс, та вӧсна кӧрталіс сыкӧд йитӧд.

⁴ Ионафан пӧрччис кышансӧ да сетіс сійӧс Давидлы. Сетіс тшӧтш мукӧд тышкасян паськӧмсӧ, ассьыс шыпуртсӧ, ньӧввужсӧ да коскытшсӧ.

⁵ Давид вермыліс быд тышын, кытчӧ Саул мӧдӧдліс сійӧс. Та вӧсна Саул пуктіс Давидӧс веськӧдлыны тышкайӧзӧн. Став йӧзыслы и Сауллӧн кесйӧгъяслы тайӧ воис сьӧлӧм вылас.

⁶ Давидлӧн Голиафӧс вермӧм бӧрын тышкайӧз кор вӧлі локтӧны тыш вылысь, быд израильса карысь петавлісны аньяс. Найӧ сьылӧмӧн да йӧктӧмӧн, тимпанӧн да кимвалӧн кыпыда ворсӧмӧн вочаалісны Саул ӧксыӧс.

⁷ Аньяс ворсісны да сьылісны: – Саул вермис сюрсъясӧс, Давид – дас сюрсъясӧс!

⁸ Сауллы тайӧ эз во сьӧлӧм вылас, сійӧ скӧрмӧмӧн шуис: «Давидӧс нимӧдӧны, сійӧ пӧ дас сюрсъясӧс вермис, а ме пӧ – сӧмын сюрсъясӧс. Сылы коли сӧмын ӧксыӧ пуксьыны».

⁹ Тайӧ лунсяньыс Саул кутіс вежавны Давидлы.

¹⁰ Мӧд луннас Енмӧн ыстӧм пеж лов уськӧдчис Саул вылӧ. Саул пондіс йӧйтавны аслас керкаын, а Давид воддза мозыс ворсіс гуслиӧн. Сауллӧн киас вӧлі шы.

¹¹ Сійӧ мӧвпыштіс: «Тувъяла Давидӧс стен бердас». Сэсся Саул лыйис шысӧ, но Давид удитіс кежны шыысь. Тадзи вӧлі кыкысь.

¹² Саул кутіс повны Давидысь, ӧд Господь вӧлі Давидкӧд, а Саулкӧд Господь эз нин вӧв.

¹³ Саул ылыстіс Давидӧс ас дінсьыс да пуктіс веськӧдлыны сюрс тышкамортӧн. Давид ветліс тышкайӧзкӧд тышъясӧ

¹⁴ и быдлаын вермыліс, ӧд Господь вӧлі сыкӧд.

¹⁵ Саул аддзис, мый Давид быдлаын вермӧ, та вӧсна поліс сыысь.

¹⁶ Но Израильлӧн да Иудалӧн тышкайӧз радейтісны Давидӧс, ӧд сійӧ веськӧдліс наӧн.

¹⁷ Ӧтчыд Саул вӧзйис Давидлы: «Ассьым Мерова ыджыд нылӧс сета тэ сайӧ, сӧмын повтӧг кесъяв меным да веськӧдлы Господьлӧн тышъясӧн». Но та дырйи Саул мӧвпаліс: «Сы вылӧ мед оз кыпты менам киӧй, а филистимсаяслӧн».

¹⁸ Давид воча шуис: «Коді ме сэтшӧмыс, мед лоны ӧксылӧн зятьӧн? Батьлӧн рӧдыс Израильын ӧд абу тӧдчана».

¹⁹ Но кор воис ӧтлаасян кадыс, Саул сетіс Мерова нывсӧ мехоласа Адриэл сайӧ.

²⁰ Но Сауллӧн Мелкола нима мӧд нылыс кутіс радейтны Давидӧс. Кор Сауллы юӧртісны та йылысь, сылы нимкодь лои.

²¹ Саул мӧвпыштіс: «Давидӧс тывйыштӧм могысь сета нылӧс сы сайӧ. Сэки Давид шедас филистимсаяслӧн киӧ». Сэсся шуис Давидлы: «Мӧд нылӧс сета тэныд, тэ лоан меным зятьӧн».

²² Саул тшӧктіс аслас кесйӧгъяслы гусьӧникӧн висьтавны Давидлы: «Тэ воин ӧксылы сьӧлӧм вылас. Сылӧн кесйӧгъясыс тшӧтш радейтӧны тэнӧ. Ло ӧксылы зятьӧн».

²³ Сауллӧн кесйӧгъяс ставсӧ висьталісны Давидлы. Давид воча шуис налы: «Ті чайтанныд, кокньыд лоны ӧксылӧн зятьӧн. Ме гӧлиник и абу тӧдчана морт».

²⁴ Кесйӧгъяс висьталісны Сауллы Давидлысь кывъяссӧ.

²⁵ Саул шуис налы: «Висьталӧй Давидлы, мый ӧксы некутшӧм дон оз босьт гӧтырпуысь, сӧмын кӧсйӧ, мед тэ вайин сылы сё филистимсалӧн чильган йывсьыс вундыштӧм кучикторсӧ – татшӧм ногӧн сійӧ водзӧс перъяс аслас вӧрӧглысь». Збыльвылас, ӧксы кӧсйис, мед филистимсаяс виасны Давидӧс.

²⁶ Сауллӧн кесйӧгъяс висьталісны Давидлы ӧксылысь кывъяссӧ. Давидлы сьӧлӧм вылас воис ӧксылӧн вӧзйӧмыс – лоны сылӧн зятьӧн.

²⁷ Урчитӧм лун вотӧдз Давид аслас йӧзкӧд муніс да виис кыксё филистимсаӧс. Налысь вундыштӧм кучикторсӧ Давид вайис Саул ӧксылы, медым лоны сылӧн зятьӧн. Сэки Саул сетіс Мелкола нывсӧ Давид сайӧ.

²⁸ Саул аддзис, мый Господь Давидкӧд. Сійӧ тӧдіс, мый [став Израиль войтыр да] Мелкола нылыс радейтӧ Давидӧс.

²⁹ Саул нӧшта на ёнджыка кутіс повны Давидысь. И став олӧм чӧжыс мустӧмтіс сійӧс.

³⁰ Филистимса тышкайӧзӧн веськӧдлысьяс уськӧдчывлісны Израиль вылӧ. Сауллӧн мукӧд веськӧдлысьяс дорысь Давид шедӧдліс унджык вермӧм, та вӧсна пондіс ёна нимавны.