Нав Исус 21 - Коми Библия 2023

Левитъяслӧн каръяс

¹ Левий чужанкотырлӧн рӧдкутысьяс локтісны Элазар поп дінӧ, Навлӧн Исус пи да Израиль чужанкотыръяслӧн рӧдкутысьяс дінӧ.

² Силомын, Ханаан муын, найӧ шуисны: «Мӧисей пыр Господь тшӧктіс сетны миянлы олан каръяс да на гӧгӧрысь ыж-мӧснымлы видзьяс».

³ Господьлӧн тшӧктӧм серти Израиль пиян торйӧдісны левитъяслы асланыс муысь каръяс да нагӧгӧрса видзьяс.

⁴ Медводдза пудйыс уси Каафсянь петысь рӧдъяслы. Пудъясьӧм бӧрын Левий чужанкотырысь Аарон поплӧн рӧдлы вичмис дас куим кар Иуда, Симеон да Венямин чужанкотыръяслӧн муысь.

⁵ А Каафсянь петысь мукӧд рӧдъяслы вичмис дас кар Ефрем да Дан чужанкотыръяслӧн муысь да Манассей джын чужанкотырлӧн муысь.

⁶ Пудъясьӧм бӧрын Гирсонсянь петысь рӧдъяслы вичмис дас куим кар Иссакар, Асир да Неффалим чужанкотыръяслӧн муысь да Манассей джын чужанкотырлӧн Васан муысь.

⁷ Мерарисянь петысь рӧдъяслы вичмис дас кык кар Рувим, Гад да Завулон чужанкотыръяслӧн муысь.

⁸ Израиль пиян пудъясьӧмӧн вичмӧдісны левитъяслы каръяс да нагӧгӧрса видзьяс, кыдзи Господь тшӧктіс Мӧисей пыр.

⁹ Иуда да Симеон чужанкотыръяслӧн муысь левитъяслы вичмисны татшӧм каръяс.

¹⁰ Медводдза пудйыс уси Левий чужанкотырысь Каафсянь петысь Ааронлӧн рӧдлы.

¹¹ Налы вичмисны Иуда керӧсвыв муысь енак войтырлӧн Арба батьлӧн Киръят-Арба кар, мӧд ногӧн кӧ, Хеврон кар да сыгӧгӧрса видзьяс.

¹² Но каргӧгӧрса сиктъяссӧ да кӧдзан муяссӧ сетісны Ефуннилӧн Калев пилы.

¹³ Аарон поплӧн рӧдлы сетісны Хеврон кар, кытчӧ вермас пышйыны морт виысь, да сыгӧгӧрса видзьяс. Налы сетісны тшӧтш Ливна кар да сыгӧгӧрса видзьяс,

¹⁴ Яттир да Эштемоа каръяс да нагӧгӧрса видзьяс,

¹⁵ Холон да Девир каръяс да нагӧгӧрса видзьяс,

¹⁶ Айн, Ютта да Бет-Шемеш каръяс да нагӧгӧрса видзьяс. Тайӧ ӧкмыс карыс Аарон рӧдлы вичмис кык чужанкотырлӧн муысь.

¹⁷ Венямин чужанкотырлӧн муысь Ааронлӧн рӧдлы вичмисны Гаваон да Гева каръяс да нагӧгӧрса видзьяс,

¹⁸ Анатот да Алмон каръяс да нагӧгӧрса видзьяс – ставнас нёль кар.

¹⁹ Ставнас Аарон рӧдысь попъяслы вичмис дас куим кар да нагӧгӧрса видзьяс.

²⁰ Каафсянь петысь мукӧд левитъяслы пудъясьӧм бӧрын вичмисны каръяс Ефрем чужанкотырлӧн муысь.

²¹ Налы сетісны Ефрем керӧсвыв муысь Сикем кар, кытчӧ вермас пышйыны морт виысь, да сыгӧгӧрса видзьяс. Налы сетісны тшӧтш Гезер кар да сыгӧгӧрса видзьяс,

²² Кивцаим да Бет-Хорон каръяс да нагӧгӧрса видзьяс – ставнас нёль кар.

²³ Дан чужанкотырлӧн муысь налы вичмисны Элтеке да Гиббетон каръяс да нагӧгӧрса видзьяс,

²⁴ Аялон да Гат-Риммон каръяс да нагӧгӧрса видзьяс – ставнас нёль кар.

²⁵ Манассей джын чужанкотырлӧн муысь налы вичмис кык кар: Танак да Гат-Риммон каръяс да нагӧгӧрса видзьяс.

²⁶ Ставнас налы вичмис дас кар да нагӧгӧрса видзьяс.

²⁷ Левий чужанкотырысь Гирсонсянь петысь рӧдъяслы вичмис Манассей джын чужанкотырлӧн муысь кык кар: Васан муысь Голан кар, кытчӧ вермас пышйыны морт виысь, да Беештера кар да нагӧгӧрса видзьяс.

²⁸ Иссакар чужанкотырлӧн муысь налы вичмисны Кишион да Даврат каръяс да нагӧгӧрса видзьяс,

²⁹ Ярмут да Эн-Ганним каръяс да нагӧгӧрса видзьяс – ставнас нёль кар.

³⁰ Асир чужанкотырлӧн муысь налы вичмисны Мишал да Авдон каръяс да нагӧгӧрса видзьяс,

³¹ Хелкат да Рехов каръяс да нагӧгӧрса видзьяс – ставнас нёль кар.

³² Неффалим чужанкотырлӧн муысь налы вичмис куим кар: Галилеяысь Кедеш кар, кытчӧ вермас пышйыны морт виысь, да сыгӧгӧрса видзьяс, тшӧтш Хаммот-Дор да Картан каръяс да нагӧгӧрса видзьяс.

³³ Ставнас Гирсонсянь петысь рӧдъяслы вичмис дас куим кар да нагӧгӧрса видзьяс.

³⁴ Мерарисянь петысь левитъяслы вичмисны Завулон чужанкотырлӧн муысь Иокнеам да Карта каръяс да нагӧгӧрса видзьяс,

³⁵ Димна да Нахалал каръяс да нагӧгӧрса видзьяс – ставнас нёль кар.

³⁶ [Йӧрдан ю сайысь, Ерикон кар весьтысь,] Рувим чужанкотырлӧн муысь налы вичмис Бецер кар да сыгӧгӧрса видзьяс. [Бецер кар, кытчӧ вермис пышйыны морт виысь, сулаліс Мисор овтӧминын.] Нӧшта вичмисны Яхац кар да сыгӧгӧрса видзьяс,

³⁷ Кедемот да Мефат каръяс да нагӧгӧрса видзьяс – ставнас нёль кар.

³⁸ Гад чужанкотырлӧн Галаад муысь налы вичмис Рамот кар, кытчӧ вермас пышйыны морт виысь, да сыгӧгӧрса видзьяс. Налы вичмисны тшӧтш да Маханаим кар да сыгӧгӧрса видзьяс,

³⁹ Хешбон да Язер каръяс да нагӧгӧрса видзьяс – ставнас нёль кар.

⁴⁰ Тадзи Мерарисянь петысь левитъяслы пудъясьӧм бӧрын вичмис дас кык кар.

⁴¹ Ставнас Израиль пиянлӧн муысь левитъяслы вӧлі сетӧма нелямын кӧкъямыс кар да нагӧгӧрса видзьяс.

⁴² Каръяссӧ вӧлі сетӧма нагӧгӧрса видзьяснас. [Кор Исус помаліс юклыны му, Израиль пиян сетісны Исуслы Ефрем керӧсвыв муысь Тимнат-Серах кар, мый сійӧ ачыс корис. Тадзи вӧчисны Господьлӧн тшӧктӧм серти. Исус дзоньталіс-лэптіс карсӧ да овмӧдчис сэтчӧ. Карас Исус вайис изйысь вӧчӧм пуртъяссӧ, мыйӧн сійӧ вундыштіс Израиль пиянӧс, кодъяс чужисны войтырлӧн овтӧминті мунігӧн, ӧд овтӧминас найӧс эз на вӧв вундыштӧма.]

⁴³ Татшӧм ногӧн Господь сетіс Израиль войтырлы ставнас мусӧ, мый кыв сетӧмӧн кӧсйысис сетны налӧн батьяслы. Израильсаяс босьтісны аслыныс тайӧ мусӧ да овмӧдчисны сэтчӧ.

⁴⁴ Господь быд боксянь видзис найӧс да сетіс лӧнь олӧм, кыдзи кыв сетӧмӧн кӧсйысис налӧн батьяслы. Вӧрӧгъяс эз вермыны найӧс, ӧд став вӧрӧгсӧ Господь сетіс налӧн киӧ.

⁴⁵ Ставыс, мый Господь кӧсйысис Израиль войтырлы, иніс. Нинӧм эз коль збыльмытӧг.