Нав Исус 5 - Коми Библия 2023

Израильсаяслӧн вундыштчӧм да Ыджыд лун пасйӧм

¹ Йӧрдан ю рытыввылын олысь аморейяслӧн ӧксыяс да саридз бокын олысь ханаанса ӧксыяс кывлісны, мый Господь [Ен] косьтӧма Йӧрдан ю, и Израиль пиян вуджӧмаӧсь сійӧс. Таысь ӧксыясӧс полӧм босьтіс, Израиль пиянлы паныд сувтны найӧ эз лысьтны.

² Сійӧ кадас Господь шуис Исуслы: «Вӧч изйысь [ёсь] пуртъяс да мӧдысь вундышт Израиль пиянӧс».

³ Исус вӧчис изйысь [ёсь] пуртъяс да вундыштіс Израиль пиянӧс. Сійӧ местасӧ нимтісны Вундыштчан ыбӧн.

⁴ [Египетысь петӧм бӧрын овтӧминті мунігкості чужӧм Израиль пиян вӧліны вундыштчытӧмӧсь.] Исус вундыштіс став айуловсӧ, ӧд Египетысь петӧм бӧрын ставныс, кодъяс вермисны петны тышӧ, овтӧминын кулалісны.

⁵ Египетысь петӧм став айуловсӧ вӧлі вундыштӧма, а овтӧминті мунігкості чужысьясӧс – абу.

⁶ Ӧд Израиль войтыр нелямын [кык] во чӧж ветлӧдліс овтӧминті. [Та вӧсна унаӧс абу на вӧлі вундыштӧма.] Египетысь петӧм израильса тышкайӧз эз нин вӧвны ловъяӧсь, ӧд найӧ эз кывзысьны Господьлысь. Господь кыв сетӧмӧн шуліс налы, мый найӧ оз аддзыны мусӧ, кӧні визувтӧ йӧв да ма, мусӧ, мый налӧн батьяслы кыв сетӧмӧн Господь кӧсйысис сетны миянлы.

⁷ На пыдди Господь сувтӧдіс налысь пиянсӧ. Исус вундыштіс налысь пиянсӧ, ӧд найӧ чужисны овтӧминын да вӧліны вундыштчытӧмӧсь на.

⁸ Мыйӧн ставнысӧ вӧлі вундыштӧма, найӧ асланыс чомъясын виччысисны бурдӧм.

⁹ Господь шуис Исуслы: «Египетын яналӧмнытӧ талун Ме вешті тіян вылысь». Та вӧсна тайӧ местаыс ӧнӧдз шусьӧ Галгал.

¹⁰ Сійӧ тӧлысьӧ, кор Израиль пиян сувтісны Галгалӧ, дас нёльӧд лунӧ рытнас найӧ сёйисны ыджыдлунся баляӧс Ерикон ковтысын.

¹¹ Ыджыд лун бӧрся мӧд луннас сёйисны Ханаан мулысь быдтас: шомтӧм сӧчӧн да пражитӧм тусь.

¹² Мувывса быдтас сёйӧм бӧрын Израиль пиянлӧн маннаыс эз нин вӧв. Тайӧ восяньыс найӧ пондісны сёйны Ханаан мулысь быдтассӧ.

Ерикон кар босьтӧм

¹³ Ерикон кар дорын Исус аддзис ас водзас сулалысь мортӧс. Сійӧ вӧлі перйӧма шыпуртсӧ. Исус матыстчис сы дінӧ да юаліс: «Тэ миян дор али миянлы паныд?»

¹⁴ Сійӧ вочавидзис: «Абу. Ме – Господьлӧн тышкакотырӧн веськӧдлысь. Та вӧсна ме тані». Исус кымынь уськӧдчис муас да копыртчӧмӧн юаліс: «Ыджыдӧй, мый висьталан меным, аслад кесйӧглы?»

¹⁵ Господьлӧн тышкакотырӧн веськӧдлысь шуис Исуслы: «Пӧрччы кӧмтӧ, ӧд тайӧ местаыс, кӧні тэ сулалан, вежа». Исус кывзысис.

¹⁶ Ерикон карса дзиръяяс видзисны йигналӧмӧн, ӧд йӧзыс полісны Израиль пиянысь. Некод эз вермы петны карсьыс, и некод эз вермы пырны карас.