Нав Исус 9 - Коми Библия 2023

Гаваонса олысьяскӧд йитӧд кӧрталӧм

¹ Тайӧ лоӧмторъяс йывсьыс тӧдмалісны [аморейяслӧн] став ӧксыыс, кодъяс олісны Йӧрдан ю рытыввыв муын: керӧсвыв муын, керӧсбердса муын, Ыджыд саридз пӧлӧн да Ливан дорын. Тайӧ вӧліны хеттейяс, аморейяс, [гергесейяс,] ханаансаяс, перезейяс, хивейяс да евуссаяс.

² Ставныс найӧ ӧтувтчисны, медым петны тышӧ Исуслы да Израильлы паныд.

³ Но кор Гаваон карса олысьяс тӧдмалісны, мый Исус вӧчис Ерикон да Гай каръяслы,

⁴ шуисны ылӧдлыны израильсаясӧс. Ӧткымын морт мӧдӧдчисны туйӧ, босьтісны важмӧм мешӧкъясӧ сёян, а косясьлӧм-дӧмлӧм кучик дозъясӧ босьтісны вина да пуктісны ставсӧ осёлъяс вылӧ.

⁵ Асьныс кӧмалісны дӧмлӧм кӧмъяс, пасьталісны киссьӧм паськӧм, туяныс босьтісны кос да чирйыссьӧм нянь.

⁶ Найӧ локтісны Исус дінӧ Галгалӧ, кӧні сулалісны израильсаяслӧн чомъяс, сэсся шуисны Исуслы да израильсаяслы: «Ми локтім тіян дінӧ ылі муысь. Кӧрталӧй миянкӧд йитӧд».

⁷ Израильсаяс шуисны локтӧм хивейяслы: «Гашкӧ, ті миянкӧд орччӧн оланныд? Ми огӧ вермӧй тіянкӧд йитӧд кӧртавны».

⁸ Найӧ вочавидзисны: «Ми – тэнад кесйӧгъяс». Исус юаліс налысь: «Кодъяс ті? Кытысь локтінныд?»

⁹ Найӧ вочавидзисны: «Ми, тэнад кесйӧгъяс, локтім зэв ылі муысь. Ми кывлім тіян Господь Енлӧн выныс йылысь. Кывлім, мый Сійӧ вӧчис Египетын

¹⁰ да аморейяслӧн кык ӧксылы Йӧрдан сайын, хешбонса Сигон ӧксылы да васанса Ог ӧксылы, коді оліс Аштаротын [да Эдрейын].

¹¹ Та вӧсна миян юрнуӧдысьяс да став олысьыс тшӧктісны миянлы: ”Босьтӧй туйӧ сёян да петӧй налы воча. Шуӧй налы, ми пӧ тіян кесйӧгъяс, корам, кӧрталӧй миянкӧд йитӧд”.

¹² Со миян няньным, гортысь петіганым сійӧ пӧсь на вӧлі, а ӧні косьмӧма да чирйыссьӧма.

¹³ Вина тыра кучик дозъясным выльӧсь вӧліны, а ӧні со косясьлӧмаӧсь. Кузь туй вӧсна миян паськӧмным дзикӧдз киссьӧма».

¹⁴ Господьлысь юасьтӧг израильсаяс видлісны локтысьяслысь няньсӧ.

¹⁵ Исус кӧрталіс накӧд йитӧд, кӧсйысис, мый найӧс ловйӧн коляс да оз пет тышӧ налы паныд. Израильса юралысьяс кыв сетісны налы.

¹⁶ Куим лун мысти израильсаяс тӧдмалісны, мый йӧзыс, кодъяскӧд найӧ кӧрталісны йитӧд, олӧны насянь матын.

¹⁷ Сэки Израиль пиян петісны туйӧ да куим лун мысти воисны налӧн Гаваон, Кефира, Берот да Киръят-Ярим каръясӧдз.

¹⁸ [Исус да] Израиль пиян эз уськӧдчыны на вылӧ, ӧд Израиль войтырлӧн юралысьясыс вӧлі кыв сетӧмаӧсь налы Израильлӧн Господь Ен водзын. Став Израиль войтыр кутіс шуасьны юралысьяс вылӧ,

¹⁹ но найӧ шуисны: «Израильлӧн Господь Ен водзын ми кыв сетім налы, та вӧсна огӧ вермӧй вӧрзьӧдны найӧс.

²⁰ Ловйӧн колям найӧс, медым кыв сетӧм торкӧмысь эз су миянӧс Енлӧн скӧрлуныс».

²¹ Юралысьяс тшӧктісны ловйӧн кольны найӧс, и найӧ лоины Израиль войтырлы пес кералысьясӧн да ва ваялысьясӧн.

²² Йӧзлы, кодъяс волісны Галгалӧ, Исус шуис: «Мыйла ті ылӧдлінныд миянӧс? Шуинныд, мый зэв ылын оланныд, а вӧлӧмкӧ, миянсянь матынӧсь.

²³ Та вӧсна ёрӧма тіянӧс. Нэмсӧ кутанныд кесйӧг туйын овны, кутанныд керавны пес да ваявны ва [меным да] менам Енлӧн керкаӧ!»

²⁴ Найӧ шуисны Исуслы: «Миянлы, тэнад кесйӧгъяслы, юӧртісны, мый Господь, тіян Енныд, тшӧктӧма Аслас Мӧисей кесйӧглы, сетны тіянлы став тайӧ мусӧ да бырӧдны [миянӧс да] тайӧ муас олысьяссӧ. Ми ёна полім, мый ті бырӧданныд миянӧс, та вӧсна тадзи вӧчим.

²⁵ Ӧні ми тэнад киынӧсь. Вӧч миянкӧд сійӧ, мый чайтан бурӧн да веськыдӧн».

²⁶ Исус эз сет хивейясӧс Израиль пиян киӧ, эз лэдз вины найӧс.

²⁷ Тайӧ лунсяньыс Исус уджӧдіс [гаваонса олысь] хивейясӧс, налы ковмис керавны пес да ваявны ва Израиль войтырлы, а сідзжӧ Господьлӧн висьпуктанінӧ. Сійӧ местаас, мый бӧрйӧма Господь, найӧ ӧнӧдз вӧчӧны тайӧ уджсӧ.