Нав Исус 7 - Коми Библия 2023

Аканлӧн мыж

¹ Но Израиль пиян торкисны Господьлы сиӧмтор йылысь тшӧктӧмсӧ [да сиӧмторйысь босьтісны аслыныс]. Акан, коді вӧлі Иуда чужанкотырысь Зерах Завдий Кармилӧн пи, Господьлы сиӧмторйысь мыйкӧ вӧлі босьтӧма аслыс. Та вӧсна Господьлӧн скӧрлуныс ӧзйис Израиль пиян вылӧ.

² Исус мӧдӧдіс ассьыс йӧзсӧ Ериконысь Гайӧ. Гай кар вӧлі Бет-Авенсянь матын, Вефильсянь асыввылын. Исус тшӧктіс налы: «Мунӧй видзӧдалӧй мусӧ». Найӧ ветлісны видзӧдавны Гай кар.

³ Локтӧм бӧраныс найӧ шуисны Исуслы: «Став тышкайӧзлы сэтчӧ оз ков мунны, а сӧмын кык-ӧ-куим сюрс мортлы. Найӧ пасьвартасны Гай кар. Оз ков мудзтӧдны став тышкайӧзсӧ, ӧд сэні олысьыс абу уна».

⁴ Тышӧ петісны куим сюрс гӧгӧр морт, но найӧ пышйисны Гайын олысьясысь.

⁵ Гайын олысьяс вӧтӧдісны найӧс карса дзиръя дорсяньыс Севаримӧдз, а сэні керӧсысь лэччиганыс виисны комын квайт израильса мортӧс. Израильсаяс дзикӧдз ловнас усисны.

⁶ Исус косяліс паськӧмсӧ да кымынь уськӧдчис муас Господьлӧн куд водзӧ. Тадзи рытӧдзыс куйліс израильса юрнуӧдысьяскӧд. Юрнысӧ найӧ ставныс коялісны муӧн.

⁷ «Господьӧй Ыджыдӧй! Мыйла Тэ вуджӧдін тайӧ войтырсӧ Йӧрдан ю вомӧн? Медым сетны миянӧс аморейяслӧн киӧ? – юасис Исус. – Бурджык, ми кӧ кольччим Йӧрдан ю сайӧ да олім сэні!

⁸ Господьӧй, мый ме верма ӧні шуны, кор израильса тышкайӧз бергӧдчисны мышкӧн вӧрӧглы да пышйисны?

⁹ Кор ханаансаяс да тайӧ муас мукӧд олысьыс кыласны та йылысь, найӧ кытшаласны миянӧс да вуштасны нимнымӧс войтыръяс пӧвстысь. Мый Тэ вӧчан, медым дорйыны Ассьыд ыджыд нимтӧ?»

¹⁰ Господь шуис Исуслы: «Чеччы! Мыйла тэ уськӧдчин чужӧм вылад?

¹¹ Израиль войтыр мыж вӧчис. Найӧ торкисны йитӧдӧс, мый Ме кӧрталі накӧд. Меным сиӧмторйысь аслыныс юкӧн босьтісны. Тадзи найӧ гусясисны да гусялӧмторсӧ асланыс кӧлуй улас дзебисны.

¹² Израиль пиян мышкӧн бергӧдчисны вӧрӧглы да пышйисны. Найӧ эз вермыны вӧрӧгӧс, ӧд веськалісны ёрӧм улӧ. Ёрӧм улӧ веськалӧмаӧс кӧ онӧ бырӧдӧй ас пӧвстсьыныд, Ме тіянкӧд ог ло.

¹³ Чеччы! Вежӧд войтыртӧ да висьтав налы, мед асывводз кежлас вежӧдасны-сӧстӧммӧдасны асьнысӧ, ӧд Господь, Израильлӧн Ен, тадзи висьталӧ: Израиль войтыр, тіян пӧвстын эмӧсь ёрӧм улӧ веськалӧмаяс. Кытчӧдз онӧ бырӧдӧй найӧс ас пӧвстсьыныд, вӧрӧгнытӧ онӧ вермӧй.

¹⁴ Аски асывнас матыстчӧй ме дінӧ чужанкотыр сертиныд. Чужанкотыр, код вылӧ индас Господь, мед матыстчас рӧд бӧрся рӧд. Рӧд, код вылӧ индас Господь, мед матыстчас котыр бӧрся котыр. Котыр, код вылӧ индас Господь, мед матыстчас морт бӧрся морт.

¹⁵ Кор лоӧ аддзӧма Господьлы сиӧмтор босьтысь мортӧс, сотӧй биын сійӧс да ставсӧ, мый сылӧн эм. Ӧд сійӧ шогмытӧмтор вӧчис Израильын да торкис Господьлысь йитӧдсӧ, мый Сійӧ кӧрталіс тіянкӧд».

¹⁶ Мӧд луннас Исус чеччис водз, тшӧктіс Израиль войтырлы матыстчыны чужанкотыр сертиныс. Вӧлі индӧма Иуда чужанкотыр вылӧ.

¹⁷ Сэсся Исус тшӧктіс матыстчыны Иуда чужанкотырлӧн рӧдъяслы. Вӧлі индӧма Зерах рӧд вылӧ. Исус тшӧктіс матыстчыны Зерах рӧдлы котыр сертиныс. Вӧлі индӧма Завдий [котыр] вылӧ.

¹⁸ Исус тшӧктіс матыстчыны Завдий котырысь айуловлы. Вӧлі индӧма Акан вылӧ. Сійӧ вӧлі Иуда чужанкотырысь Зерах Завдийлӧн Карми нима пилӧн пиыс.

¹⁹ Исус шуис Аканлы: «Пыдди пукты Израильлысь Господь Енсӧ да висьтась Сы водзын аслад мыжысь. Висьтав меным, мый тэ вӧчин, нинӧм эн дзеб».

²⁰ Акан шуис Исуслы: «Збыльысь, ме вӧчи мыжсӧ Израильлӧн Господь Енлы паныд. Со мый вӧчи.

²¹ Тышын шедӧдӧмтор пӧвстысь ме аддзи сеннарсаяслысь мича паськӧм, кыксё сикель мында эзысь да зарни ёкмыль, мый сьӧктанас вӧлі ветымын сикель. Ме ышті та вылӧ, босьті да дзеби чом улӧ, муас. Эзысьсӧ пыдӧджык дзебӧма».

²² Исус мӧдӧдіс йӧзӧс Аканлӧн чомйӧ. Найӧ котӧрӧн мунісны сэтчӧ да аддзисны ставсӧ, мый вӧлі дзебӧма чомъяс. Эзысьыс вӧлі медпыдын.

²³ Найӧ вайисны ставсӧ Исуслы да Израиль пиянлы, пуктісны Господь водзӧ.

²⁴ Израиль войтыркӧд Исус петкӧдіс Акор ковтысӧ Зерахлысь Акан писӧ, Господьлы сиӧмторйысь босьтӧм паськӧмсӧ, эзысьсӧ да зарни ёкмыльсӧ, тшӧтш сылысь ныв-писӧ, ыж-мӧссӧ, осёлъяссӧ да чомсӧ – дзик ставсӧ, мый сылӧн вӧлі.

²⁵ Исус шуис: «Сыысь, мый тэ вайин миянлы шог, Господь вайӧ талун шогсӧ тэныд». Израильсаяс изъялісны Аканӧс да сылысь котырсӧ, сэсся сотісны да тыртісны изъясӧн.

²⁶ Ӧнӧдз на тайӧ ыджыд из чукӧрыс сулалӧ сійӧ местаас, мый шуӧны Акор ковтысӧн сэні лоӧмтор вӧсна. Аканлӧн кулӧм бӧрын Господьлӧн скӧрлуныс лӧнис.