Ӧксыяслӧн 1 небӧг 15 - Коми Библия 2023

Господь эновтӧ Саулӧс

¹ Самуил шуис Сауллы: «Господьлӧн тшӧктӧм серти ме мавтыштӧмӧн пукті тэнӧ Сылӧн Израиль войтырлы ӧксыӧ. Ӧні тэ кывзы Господьлысь кывсӧ.

² Господь Саваоф тадзи висьталӧ: ”Ме эг вунӧд амалик войтырлысь лёк вӧчӧмсӧ. Эг вунӧд, кыдзи найӧ уськӧдчисны Египетысь петӧм Израиль войтыр вылӧ.

³ Ӧні мун да пасьварт амаликъясӧс [да ерим войтырӧс]. Бырӧд ставсӧ, мый налӧн эм. [Эн босьт аслыд нинӧм, но бырӧд ставсӧ да сет ёрӧм улӧ.] Эн жалит найӧс, виав айуловӧс и аньясӧс, челядьӧс и пузчужӧм кагаясӧс. Виав тшӧтш налысь ӧшъяссӧ, ыжъяссӧ, верблюдъяссӧ да осёлъяссӧ”».

⁴ Саул чукӧртіс тышкайӧзсӧ Телаимӧ да арталіс-гижаліс найӧс. Сылӧн вӧлі Израиль войтырысь кыксё сюрс пода, а Иуда чужанкотырысь – дас сюрс тышкаморт.

⁵ Саул воис амаликъяслӧн кар дорӧ да сувтіс сёртасӧ. Сэні дасьтысис, мед уськӧдчыны на вылӧ.

⁶ Сэтчӧс олысь кеней войтырлы ыстіс юӧр: «Петӧй да ылыстчӧй амалик войтырысь, мед ме эг бырӧд тіянӧс накӧд тшӧтш. Ті уна бурсӧ вӧчинныд Израиль войтырлы, кор найӧ локтісны Египет муысь». Кеней войтыр кывзысис да ылыстчис амалик войтырысь.

⁷ Саул пасьвартіс амаликъясӧс. Тышыс муніс Хавиласянь Шурӧдз, мый Египет дорын.

⁸ Амаликъяслысь Агаг ӧксысӧ Саул босьтіс ловйӧн, а войтырсӧ виаліс шыпуртӧн [виаліс тшӧтш ерим войтырӧс]. Дзикӧдз бырӧдіс найӧс.

⁹ Саул аслас йӧзкӧд жалитісны Агаг ӧксыӧс. Амаликъяслысь медбур ыжъяссӧ, ӧшъяссӧ, тшӧгӧдӧм баляяссӧ да став дона эмбурсӧ эз кӧсйыны бырӧдны, бырӧдісны сӧмын ковтӧмсӧ да лёкджыксӧ.

¹⁰ Сэки Самуиллы вӧлі Господьсянь кыв:

¹¹ «Ме чорыда жалита, мый пукті Саулӧс ӧксыӧ. Сійӧ бергӧдчис Меысь да эз вӧч Менам тшӧктӧм серти». Самуил шогӧ усис. Войбыд сійӧ кевмысис Господьлы.

¹² Водз асывнас Самуил чеччис да мӧдӧдчис Саул дінӧ. Но Самуиллы юӧртісны, Саул пӧ мунӧма Кармил карӧ, мед сувтӧдны сэні аслыс казьтылан из. Сэсянь пӧ [бӧр ыстӧма тарантассӧ,] ачыс мунӧма Галгалӧ.

¹³ Самуил локтіс Саул дінӧ. Кор паныдасис сыкӧд, мӧдыс чолӧмасьӧмӧн шыасис: «Бурсиӧма тэнӧ Господь. Ме ставсӧ вӧчи Господьлӧн тшӧктӧм серти».

¹⁴ Самуил юаліс: «Мыйсяма ӧшъяслӧн да ыжъяслӧн баксӧм кылӧ?»

¹⁵ Саул вочавидзис: «Менам йӧзӧй босьтісны амаликъяслысь медбур ыжъяссӧ да ӧшъяссӧ, медым вись вайны Господьлы, тэнад Енлы. Мукӧдсӧ ми бырӧдім».

¹⁶ Самуил шуис Сауллы: «Кывзы, ме висьтала тэныд, мый Господь войнас шуис меным». Саул шуис: «Висьтав».

¹⁷ Самуил пондіс висьтавны: «Эн-ӧ тэ асьтӧ нинӧмӧ пукты, кор лоин Израиль чужанкотыръяслы юралысьӧн? Но Господь мавтыштіс тэнӧ да пуктіс ӧксыӧ Израиль войтырлы.

¹⁸ Господь мӧдӧдіс тэнӧ тыш вылӧ. Сійӧ тшӧктіс уськӧдчыны мыж вӧчысь амаликъяс вылӧ да дзикӧдз бырӧдны найӧс.

¹⁹ Мыйла тэ эн кывзысь Господьлысь? Тэ уськӧдчин босьтны налысь эмбурсӧ, тадзи Господь водзын лёксӧ вӧчин».

²⁰ Саул шуис: «Ме кывзыси Господьлысь. Муні сэтчӧ, кытчӧ мӧдӧдіс менӧ Господь. Ме вайӧді амалик войтырлысь Агаг ӧксысӧ, а войтырсӧ дзикӧдз бырӧді.

²¹ Но йӧзыс босьтісны Господьлы сиӧмторйысь медбур ыжъяссӧ да ӧшъяссӧ, мед Галгалын вись вайны Господьлы, тэнад Енлы».

²² Самуил шуис: – Мый вайӧ Господьлы нимкодьлун? Сотан да мукӧд висьяс али Сылысь кывзысьӧм? Кывзысьӧмыд бурджык вись вайӧм дорысь, бурджык межъяслысь госсӧ сотӧм дорысь.

²³ Ӧд кывзысьтӧмлуныд тунасьӧм кодь жӧ мыж, асныралӧмыд гортса бӧлбанъяслы юрбитӧм кодь жӧ. Тэ нинӧмӧ пуктін Господьлысь шуӧмсӧ, та вӧсна Сійӧ вештіс тэнӧ [Израильын] ӧксыалӧмысь.

²⁴ Саул вочавидзис Самуиллы: «Ме мыж вӧчи – торки Господьлысь тшӧктӧмсӧ да эг вӧч тэнад шуӧм серти. Ме йӧзсьыс полі, та вӧсна кывзі найӧс.

²⁵ Ӧні кора, вешты ме вылысь мыжӧс. Мунам мекӧд, ме копыртчыла Господьлы [тэнад Енлы]».

²⁶ Самуил шуис: «Ме тэкӧд ог мун, ӧд тэ нинӧмӧ пуктін Господьлысь шуӧмсӧ. Сійӧ вештіс тэнӧ Израильын ӧксыалӧмысь».

²⁷ Сэсся Самуил бергӧдчис, мед мунны. Но Саул шашаритчис сылы паськӧм дорышас, и паськӧмыс косяссис-орис.

²⁸ Самуил шуис: «Талун Господь босьтіс тэнсьыд Израильын ӧксыалӧмтӧ да сетіс сійӧс мӧдлы, тэнад матыссалы, коді тэысь бурджык.

²⁹ Израильлӧн эскана Енмыс оз пӧръясь да оз соссьы Аслас кывъясысь. Сійӧ абу морт, мед вежны шуӧм кывсӧ».

³⁰ Саул шуис: «Ме мыжми. Но эн янӧд менӧ Израильлӧн юрнуӧдысьяс водзын да аслам войтыр водзын. Лок, бӧр мунам, и ме копыртчыла Господьлы, тэнад Енлы».

³¹ Саул муніс копыртчыны Господьлы, а Самуил муніс сы бӧрся.

³² Самуил тшӧктіс вайӧдны сы дінӧ амаликъяслысь Агаг ӧксысӧ. Агаг тіралӧмӧн матыстчис Самуил дінӧ, мӧвпаліс, мый кулӧмыс оз су сійӧс.

³³ Но Самуил шуис: «Кыдзи тэ аслад шыпуртӧн виалін мамъяслысь челядьсӧ, тадзи тэнад мамыд воштас ассьыс писӧ». Сэсся кераліс Агагӧс Господь водзын Галгалын.

³⁴ Та бӧрти Самуил муніс Рама карӧ, а Саул муніс гортас Гиваӧ.

³⁵ Аслас олӧм помӧдз Самуил эз нин аддзысьлы Саулкӧд, но шогсис сы вӧсна. Господь ёна жалитіс, мый пуктіс Саулӧс Израильлы ӧксыӧ.