Микей 5 - Коми Библия 2023

¹ Ерусалимын олысьяс, петӧй тышӧ, ӧд миянӧс кытшалісны! Израильлысь ёрдысьӧс кутасны кучкавны, беддьӧн кучкаласны чужӧмбанас.

Виплиемысь локтас Юралысь

² Виплием-Епрафа, тэ Иуда рӧдысь медічӧтыс! Но Виплием карысь петас Меным Сійӧ, коді лоӧ Израильын Юралысьӧн. Сылӧн петӧм-чужӧмыс важысянь на, нэмъяс пуксьытӧдз.

³ Господь эновтас Ассьыс войтырсӧ кад кежлӧ, кытчӧдз чужтысьыс оз чужты. Сэки вокъяслӧн колясыс бӧр локтас Израиль пиян дінӧ.

⁴ И локтас Сійӧ, коді кутас видзны Господь вынӧн, Аслас Господь Енлӧн медыджыд нимнас. Найӧ кутасны повтӧг овны, ӧд Сійӧ кутас ыджыдавны став му пасьтала.

⁵ Сійӧ ваяс лӧнь олӧм. Кор ассурса тышкайӧз пырасны миян муӧ да кутасны талявны миянлысь изкаръяс, ми кыпӧдам налы паныд сизим веськӧдлысьӧс, кӧкъямыс юралысьӧс.

⁶ Найӧ кутасны шыпуртӧн веськӧдлыны Ассур муӧн, веськӧдлыны Нимродлӧн муӧн карса дзиръя дорын. Лӧнь олӧм вайысь мездас миянӧс ассурсаяслӧн кипод улысь, кор найӧ пырасны миян муӧ, кор кутасны талявны мунымӧс.

⁷ Яков рӧдлӧн колясыс лоӧ войтыръяс пӧвстын Господьсянь мӧдӧдӧм лысва кодь, турунсӧ киськалӧм зэр кодь. Найӧ оз нин пондыны видзӧдны морт вылӧ, оз нин пондыны лача кутны йӧз вылӧ.

⁸ Войтыръяс пӧвстын Яков рӧдлӧн колясыс лоӧ вӧрса зверъяс пӧвстын олысь лев кодь, ыж чукӧр вылӧ уськӧдчысь том лев кодь. Сійӧ уськӧдчӧ, талялӧ-косявлӧ, и сыысь мездысьны некод оз вермы.

⁹ Дзескӧдысьлы паныд сувтӧй, и вӧрӧгнытӧ лоӧ бырӧдӧма.

Господь бырӧдас идолъясӧс

¹⁰ Сійӧ лунӧ, – висьталӧ Господь, – Ме бырӧда тіянлысь вӧвъяснытӧ, жугла тарантасъяснытӧ,

¹¹ бырӧда тіянлысь каръяснытӧ, кисьта изкаръяснытӧ.

¹² Ме бырӧда тіянлысь тунасьӧмнытӧ, кимӧститчысьяс оз лоны тіян пӧвстын.

¹³ Ме бырӧда идолъяснытӧ да юрбитан изъяснытӧ, ті онӧ кутӧй сэсся копрасьны киӧн вӧчӧмторъяслы.

¹⁴ Ме вужнас нетшышта юрбитан пуяснытӧ, бырӧда каръяснытӧ.

¹⁵ Скӧралӧмӧн да лӧгпырысь Ме водзӧс перъя кывзысьтӧм войтыръяслысь.