Марк 16 - Коми Библия 2023

Исуслӧн ловзьӧм

¹ Шойччан лун бӧрын Магдала Марья, Яковлӧн Марья мамыс да Саломия ньӧбисны чӧскыд дука выйяс, медым мавтны Исусӧс.

² Шойччан лун бӧрын водз асывнас, шонді петігӧн, найӧ мунісны дзебанінӧ,

³ ас костаныс сёрнитісны: «Коді путкыльтас изсӧ пыранінсьыс?»

⁴ Воиганыс найӧ аддзисны, мый изсӧ вӧлі вештӧма. Изйыс вӧлі зэв ыджыд.

⁵ Дзебанінӧ пыриганыс найӧ аддзисны веськыдладорсьыс еджыд паськӧма пукалысь зонмӧс да ёна повзисны.

⁶ Сійӧ шуис налы: «Энӧ полӧй. Ме тӧда, ті корсянныд тувъявлӧм Назаретса Исусӧс. Сійӧ ловзис. Сійӧ тані абу. Видзӧдлӧй куйланінсӧ, татчӧ Сійӧс пуктылісны.

⁷ Мунӧй, юӧртӧй велӧдчысьясыслы, тшӧтш Петырлы, мый Исус виччысьӧ найӧс Галилеяын. Сэтысь найӧ аддзасны Сійӧс, тадзи Сійӧ Ачыс висьтавліс налы».

⁸ Аньяс петісны да шӧйӧвошӧмӧн котӧртісны дзебанінысь. Найӧс тіралӧм босьтіс. Найӧ нинӧм эз висьтавлыны, полісны да.

Исус петкӧдчӧ велӧдчысьясыслы

⁹ Шойччан лун бӧрын водз асывнас ловзьӧм Исус медводз петкӧдчис Магдала Марьялы, код пытшкысь Сійӧ вӧтліс коркӧ сизим пеж лолӧс.

¹⁰ Марья муніс да юӧртіс лоӧмтор йывсьыс Исускӧд ветлысьяслы, кодъяс ӧні шогсисны да бӧрдісны.

¹¹ Кор кылісны, мый Исус ловъя да Марья аддзылӧма Сійӧс, найӧ эз эскыны.

¹² Та бӧрти Исус петкӧдчыліс мӧд мыгӧрӧн велӧдчысьяс пӧвстысь кыкыслы, кодъяс вӧлі мунӧны орчча сиктӧ.

¹³ Найӧ бӧр косісны да юӧртісны мукӧдыслы, но весиг налы эз эскыны.

¹⁴ Медбӧрын Исус петкӧдчис дас ӧти велӧдчысьыслы, кор найӧ вӧлі сёйӧны. Сійӧ янӧдіс найӧс эскытӧмсьыс да сьӧлӧмнысӧ чорзьӧдӧмысь, ӧд найӧ эз эскыны йӧзыслы, кодъяс аддзылісны Сійӧс ловзьӧм бӧрас.

¹⁵ Сэсся шуис налы: «Мунӧй став муюгыд пасьтала да висьталӧй Евангелльӧсӧ ставныслы.

¹⁶ Коді эскас да пыртчас, сійӧ мездмас. Коді оз эскы, сійӧс лоӧ мыждӧма.

¹⁷ Эскысьяслӧн лоасны татшӧм индысьпасъяс: Менам нимӧн пондасны вӧтлавны пеж ловъясӧс да сёрнитны выль кывъяс вылын.

¹⁸ Босьтасны кӧ кианыс змейӧс да юасны кӧ мыйкӧ кулантор, таысь налы лёкыс оз ло. Найӧ пуктасны кинысӧ висьысьяс вылӧ, и найӧ бурдасны».

¹⁹ Тайӧс висьталӧм бӧрын Господь кыпӧдчис енэжӧ да пуксис Ен веськыдладорӧ.

²⁰ А велӧдчысьясыс мунісны да быдлаын висьтавлісны Бур Юӧр. Господь отсаліс налы да вынсьӧдіс Юӧрсӧ индысьпасъясӧн. Аминь.