Ӧксыяслӧн 1 небӧг 11 - Коми Библия 2023

Саул вермӧ аммон войтырӧс

¹ [Тӧлысь мысти] локтіс аммон войтырысь Нахаш да кытшаліс Галаад муын Явис кар. Явис карын олысьяс шуисны Нахашлы: «Кӧртав миянкӧд бурасян йитӧд, и ми пондам кесъявны тэныд».

² Аммон войтырысь Нахаш шуис налы: «Ме кӧртала тіянкӧд йитӧд, но медводз быдӧнлысь тіянлысь перъя веськыд синтӧ. Тадзи янӧда став Израильӧс».

³ Явис карса юрнуӧдысьяс воча шуисны Нахашлы: «Сет миянлы сизим лун. Ми мӧдӧдам юӧртысьясӧс став Израиль му пасьтала. Некод кӧ оз отсав миянлы, ми сетчам тэныд».

⁴ Мӧдӧдӧмаяс локтісны Гиваӧ, Сауллӧн чужан карӧ, да висьталісны войтырлы Нахашлысь кывъяссӧ. Ставныс ырзӧмӧн кутісны бӧрдны.

⁵ Саул тайӧ кадас вӧлі локтӧ ӧшъясыс бӧрся видз-му вывсьыс. Сійӧ юаліс: «Мый лои войтырыскӧд? Мыйла найӧ бӧрдӧны?» Сылы висьталісны Явис карса олысьяссянь вайӧм юӧрсӧ.

⁶ Тайӧс кылӧм бӧрын Енлӧн Лов лэччис Саул вылӧ, сы пытшкын кыптіс скӧрлун.

⁷ Сійӧ босьтіс кык ӧшкӧс да кераліс найӧс, яйторъяссӧ ыстіс юӧр вайысьяскӧд став Израиль му пасьтала да тшӧктіс шуны: ”Коді оз пет тышӧ Саулкӧд да Самуилкӧд, сылысь ӧшъяссӧ тадзи жӧ лоӧ кералӧма”. Господьысь полӧм босьтіс войтырсӧ, и найӧ ставныс ӧтитӧг мунісны Саул бӧрся.

⁸ Везекын Саул видзӧдаліс локтӧм йӧзӧс: Израильысь вӧлі куимсё сюрс морт, Иуда муысь – комын сюрс морт.

⁹ Юӧр вайысьяслы шуисны: «Висьталӧй Галаад муын Явис карын олысьяслы, аски пӧ луншӧр кадӧ воас тіянлы отсӧг». Юӧртысьяс бӧр локтісны Явис карӧ да ставсӧ висьталісны сэтчӧс олысьяслы. Йӧзыс пондісны нимкодясьны.

¹⁰ Явис карын олысьяс шуисны Нахашлы: «Аски ми локтам тіян дінӧ. Вӧчӧй миянкӧд, мый кӧсъянныд».

¹¹ Аскинас Саул юкис ассьыс тышкайӧзсӧ куим пельӧ. Асъядорыс найӧ пырисны аммон тышкайӧзлӧн чукӧртчанінӧ да луншӧр кадӧдз пасьвартісны найӧс. Ловйӧн кольӧмаяс пышйисны-разалісны.

¹² Сэки Израиль войтыр шуис Самуиллы: «Вайӧдӧй сійӧ йӧзсӧ, кодъяс шуасьлісны, мый Саул оз шогмы ӧксы туйӧ. Ми виам найӧс».

¹³ Но Саул шуис: «Тайӧ лунӧ некодӧс оз ков вины, ӧд талун Господь мездіс Израильӧс».

¹⁴ Самуил шуис войтырыслы: «Мунамӧй Галгалӧ. Саулӧс выльпӧв пуктам ӧксыӧ».

¹⁵ Ставныс мунісны Галгалӧ, и сэні Господь водзын пуктісны Саулӧс ӧксыӧ. Сэсся вайисны Господьлы бурасян висьяс. Израиль войтыр Саулкӧд ёна нимкодясис-гажӧдчис сэні.