Ӧксыяслӧн 1 небӧг 12 - Коми Библия 2023

Самуил шыасьӧ Израиль войтыр дінӧ

¹ Самуил шуис Израиль войтырлы: «Ме ставсӧ вӧчи тіян корӧм серти – пукті тіянлы ӧксыӧс.

² Ӧні сійӧ кутас веськӧдлыны тіянӧн. Ме пӧрысь нин, дай дзор нин, но пиянӧй лоӧны тіянкӧд. Том кадсянь талунъя лунӧдз ме вӧлі тіянлы веськӧдлысьнас.

³ Ӧні Господь водзын да Сылӧн мавтыштӧмаыс водзын висьталӧй, босьтлі-ӧ ме кодлыськӧ ӧшсӧ либӧ осёлсӧ? Пӧръявлі-ӧ да дзескӧдлі-ӧ кодӧскӧ? Сибӧдлі-ӧ кодсянькӧ козин, медым сылӧн лёк вӧчӧм вылӧ синмӧс тупкыны? Висьталӧй, и ме ставсӧ бӧр сета тіянлы».

⁴ Йӧзыс вочавидзисны: «Тэ миянӧс эн пӧръявлы, эн дзескӧдлы да некодлысь нинӧм эн босьтлы».

⁵ Самуил шуис налы: «Господь кылӧ, и Сылӧн мавтыштӧмаыс талун кылӧ тіянлысь висьталӧмтӧ, мый ме сайын нинӧм абу». Ставныс шуисны: «Господь кылӧ».

⁶ Сэсся Самуил шыасис йӧзыс дінӧ: «[Господь кылӧ.] Господь бӧрйис Мӧисейӧс да Ааронӧс, и петкӧдіс тіянлысь батьяснытӧ Египет муысь.

⁷ Ӧні сувтӧй, а ме кута мыждыны тіянӧс Господь водзын. Кута казьтывны тіянлы Сылысь веськыд уджъяссӧ, мый Сійӧ вӧчис тіянлы да тіян батьяслы.

⁸ Яковлӧн Египетӧ локтӧм бӧрын нартитӧм вӧсна батьясныд ойзӧмӧн-бӧрдӧмӧн шыасисны Господь дінӧ. Сэки Сійӧ мӧдӧдіс Мӧисейӧс Ааронкӧд, и найӧ петкӧдісны тіянлысь батьяснытӧ Египетысь да овмӧдісны найӧс татчӧ.

⁹ Но батьясныд вунӧдісны Господьӧс, ассьыныс Енсӧ. Сэки Господь сетіс найӧс хацорса тышкайӧзӧн Сисар нима веськӧдлысь киӧ, филистимсаяс киӧ да моавса ӧксы киӧ. Найӧ ставныс тышкасисны батьясныдлы паныд.

¹⁰ Но батьясныд бӧрдӧмӧн шыасисны Господь дінӧ да шуисны: ”Ми мыж вӧчим – эновтім Господьӧс да кесъялім-юрбитім Ваал да Астарта идолъяслы. Мезды миянӧс вӧрӧг киысь, ми кутам кесъявны Тэныд”.

¹¹ Сэки Господь мӧдӧдіс Ероваалӧс, Варакӧс, Еффайӧс, Самуилӧс да мездіс тіянӧс став вӧрӧгысь, и ті олінныд повтӧг.

¹² Ӧксынас тіян вӧлі Господь, тіян Енныд. Но кор ті аддзинныд, мый аммон войтырлӧн Нахаш ӧксы уськӧдчӧ тіян вылӧ, ті шуинныд меным: ”Миянлы колӧ ӧксы, сійӧ мед ыджыдалас миян вылын”.

¹³ Господь пуктіс тіянлы ӧксыӧс, кодӧс ті коринныд да бӧрйинныд.

¹⁴ Понданныд кӧ повны Господьысь, кесъявны Сылы, кывзыны Сійӧс, да онӧ кӧ кутӧй пыксьыны Сылӧн тшӧктӧмъяслы, но понданныд тіян вылын ыджыдалысь ӧксыныдкӧд ветлыны асланыд Господь Енлӧн туйӧд, сэки Господь доръяс тіянӧс.

¹⁵ Онӧ кӧ кутӧй кывзыны Господьӧс, а Сылы паныд кыпӧдчанныд, сэки Господь лэптас Ассьыс кисӧ тіянлы паныд, кыдзи лэптіс кисӧ батьясныдлы паныд.

¹⁶ Ӧні сулалӧй да видзӧдӧй, кутшӧм ыджыдтор тіян син водзын вӧчас Господь.

¹⁷ Ӧні шобді вундан кад. Но ме кӧ шыася Господь дінӧ, Сійӧ ыстас гым да зэр. Тадзи ті аддзанныд да тӧдмаланныд, кутшӧм ыджыд мыж ті вӧчинныд Господьлӧн син водзын, кор ті коринныд аслыныд ӧксыӧс».

¹⁸ Самуил шыасис Господь дінӧ, и Господь ыстіс сійӧ лунӧ гым да зэр. Ставнысӧ полӧм босьтіс Господьысь да Самуилысь.

¹⁹ Йӧзыс шуисны Самуиллы: «Кевмысь миян вӧсна Господьлы, аслад Енлы, медым ми, тэнад кесйӧгъяс, эгӧ кулӧй. Ми корим ӧксыӧс, тадзи асланым мыжъяс дінӧ содтім нӧшта ӧти мыж».

²⁰ Самуил вочавидзис йӧзыслы: «Энӧ полӧй. Дерт, ті мыж вӧчинныд, но сӧмын энӧ кежӧй Господьысь, а кесъялӧй Сылы став сьӧлӧмнаныд.

²¹ Энӧ мунӧй идолъяс бӧрся, кодъяс оз вермыны отсавны да мездыны тіянӧс, ӧд найӧ – нинӧм.

²² Аслас ыджыд нимыс вӧсна Господь оз коль тіянӧс, Ассьыс войтырсӧ. Господь бӧрйис тіянӧс, мед ті вӧлінныд Сылӧн войтырӧн.

²³ Ме ог лэдз ачымӧс мыж вӧчны Господьлы паныд – ог дугды кевмысьны тіян вӧсна. Ме веськӧда тіянӧс бур да веськыд туй вылӧ.

²⁴ Сӧмын полӧй Господьысь, кесъялӧй Сылы веськыда да став сьӧлӧмсяньныд. Ті ӧд асьныд аддзылінныд, кутшӧм ыджыд уджъяс Сійӧ вӧчис тіян пӧвстын.

²⁵ А кутанныд кӧ водзӧ вӧчны лёксӧ, сэки куланныд ті, и тіян ӧксыныд».