Неемий 7 - Коми Библия 2023

¹ Стенсӧ лэптӧм бӧрын да ӧдзӧсъяс пукталӧм бӧрын индісны дзиръя видзысьясӧс, сьылысьясӧс да левитъясӧс.

² Ме пукті Ерусалимын юравны ассьым Ханани вокӧс да Хананейӧс, изкарӧн веськӧдлысьӧс, коді эз вудж ассьыс кывсӧ, а поліс Енмысь. Ме тшӧкті налы:

³ «Ерусалимлысь дзиръяяссӧ мед оз восьтны, кытчӧдз шондіыс оз кут пӧжны. Вой кежлас дзиръя видзысьяс мед пӧдлаласны-йигналасны ӧдзӧсъяссӧ. Ерусалимын олысьясӧс сувтӧдӧй видзны карсӧ, ӧтиясӧс – карса стен вылӧ, мӧдъясӧс – асланыс керкалы воча».

Пленысь локтысьяс

⁴ Ерусалим кар вӧлі паськыд да ыджыд, но олысьыс сэні вӧлі этша на, и керкаяссӧ абу на вӧлі вӧчӧма.

⁵ Менам Енмӧй пуктіс меным сьӧлӧмӧ чукӧртны нималана йӧзӧс, веськӧдлысьясӧс да став войтырсӧ, медым артавны-гижавны найӧс. Ме аддзи небӧг, кытчӧ вӧлі пасйӧма медводз локтысьяслысь нимсӧ. Сэні вӧлі гижӧма:

⁶ Иуда муысь йӧз, кодъясӧс вавилонса Навукодоносор ӧксы коркӧ нуӧдліс пленӧ, ӧні бӧр локтісны Ерусалимӧ да Иуда муӧ – быдӧн аслас карӧ.

⁷ Найӧс вайӧдісны Зоровавель, Исус, Неемий, Азарий, Раамай, Нахман, Мардокей, Билшан, Мисперет, Бигвай, Нехум да Баан. Израиль войтырлӧн айулов лыдыс:

⁸ Парош рӧдысь вӧлі кык сюрс сё сизимдас кык морт,

⁹ Шефатай рӧдысь – куимсё сизимдас кык морт,

¹⁰ Арах рӧдысь – квайтсё ветымын кык морт,

¹¹ Пахат-Моав рӧдысь Исуссянь да Йоавсянь чужысьыс – кык сюрс кӧкъямыссё дас кӧкъямыс морт,

¹² Элам рӧдысь – сюрс кыксё ветымын нёль морт,

¹³ Затту рӧдысь – кӧкъямыссё нелямын вит морт,

¹⁴ Заккай рӧдысь – сизимсё квайтымын морт,

¹⁵ Биннуй рӧдысь – квайтсё нелямын кӧкъямыс морт,

¹⁶ Бебай рӧдысь – квайтсё кызь кӧкъямыс морт,

¹⁷ Азгад рӧдысь – кык сюрс куимсё кызь кык морт,

¹⁸ Адоникам рӧдысь – квайтсё квайтымын сизим морт,

¹⁹ Бигвай рӧдысь – кык сюрс квайтымын сизим морт,

²⁰ Адин рӧдысь – квайтсё ветымын вит морт,

²¹ Атер рӧдысь Езекейсянь чужысьыс – ӧкмысдас кӧкъямыс морт,

²² Хашум рӧдысь – куимсё кызь кӧкъямыс морт,

²³ Бецай рӧдысь – куимсё кызь нёль морт,

²⁴ Хариф рӧдысь – сё дас кык морт,

²⁵ Гаваон рӧдысь – ӧкмысдас вит морт.

²⁶ Виплиемысь да Нетофаысь вӧлі сё кӧкъямысдас кӧкъямыс морт,

²⁷ Анатотысь – сё кызь кӧкъямыс морт,

²⁸ Бет-Азмаветысь – нелямын кык морт,

²⁹ Киръят-Яримысь, Кефираысь да Беротысь – сизимсё нелямын куим морт,

³⁰ Рамаысь да Геваысь – квайтсё кызь ӧти морт,

³¹ Микмасысь – сё кызь кык морт,

³² Вефильысь да Гайысь – сё кызь куим морт,

³³ мӧд Невоысь – ветымын кык морт.

³⁴ Мӧд Элам рӧдысь вӧлі сюрс кыксё ветымын нёль морт,

³⁵ Харим рӧдысь – куимсё кызь морт.

³⁶ Ериконысь вӧлі куимсё нелямын вит морт,

³⁷ Лодысь, Хадидысь да Оноысь – сизимсё кызь ӧти морт,

³⁸ Сенаысь – куим сюрс ӧкмыссё комын морт.

³⁹ Попъяслӧн лыдыс: Едай рӧдысь Исуссянь чужысьыс вӧлі ӧкмыссё сизимдас куим морт,

⁴⁰ Иммер рӧдысь – сюрс ветымын кык морт,

⁴¹ Пашхур рӧдысь – сюрс кыксё нелямын сизим морт,

⁴² Харим рӧдысь – сюрс дас сизим морт.

⁴³ Левитъяслӧн лыдыс вӧлі сизимдас нёль морт. Найӧ вӧліны Исус да Кадмиэл рӧдъясысь, Ходавийсянь чужысьяс.

⁴⁴ Сьылысьяслӧн лыдыс вӧлі сё нелямын кӧкъямыс морт. Найӧ вӧліны Асаф рӧдысь.

⁴⁵ Дзиръя видзысьяслӧн лыдыс вӧлі сё комын кӧкъямыс морт. Найӧ вӧліны Шаллум, Атер, Талмон, Аккув, Хатит да Шовай рӧдъясысь.

⁴⁶ Крамбердса кесйӧгъяс вӧліны Цихай рӧдысь, нӧшта Хасуф, Таббаот,

⁴⁷ Керос, Сиах, Падон,

⁴⁸ Лебан, Хагаб, Шалмай,

⁴⁹ Ханан, Гиддел, Гахар,

⁵⁰ Реай, Рецин, Некодай,

⁵¹ Газзам, Уззай, Пасеах,

⁵² Бесай, Меун, Нефис,

⁵³ Бакбук, Хакуп, Хархур,

⁵⁴ Бацлут, Мехид, Харшай,

⁵⁵ Баркос, Сисар, Темах,

⁵⁶ Нециах да Хатиф рӧдъясысь.

⁵⁷ Соломонлӧн кесйӧгъяссянь чужысьяс вӧліны Сотай рӧдысь, нӧшта Соферет, Перуд,

⁵⁸ Ял, Даркон, Гиддел,

⁵⁹ Шефатай, Хаттил, Покерет-Цевайм да Амон рӧдъясысь.

⁶⁰ Крамбердса кесйӧгъяслӧн да Соломонлӧн кесйӧгъяссянь чужысьяслӧн лыдыс вӧлі куимсё ӧкмысдас кык морт.

⁶¹ Тел-Мелахысь, Тел-Харшаысь, Керубысь, Адданысь да Иммерысь петысьяс эз вермыны висьтавны, кутшӧм чужанкотырысь найӧ, эз вермыны эскӧдны, мый налӧн рӧдыс петӧ Израиль войтырысь.

⁶² Тайӧ йӧзыс вӧліны Делайсянь, Товисянь да Некодайсянь чужысьяс – ставнас квайтсё нелямын кык морт,

⁶³ тшӧтш Хабай, Хаккоц да Барзиллай попъяссянь чужысьяс. Барзиллай гӧтрасьлӧма галаадса Барзиллайлӧн ныв вылӧ, та бӧрын сійӧс кутӧмаӧсь тадзи нимтыны.

⁶⁴ Найӧ корсисны чужанвуж гижӧдъясысь нимъяснысӧ, но эз аддзыны. Та вӧсна найӧс эз пыртны попъяс лыдӧ.

⁶⁵ Медыджыд юралысь шуис, мый налы оз ков сёйны вежа вись, кытчӧдз оз лок поп, коді пудъясяс урим да туммим отсӧгӧн.

⁶⁶ Локтысьяслӧн лыдыс ставнас вӧлі нелямын кык сюрс куимсё квайтымын морт.

⁶⁷ Тайӧ лыдас эз пырны кесйӧгъяс, кодъяслӧн лыдыс вӧлі сизим сюрс куимсё комын сизим морт. Локтысьяс пӧвстын вӧлі кыксё нелямын вит сьылысь.

⁶⁸ Локтысьяслӧн вӧлі сизимсё комын квайт вӧв, кыксё нелямын вит мул,

⁶⁹ нёльсё комын вит верблюд да квайт сюрс сизимсё кызь осёл.

⁷⁰ Рӧдкутысьясысь унаӧн сетісны крам лэптӧм вылӧ козинъяс. Медыджыд юралысьыс сетіс крам видзанінӧ сюрс зарни сьӧм, вир резан ветымын тасьті да попъяслы витсё комын дӧрӧм.

⁷¹ Рӧдкутысьяс сетісны крам видзанінӧ кызь сюрс зарни сьӧм да кык сюрс кыксё эзысь сьӧм.

⁷² Войтырыс сетіс кызь сюрс зарни сьӧм, кык сюрс эзысь сьӧм да попъяслы квайтымын сизим дӧрӧм.

⁷³ Попъяс, левитъяс, дзиръя видзысьяс, сьылысьяс, войтыр да крамбердса кесйӧгъяс овмӧдчисны асланыс каръясӧ. Быд израильса морт овмӧдчис аслас карӧ.