Матвей 12 - Коми Библия 2023

Шойччан лун йылысь

¹ Шойччан лунӧ Исус мунӧ вӧлі нянь муяс вомӧн. Велӧдчысьяслӧн кынӧмныс сюммис, и мунігмозныс найӧ пондісны нетшкыны шепсӧ да сёйны.

² Тайӧс аддзылісны фарисейяс да шуисны Исуслы: «Видзӧдлы, мый Тэнад велӧдчысьясыд вӧчӧны! Тайӧс оз позь вӧчны шойччан лунӧ».

³ Исус воча шуис: «Ті ӧмӧй энӧ лыддьылӧй, мый вӧчис Давид, кор тшыгъяліс аслас йӧзкӧд?

⁴ Сійӧ пырис Ен керкаӧ да сёйис аслас йӧзкӧд вежа нянь. Тайӧс налы вӧчнысӧ эз позь, сӧмын попъяслы позис.

⁵ Ті ӧмӧй энӧ лыддьылӧй Индӧдысь, мый шойччан лунӧ попъяс уджалӧны крамын, но шойччан лунсӧ торкалӧмысь найӧ абу мыжаӧсь.

⁶ Висьтала тіянлы: тані Сійӧ, коді крам дорысь ыджыдджык.

⁷ Гижӧма: ”Буралӧм тіянсянь кӧсъя, ог вись вайӧм”. Гӧгӧрвоинныд кӧ тайӧс, сэки эськӧ энӧ мыжалӧй мыжтӧмъясӧс.

⁸ Морт Пи шойччан лун вылын ыджыдыс».

Косьмӧм киаӧс бурдӧдӧм

⁹ Сэтысь мунӧм бӧрын Исус пырис синагогаӧ.

¹⁰ Сэні вӧлі косьмӧм киа морт. Фарисейяс корсисны помка мыжавны Исусӧс да юалісны Сылысь: «Позьӧ-ӧ шойччан лунӧ бурдӧднысӧ?»

¹¹ Исус вочавидзис: «Тіян ыжныд кӧ шойччан лунӧ усяс гуӧ, онӧ ӧмӧй лэптӧй сійӧс сэтысь?

¹² Мортыс ӧмӧй абу донаджык ыжысь? Сідзкӧ, бурсӧ позьӧ вӧчны шойччан лунӧ».

¹³ Сэсся Исус шуис висьысьлы: «Нюжӧд китӧ». Сійӧ нюжӧдіс, и киыс пырысь-пыр бурдіс, лои мӧдыс кодь.

¹⁴ Сэки фарисейяс петісны да пондісны сёрнитны Исусӧс виӧм йылысь.

Енлӧн бӧрйӧм кесъялысь

¹⁵ Кор Исус тӧдмаліс та йылысь, муніс сэтысь. Сы бӧрся вӧтчис уна йӧз. Исус бурдӧдаліс висьысьясӧс

¹⁶ да ӧлӧдіс найӧс Сы йылысь висьтавлӧмысь.

¹⁷ Тадзи иніс Исай пророклӧн шуӧмыс:

¹⁸ – Со, Менам Кесъялысьӧй, Менам мусаӧй, Ме бӧрйи Сійӧс, Менам сьӧлӧмӧй нимкодясьӧ Сыӧн. Ме мӧдӧда Сы вылӧ Ассьым Лолӧс. Сійӧ ваяс веськыда мыждӧм быд войтырлы.

¹⁹ Сійӧ оз вензьы, оз горзы, ывлаын Сійӧс он кыв.

²⁰ Веськыда мыждӧмсӧ пӧрттӧдз Сійӧ чегыштӧм идзас оз чег, дзузган би оз кусӧд.

²¹ Войтыръяс пондасны Сы вылӧ лача кутны.

Кодсянь Исуслӧн выныс?

²² Исус дінӧ вайӧдісны пеж лолӧн кутӧм мортӧс, сійӧ вӧлі синтӧм, эз вермы сёрнитны. Исус бурдӧдіс сійӧс, и сійӧ пондіс сёрнитны да аддзыны.

²³ Став йӧзыс чуймисны, ӧта-мӧдныслысь юасисны: «Збыльысь-ӧ Сійӧ Давид Пи?»

²⁴ Тайӧс кывлісны фарисейяс да шуисны, Сійӧ пӧ вӧтлалӧ пеж ловъясӧс налӧн Вельзевул юралысь вынӧн.

²⁵ Налысь мӧвпъяссӧ тӧдӧмӧн Исус шуис: «Ас муын олысьяс кӧ ас костаныс тышкасьӧны, тайӧ муыс кушмас. Зыксьӧмӧн олысь карыд да керкаыд дыр оз сулав.

²⁶ Сӧтанаыс кӧ сӧтанасӧ вӧтлӧ, сійӧ аслыс паныд тышкасьӧ. Дыр-ӧ кутчысяс сылӧн ыджыдалӧмыс?

²⁷ Ме кӧ вӧтлала пеж ловъясӧс Вельзевул вынӧн, кутшӧм вынӧн, сідзкӧ, тіян йӧзыд вӧтлалӧны? Найӧ тіянӧс мыждасны.

²⁸ Ме кӧ Ен Лолӧн вӧтлала пеж ловъясӧс, сідзкӧ, Енлӧн Юралӧмыс воис тіянӧдз.

²⁹ Вермас-ӧ кодкӧ пырны вына мортлӧн керкаӧ да сійӧс кӧртавтӧг босьтны сылысь эмбурсӧ? Сӧмын сійӧс кӧрталӧм бӧрын вермас петкӧдны сылысь эмбурсӧ.

³⁰ Коді абу Мекӧд, сійӧ Меным паныд, коді оз чукӧрт Мекӧд, сійӧ разӧдӧ.

³¹ Та вӧсна висьтала тіянлы: мортлысь быд мыж да быд омӧльтӧм лоӧ прӧститӧма, но Вежа Лолӧс омӧльтӧм оз ло прӧститӧма.

³² Коді лёкӧдас Морт Пиӧс, сійӧс лоӧ прӧститӧма. Но коді лёкӧдас Вежа Лолӧс, сійӧс оз ло прӧститӧма тайӧ олӧмас, весиг локтанаас».

Бур да лёк вотӧс

³³ «Бур пу вайӧ бур вотӧс, лёк пу – лёкӧс. Путӧ донъялӧны вотӧс сертиыс.

³⁴ Вижля йылӧм! Верманныд-ӧ бурсӧ висьтавны, асьныд кӧ лёкӧсь? Ӧд мыйӧн тырӧма мортыслӧн сьӧлӧмыс, сійӧ вомсьыс и петӧ.

³⁵ Бур морт аслас бур видзанінысь бурсӧ петкӧдӧ, лёк морт аслас лёк видзанінысь лёксӧ петкӧдӧ.

³⁶ Шуа тіянлы: быд ковтӧм кывйысь мыждан лунӧ ковмас кывкутны.

³⁷ Аслад кывъяс вӧсна мыжман, аслад кывъяс вӧсна и мыждӧмысь мынан».

Ионалӧн пас

³⁸ Сэки фарисейяс да Индӧдӧ велӧдысьяс пиысь кодсюрӧ корисны: «Велӧдысь, петкӧдлы миянлы индысьпас».

³⁹ Исус воча шуис: «Лёк да пежас ылалӧм йӧз кӧсйӧны аддзывны индысьпас, но Иона пророк пасысь кындзи оз ло налы мӧдыс.

⁴⁰ Куим лун да куим вой Иона вӧлі ыджыд чери рушкуын. Тадзи куим лун да куим вой Морт Пи лоӧ му пыдӧсын.

⁴¹ Ниневия карын олысьяс сувтасны мыждан лунӧ ӧнія олысьяскӧд да мыжаласны найӧс. Ӧд Ионалӧн юӧртӧм бӧрын ниневияса йӧз бергӧдчисны асланыс мыжъясысь. Но тані тіянкӧд Сійӧ, коді Иона дорысь ыджыдджык.

⁴² Лунвыв муысь ӧксы-ань сувтас мыждан лунӧ ӧнія олысьяскӧд да мыжалас найӧс. Ӧд му помсяньыс сійӧ воліс кывзыны Соломонлысь мывкыд сёрнисӧ. Но тані тіянкӧд Сійӧ, коді Соломон дорысь ыджыдджык».

Пеж ловлӧн бӧр локтӧм

⁴³ «Морт пытшкысь петӧм бӧрын пеж лов шӧйтӧ ватӧминъясті, корсьӧ шойччанін да оз аддзы.

⁴⁴ Сэки шуӧ: ”Бӧр муна важ оланінӧ, кытысь петі”. Локтӧм бӧрас аддзӧ: оланінсӧ чышкӧма-пелькӧдӧма, и олысьыс сэні абу.

⁴⁵ Сэки мунӧ да босьтӧ аскӧдыс сизим пеж лолӧс, ассьыс на лёкджыкъясӧс, сэсся ставныс найӧ овмӧдчӧны важ оланінас. Тайӧ мортыслы воддза дорсьыс нӧшта на лёкджык лоӧ. Тадзи жӧ лоӧ ӧнія лёк йӧзлы».

Коді Исуслы вок, чой да мам?

⁴⁶ Йӧзкӧд Исуслӧн сёрнитігкостіыс локтісны Сылӧн мамыс да вокъясыс. Найӧ сулалісны ывлаас да кӧсйисны сёрнитыштны Сыкӧд.

⁴⁷ Ӧти морт шуис Исуслы: «Мамыд да вокъясыд ывлаасӧсь, Тэкӧд кӧсйӧны сёрнитны».

⁴⁸ Исус воча шуис: «Коді Меным мамыс? Кодъяс Меным вокъясыс?»

⁴⁹ Велӧдчысьяс вылас индӧмӧн шуис: «Со кодъяс Меным вокъясыс да мамыс.

⁵⁰ Енэжвыв Батьлӧн кӧсйӧм серти олысь – Меным вок, чой да мам».