Матвей 26 - Коми Библия 2023

Исусӧс кӧсйӧны вины

¹ Тайӧс ставсӧ висьталӧм бӧрын Исус шуис велӧдчысьясыслы:

² «Кык лун мысти, ті тӧданныд, Ыджыд лун лоӧ. Тайӧ кадӧ Морт Пиӧс вузаласны да крестӧ тувъяласны».

³ Аркирейяс, Индӧдӧ велӧдысьяс да юрнуӧдысьяс чукӧртчисны Каиаф аркирейлӧн керкаӧ.

⁴ Найӧ сёрнитчисны ылӧдлӧмӧн босьтны Исусӧс да вины Сійӧс.

⁵ Но шуисны, мый Ыджыд лунӧ оз ков, ӧд йӧзыс вермасны шызьыны.

Исусӧс мавтыштӧм

⁶ Исус вӧлі Вифания сиктын, проказаысь бурдӧм Симон ордын.

⁷ Исус дінӧ локтіс ань, сійӧ вайис вальді дозйын дона вый. Исуслӧн сёйигӧн ань кисьталіс выйсӧ Исуслы юр вылас.

⁸ Велӧдчысьяс аддзисны да пондісны шуасьны: «Мыйла, бара, выйсӧ лотӧ-а?

⁹ Тайӧ выйсӧ эськӧ позис ыджыд донысь вузавны, а сьӧмсӧ гӧльяслы сетны».

¹⁰ Тайӧс казялӧмӧн Исус шуис налы: «Мыйла ті шӧйӧвоштанныд аньсӧ? Сійӧ буртор вӧчис Меным.

¹¹ Гӧльяс пыр лоасны тіянкӧд, а Ме тіянкӧд ог пыр ло.

¹² Выйӧн киськалӧмнас аньыс дасьтіс Менӧ дзебигкежлӧ.

¹³ Веськыда висьтала тіянлы: муюгыд пасьтала, кӧні лоӧ юӧртӧма тайӧ Евангелльӧсӧ, сэні казьтыштасны тайӧ аньсӧ да висьталасны, мый сійӧ вӧчис».

Иуда вузалӧ Исусӧс

¹⁴ Искариот Иуда вӧлі дас кык велӧдчысьысь ӧти. Сійӧ муніс аркирейяс дінӧ

¹⁵ да шуис: «Мый сетанныд, вузала кӧ тіянлы Исусӧс?» Найӧ вӧзйисны сылы комын эзысь сьӧм.

¹⁶ Сэксянь Иуда пондіс корсьны лӧсялан кад, медым вузавны Исусӧс.

Ыджыдлунся баляӧс сёйӧм

¹⁷ Шомтӧм нянь сёян лунъяс дырйи медводдза лунӧ Исус дінӧ локтісны велӧдчысьясыс да юалісны: «Кӧні кӧсъян сёйны ыджыдлунся баляӧс? Ми мунам да дасьтам».

¹⁸ Исус шуис: «Мунӧй карӧ сэтшӧмтӧ морт дінӧ да висьталӧй сылы: ”Велӧдысь шуис: Менам кадӧй матысмӧ. Тэ ордын велӧдчысьяскӧд пасъя Ыджыд лунсӧ”».

¹⁹ Велӧдчысьяс вӧчисны Исуслӧн тшӧктӧм серти, дасьтісны ыджыдлунся сёян.

²⁰ Рытнас Исус пуксис дас кыкнан велӧдчысьыскӧд сёйны.

²¹ Сёйиганыс шуис налы: «Веськыда висьтала тіянлы: тіян пиысь ӧти вузалас Менӧ».

²² Шогӧ усьӧмӧн быдӧн кутіс юасьны: «Ог-ӧ ме, Господьӧй?»

²³ Исус вочавидзис: «Менӧ вузалысь Мекӧд ӧти тасьтіысь сёйӧ.

²⁴ Морт Пи мунӧ, кыдзи гижӧма Сы йылысь. Но курыд шог Сійӧс вузалысьлы! Бурджык сылы вӧлі, эз кӧ чужлы».

²⁵ Сэки Сійӧс вузалысь Иуда шыасис: «Велӧдысьӧй, абу-ӧ ме?» Исус вочавидзис: «Тэ шуин».

²⁶ Сёйиганыс Исус босьтіс нянь, Енмӧс аттьӧалӧмӧн чегъяліс няньсӧ да велӧдчысьяслы сетігас шуис: «Босьтӧй, сёйӧй, тайӧ Менам яй».

²⁷ Сэсся босьтіс чаша, аттьӧаліс Енмӧс да велӧдчысьяслы сетігас шуис: «Юӧй татысь быдӧн.

²⁸ Тайӧ Менам вир – Выль Йитӧдлӧн вир, сійӧ киссьӧ уналысь мыжъяссӧ прӧститӧм вӧсна.

²⁹ Висьтала тіянлы: ӧнісянь ог понды юны тайӧ виноград юансӧ сійӧ лунӧдз, кор понда юны тіянкӧд выльӧс Менам Батьлӧн Юраланінын».

³⁰ Енлы сьылӧм бӧрын найӧ кайисны Олив керӧсӧ.

Исус висьталӧ Сійӧс эновтӧм йылысь

³¹ Исус шуис велӧдчысьясыслы: «Тавой ті ставныд эновтанныд Менӧ. Гижӧма: ”Видзысьсӧ кувмӧн дойда, и ыжъясыс разаласны”.

³² Ловзьӧм бӧрам Ме виччыся тіянӧс Галилеяын».

³³ Петыр шуис: «Весиг ставныс кӧ эновтасны Тэнӧ, ме ог».

³⁴ Исус вочавидзис: «Веськыда висьтала тэныд: тавой петук чукӧсттӧдз на тэ куимысь соссян Меысь».

³⁵ Петыр шуис: «Весиг кӧ кувны ковмас Тэкӧд, ог соссьы». Тадзи шуалісны тшӧтш мукӧд велӧдчысьыс.

Исус кевмысьӧ Гефсиманын

³⁶ Сэсся Исус велӧдчысьясыскӧд локтіс Гефсиманӧ. Сійӧ шуис налы: «Пукалыштӧй тані, Ме ветла кевмысьны».

³⁷ Аскӧдыс Исус босьтіс Петырӧс да Зеведейлысь кыкнан писӧ. Исусӧс гажтӧм да шогалӧм босьтіс.

³⁸ Сійӧ шуис: «Шогӧй кувмӧн топӧдӧ лолӧс. Олыштӧй Мекӧд тані да энӧ узьӧй».

³⁹ Ачыс водзлань муныштіс да кымынь уськӧдчӧмӧн кевмысис: «Батьӧй, позьӧ кӧ, вешты Ме дінысь тайӧ чашасӧ. Сӧмын мед лоас Тэнад кӧсйӧм серти, а оз Менам».

⁴⁰ Исус матыстчис велӧдчысьяс дінас да аддзис, мый найӧ унмовсьӧмаӧсь. Петырлы шуис: «Ӧти час весиг энӧ вермӧй узьтӧг олыштны Мекӧд.

⁴¹ Энӧ узьӧй, кевмысьӧй, мед ыштӧдӧмыс эз вермы тіянӧс. Лолыд ӧд пыр дась, а вир-яйыд жеб».

⁴² Исус мӧдысь муніс да бара кевмысис: «Батьӧй, Ме дінысь кӧ оз позь вештыны тайӧ чашасӧ, Меным кӧ колӧ юны сійӧс, мед лоас Тэнад кӧсйӧм серти».

⁴³ Локтӧм бӧрас Исус бара аддзис, мый велӧдчысьяссӧ унмыс топыда личкӧма.

⁴⁴ Исус колис найӧс да бара муніс, воддза мозыс коймӧдысь кевмысис.

⁴⁵ Сэсся локтіс велӧдчысьяс дінас да шуис налы: «Ті пыр на узянныд да шойччанныд? Кадыс воис. Морт Пиӧс мыжаяс киӧ сетӧны.

⁴⁶ Чеччӧй, мунамӧй. Менӧ вузалысь матын нин».

Исусӧс локтӧны босьтны

⁴⁷ Исуслӧн сёрнитігкості локтіс Иуда, дас кык велӧдчысьысь ӧти. Сыкӧд тшӧтш локтісны зоръясӧн да шыпуртъясӧн уна йӧз. Найӧс вӧлі мӧдӧдӧмаӧсь аркирейяс да юрнуӧдысьяс.

⁴⁸ Исусӧс вузалысь шуӧма локтӧмаяслы, кодӧс пӧ окышта, Сійӧс и босьтӧй.

⁴⁹ Иуда веськыда муніс Исус дінӧ да шуис: «Видза олан, Велӧдысьӧй», сэсся окыштіс Сійӧс.

⁵⁰ Исус шуис сылы: «Ёртӧй, та понда-ӧ тэ локтін!» Сэки кытшалісны да босьтісны Исусӧс.

⁵¹ Исускӧд вӧлысьясысь ӧти перйис шыпуртсӧ да керыштіс аркирей кесйӧглысь пельсӧ.

⁵² Исус шуис сылы: «Бӧр сюй шыпурттӧ. Шыпурт босьтысь шыпурт помысь кулас.

⁵³ Он ӧмӧй тӧд, Ме кӧ ӧні кора Батьӧйлысь, Сійӧ мӧдӧдас уна дас сюрс анделӧс.

⁵⁴ Кыдзи нӧ сэки Гижӧдъясыс инасны? Сэні шуӧма, тадзи колӧ лоны».

⁵⁵ Йӧз чукӧрлы Исус шуис: «Лёк вӧчысьӧс моз зорйӧн-шыпуртӧн локтінныд босьтны Менӧ. Ме быд лун тіян крамын пукалі-велӧді, но ті энӧ босьтӧй Менӧ.

⁵⁶ Ставыс тадзи лои, медым инісны пророк гижӧдъяс». Сэки велӧдчысьяс ставныс эновтісны Исусӧс да пышйисны.

Исус веськӧдлан котыр водзын

⁵⁷ Исусӧс кутысьяс вайӧдісны Сійӧс Каиаф аркирей ордӧ, кӧні вӧлі чукӧртчӧмаӧсь Индӧдӧ велӧдысьяс да юрнуӧдысьяс.

⁵⁸ Петыр бӧрӧ кольччӧмӧн вӧтчис Исус бӧрся аркирей керка дорӧдз. Пырис йӧрас да пуксис кесйӧгъяскӧд орччӧн – кӧсйис тӧдмавны, мыйӧн помасяс.

⁵⁹ Аркирейяс, юрнуӧдысьяс да став веськӧдлан котырыс корсисны Исуслы паныд ылӧгвисьталысьясӧс, медым сэсся мыждыны да вины Сійӧс.

⁶⁰ Уна пӧръясьысь воліс, но колана висьталысьыс эз сюр. Бӧрынджык нӧшта кык ылӧгвисьталысь локтісны.

⁶¹ Найӧ висьталісны: «Сійӧ шуліс, верма пӧ Енлысь крамсӧ жугӧдны, сэсся пӧ куим лунӧн сійӧс бӧр лэптыны».

⁶² Сэки аркирей сувтіс да юаліс Исуслысь: «Мый воча шуан?»

⁶³ Исус чӧв оліс. Аркирей шуис: «Ловъя Ен водзын висьтав миянлы, Тэ-ӧ Кристос, Ен Пи».

⁶⁴ Исус вочавидзис: «Тэ шуин. Висьтала тіянлы: ӧнісянь аддзанныд Морт Пиӧс, Ставсӧвермысьлӧн веськыдладорас пукалысьӧс да кымӧръяс вылын локтысьӧс».

⁶⁵ Сэки аркирей косяліс ассьыс паськӧмсӧ да шуис: «Сійӧ Енмӧс омӧльтӧ! Висьталысьяс миянлы оз нин ковны, ті асьныд кывлінныд Сылысь омӧльтӧмсӧ.

⁶⁶ Мый шуанныд?» Сылы вочавидзисны: «Мыжа! Вины Сійӧс!»

⁶⁷ Сэсся сьӧлалісны Исуслы чужӧмас, нӧйтісны Сійӧс да чужӧмас кучкалӧмӧн

⁶⁸ шуалісны: «Висьтав, Кристос, коді кучкис Тэнӧ?»

Петырлӧн соссьӧм

⁶⁹ Петыр пукаліс йӧрас. Ӧти кесйӧг ань матыстчис сы дінӧ да шуис: «Тэ тшӧтш галилеяса Исускӧд вӧлін».

⁷⁰ Петыр став йӧз водзас соссис: «Ог гӧгӧрво, мый висьталан»,

⁷¹ сэсся вешйис дзиръя дорӧ. Петырӧс казяліс мӧд ань да шуис сэні сулалысьяслы: «Тайӧ мортыс Назаретса Исускӧд вӧлі».

⁷² Петыр бара соссис, чорыда шуис: «Ме ог тӧд тайӧ Мортсӧ!»

⁷³ Бӧрынджык сэні сулалысьяс матыстчисны да шуисны Петырлы: «Тэ дзик на пиысь, сёрниыд налӧн кодь».

⁷⁴ Петыр енмасьӧмӧн пондіс соссьыны: «Ог тӧд тайӧ Мортсӧ». Дзик пыр кыліс петуклӧн чукӧстӧм.

⁷⁵ Сэки Петырлы тӧд вылас уси Исуслӧн шуӧмыс: «Петук чукӧсттӧдз на тэ куимысь соссян Меысь». Петыр петіс да курыда бӧрддзис.