Ӧксыяслӧн 1 небӧг 13 - Коми Библия 2023

Филистимсаяскӧд тыш

¹ Сауллӧн ӧксыӧ пуксьӧмсянь коли во. Мӧд вонас Саул бӧрйис Израиль войтырысь аслыс тышкайӧзӧс – куим сюрс мортӧс.

² Кык сюрсыс вӧлі Саулкӧд Микмасын да Вефиль керӧсын, а ӧти сюрсыс вӧлі Ионафанкӧд Гиваын Венямин муын. Мукӧдсӧ Саул лэдзис гортаныс.

³ Геваын Ионафан пасьвартіс филистимсаяслысь тышкакотырсӧ. Та йылысь кывсис мукӧд филистимса тышкайӧзлы. Сэки Саул тшӧктіс буксыны буксанӧн Израиль му пасьтала, медым еврейяс тӧдмалісны,

⁴ мый Саул пасьвартӧма филистимса тышкакотырӧс, и филистимсаяс лӧгалӧны израильсаяс вылӧ. Та йылысь кылӧм бӧрын став Израиль войтырыс чукӧртчис Саул дінӧ Галгалӧ.

⁵ Филистимсаяс лӧсьӧдчисны петны тышӧ Израильлы паныд. Налӧн вӧлі комын сюрс тарантас да квайт сюрс верзьӧма, а пода йӧзыс – саридздор лыа мында. Филистимса тышкайӧз локтісны да сувтісны Микмасӧ, Бет-Авенсянь асыввывладорӧ.

⁶ Кор израильсаяс казялісны, мый филистимсаяс топӧдӧны найӧс, дзебсисны кырта горсъясӧ, сёнъясӧ, изкыртаяс костӧ, важ гуасянінъясӧ да косьмӧм вайӧртӧдъясӧ.

⁷ Мукӧдыс вуджисны Йӧрдан ю сайӧ, Гад чужанкотырлӧн муӧ да Галаад муӧ. Саул кольччис Галгалӧ. Йӧзыс, кодъяс вӧліны сыкӧд, ёна полісны.

Саул мыж вӧчӧ

⁸ Сизим лун чӧж, Самуиллӧн индӧм кадӧдз, Саул виччысис сійӧс. Но Самуил век на эз лок Галгалӧ, и войтырыс кутіс мунавны Саул дінысь.

⁹ Сэки Саул шуис: «Вайӧдӧй пемӧсъясӧс, мед вайны Енлы сотан вись да бурасян висьяс». Сэсся Саул вайис Енлы сотан вись.

¹⁰ Вись вайӧмыс муртса помасис, и Самуил локтіс. Саул воча петіс сылы, мед чолӧмасьны сыкӧд.

¹¹ Но Самуил шуис: «Мый тэ вӧчин?» Саул вочавидзис: «Урчитӧм кадыс коли нин, а тэ век на эн лок. Войтырыс кутіс мунавны ме дінысь, а филистимсаяс вӧліны нин Микмасынӧсь.

¹² Сэки ме мӧвпышті, ӧні, мися, локтасны филистимсаяс Галгалӧ да уськӧдчасны ме вылӧ, а ме весиг эг на шыась Господь дінӧ. Та вӧсна шуи, мый ачым вая сотан висьсӧ».

¹³ Самуил шуис Сауллы: «Тэ лёка вӧчин. Тэ торкин аслад Господь Енлысь тэныд сетӧм тшӧктӧмсӧ. Тэ кӧ вӧчин Господьлӧн тшӧктӧм серти, Сійӧ эськӧ пыр кежлӧ вынсьӧдіс тэнсьыд ӧксыалӧмтӧ Израильын.

¹⁴ Но ӧні тэнад ӧксыалӧмыд оз ло дыр. Господь корсяс Аслыс мортӧс сьӧлӧм сертиыс да пуктас сійӧс Аслас войтырлы юралысьӧ, ӧд тэ эн вӧч Господьлӧн тшӧктӧм серти».

¹⁵ Самуил чеччис да муніс Галгалысь Гиваӧ Венямин муӧ. [Гиваӧ муніганыс Саулкӧд кольччӧм йӧзыс паныдасисны вӧрӧгкӧд. Вӧрӧг уськӧдчис на вылӧ.] Гиваын Саул арталіс-гижаліс ассьыс йӧзсӧ, лои морт квайтсё.

¹⁶ Аслас йӧзкӧд да Ионафан пиыскӧд Саул кольччис Геваӧ Венямин муӧ. [Найӧ бӧрдісны, ӧд] филистимса тышкайӧз вӧліны Микмасынӧсь.

¹⁷ Филистимсаяс ыстісны куим тышкакотыр, медым куштыны му. Ӧти тышкакотыр муніс Офралань, Шуал муӧ,

¹⁸ мӧд тышкакотырыс веськӧдчис Бет-Хоронлань, а коймӧд тышкакотырыс муніс Цевоим ковтысӧ нуӧдан туйӧд овтӧминлань.

¹⁹ Израиль му пасьтала эз вӧвны дорччысьяс, ӧд филистимсаяс эз лэдзны еврейяслы дорны шыяс да шыпуртъяс.

²⁰ Израильсаяслы колӧ вӧлі ветлыны филистимсаяс дінӧ, медым лэчтыны гӧр-чернысӧ да кокан-чарланысӧ.

²¹ Чуктавліс кӧ гӧрныс, коканныс, вила-черныс либӧ колӧ вӧлі веськӧдны бедьлысь кӧрт помсӧ, найӧ мынтылісны ыджыд дон.

²² Та вӧсна [Микмасын] тышкасигӧн Саул да Ионафан йӧзлӧн эз вӧвны шыпуртъяс ни шыяс, вӧлі сӧмын Сауллӧн да Ионафан пиыслӧн.

²³ Филистимсаяслӧн водзын мунысь тышкакотырыс сувтіс Микмас кардорса сёртасӧ.