Нав Исус 14 - Коми Библия 2023

Йӧрдан рытыввылысь му юклӧм

¹ Израиль пиянлы Ханаан муысь вичмисны татшӧм муяс. Мусӧ налы юклісны Элазар поп, Навлӧн Исус пиыс да Израиль чужанкотыръяслӧн рӧдкутысьяс.

² Мусӧ юклісны пудъясьӧмӧн ӧкмыс чужанкотырлы да [Манассейлӧн] джын чужанкотырлы, кыдзи Господь тшӧктіс Мӧисей пыр.

³ Кык чужанкотырлы да [Манассейлӧн] джын чужанкотырлы Мӧисей сетіс мусӧ Йӧрдан асыввылысь. Левитъяслы мусӧ эз сет.

⁴ Ӧсип пиянсянь петісны Манассейлӧн да Ефремлӧн чужанкотыръяс. Левитъяслы торйӧдісны олан каръяс да на гӧгӧрысь ыж-мӧсныслы видзьяс, а му эз сетны.

⁵ Израиль пиян юклісны мусӧ, кыдзи Господь тшӧктіс Мӧисейлы.

⁶ Галгалын Иудасянь чужысьяс локтісны Исус дінӧ. Кенез рӧдысь Ефуннилӧн Калев пиыс шуис сылы: «Тэ ӧд тӧдан, мый висьталіс Господь тэа-меа йылысь Кадеш-Варниын Мӧисейлы, Енлӧн мортлы.

⁷ Ме сэки вӧлі нелямын арӧса, кор Мӧисей, Господьлӧн кесйӧг, Кадеш-Варнисянь мӧдӧдліс менӧ видзӧдавны тайӧ мусӧ. Ме ветлі да локтӧм бӧрын сылы ставсӧ веськыда висьталі.

⁸ Мекӧд ӧтлаын ветлысь вокъясӧй асланыс висьталӧмӧн повзьӧдісны войтырсӧ. Но ме кывзыси аслам Господь Енлысь.

⁹ Мӧисей сэки меным кыв сетӧмӧн шуис: ”Муыс, кытчӧ сувтліс тэнад кокыд, пыр кежлӧ лоӧ сетӧма тэныд да тэсянь чужысьяслы, ӧд тэ кывзысин Господьлысь, менам Енлысь”.

¹⁰ Аслас шуӧм серти Господь менӧ ловйӧн колис. Нелямын вит во сайын Израиль войтырлӧн овтӧминті ветлӧдлігӧн Господь шуліс тадзи Мӧисейлы. Ӧні меным кӧкъямысдас вит арӧс,

¹¹ но ме сэкъя кодь на ён, кор менӧ мӧдӧдліс Мӧисей. Ме важ кодьыс на вына да верма ветлыны тышӧ.

¹² Сет меным керӧсвыв мусӧ, мый йылысь сэки висьтавліс Господь. Тэ ачыд кывлін, мый сэні ыджыд да зумыд каръясын олӧ енак войтыр. Господь кӧ лоӧ мекӧд, ме вӧтла найӧс, кыдзи шуис Господь».

¹³ Исус бурсиис Ефуннилысь Калев писӧ да сетіс сылы Хеврон кар.

¹⁴ Кенез рӧдысь Ефуннилӧн Калев пи кывзысис Господьлысь, Израильлӧн Енлысь, та вӧсна сылы сетӧма Хеврон кар, и ӧнӧдз сійӧ Калев рӧдлӧн.

¹⁵ Водзынджыксӧ Хевронлӧн нимыс вӧлі Киръят-Арба, ӧд Арба нима морт вӧлі енак войтыр пӧвстын ыджыд морт. Тышъяс бӧрын тайӧ муас пуксис лӧнь кад.